“Ko ha Meʻa Fakaʻohovale ʻi he Sāpaté,” Ko e Kaumeʻá, ʻEpeleli 2023, 28–29.
Ko ha Meʻa Fakaʻohovale ʻi he Sāpaté
“Teti, ko e hā ʻoku ʻikai ke ke haʻu ai mo kimaua ki he lotú?”
Naʻe hoko ʻa e talanoa ko ʻení ʻi Malēsia.
Naʻe saiʻia ʻa Sanatani ke ʻalu ki he lotú ʻi he uike kotoa pē. Naʻe ʻikai ke ne loto ke liʻaki ha Sāpate! Ko ia toko taha pē ʻa e kiʻi tamasiʻi ʻi hono fāmilí, ko ia naʻe hangē hono ngaahi kaungāmeʻa ʻi he Palaimelí ko hano ngaahi tokoua mo e tuofāfiné. Naʻá ne saiʻia ʻi he ako fekauʻaki mo Sīsuú fakataha mo kinautolu pea nau hiva fakataha. Naʻá ne ʻalu mo ʻene faʻeé ki he lotú, ka naʻe ʻikai ke teitei ʻalu ʻene tamaí. Naʻe ʻikai kau ʻene tamaí ki he Siasí.
ʻI ha pō ʻe taha ʻi he maʻu meʻatokoni efiafí, naʻe fehuʻi ange ʻe Sanatani, “Teti, ko e hā ʻoku ʻikai ke ke haʻu ai ki he lotú mo kimauá?”
Na‘e sio hake ʻene tamaí mei heʻene peletí. “ʻOku ou femoʻuekina ʻaupito ʻi he Sāpaté.”
Naʻe pehē ange ʻe Sanatani,“Teti ka ʻoku mahuʻinga ke tauhi e ʻaho Sāpaté ke māʻoniʻoni. ʻOku fakahaaʻi ʻi he folofolá.”
Naʻe ʻohovale ʻene faʻeé. “Naʻá ke fakafanongo moʻoni lolotonga hoʻo ngaahi lēsoni ʻi he lotú. Ka ʻoku SAI pē ‘a e ‘ikai ke haʻu hoʻo tamaí mo kitaua. ʻOkú ne tokoni mai ʻi ha ngaahi founga kehekehe.”
Lolotonga e teuteu ʻa Sanatani ke mohé, naʻá ne fakakaukau pe ʻe fēfē nai kapau ʻe haʻu ʻene tamaí ki he lotú. Naʻá ne faʻa ongoʻi loto mamahi ʻi he taimi ʻe niʻihi ʻi heʻene sio ki hono ngaahi kaungāmeʻá ʻoku nau tangutu mo ʻenau ongomātuʻá. Naʻá ne fakaʻamu ke ʻi ai mai ʻene Tamaí mo ʻene Faʻeé.
Naʻe tūʻulutui ʻa Sanatani ʻo lotu kimuʻa peá ne mohé. Naʻá ne pehē,“ʻE Tamai Hēvani, kātaki ʻo tuku ke maʻu ʻe heʻeku tamaí ha taimi ʻi he Sāpaté ke ne lava ʻo haʻu mo au mo ʻeku Faʻeé. ʻOku ou saiʻia ʻaupito ke tangutu fakataha mo ia ʻi he lotú.”
ʻI ha Sāpate ʻe taha hili ha ngaahi uike siʻi mei ai, naʻe ui ʻe he Faʻeé ʻa Sanatani ki hono lokí.
Naʻá ne pehē ange, “Fakamolemole, ka he ʻikai ke ta lava ʻo ʻalu ki he lotú ʻi he ʻahó ni. ʻOku ʻikai ke u ongoʻi sai.”
Naʻe fakafulofula ʻa Sanatani. “Ka te u ʻofa ki hoku ngaahi kaungāmeʻá mo liʻaki ʻa e lēsoni ʻo e ʻaho ní. ʻOku ou fuʻu fie ʻalu ki he lotú.”
Naʻe pehē ange ʻe heʻeneFaʻeé, “ʻOua te ke hohaʻa ki ai. Ko e Sāpate pē ʻe taha. Pea kapau ʻokú ke fiemaʻu, te ta telefoni ki hoʻo faiako Palaimelí ke ke ʻiloʻi ʻa e meʻa ʻoku fekauʻaki mo e lēsoní.
Naʻe ʻuma ʻa Sanatani ki he laʻe ʻo ʻene Faʻeé. Naʻá ne lea leʻosiʻi ange, “Sai pē ia. Mālōlō pē, Mami. ʻOku ou ʻiloʻi ʻe ʻafioʻi ʻe he Tamai Hēvaní ʻa e ʻuhinga he ʻikai ke u lava ai ʻo ʻalu ki he lotú ʻi he ʻaho ní.”
Naʻe ʻalu ʻa Sanatani ki hono lokí ʻo toʻo mai ha tatau ʻo e makasini ko eKo e Kaumeʻá. Neongo ai pē kapau he ʻikai ke ne lava ʻo ʻalu ki he lotú, ka te ne kei lava pē ʻo lau ʻa e ngaahi talanoa ke tauhi ʻa e Sāpaté ke māʻoniʻoní.
“Sanatani!” Ko e ui atu ia ʻene Tamaí.
Naʻe hū mai ʻa Sanitani ki tuʻa mei hono lokí. “Ko e hā e meʻa ʻoku hokó Teti?”
Naʻe malimali ʻene tamaí. . “Teuteu. ʻOku ou ʻiloʻi ʻa e lahi hoʻo saiʻia ʻi he lotú, pea ʻoku ʻikai ke u loto ke ke liʻaki. Te u ʻalu mo koe!”
Naʻe ʻohovale ʻa Sanatani. Naʻe ʻikai tui ʻa Sanatani ki he meʻa ne hokó! Naʻá ne malimali fiefia ʻi heʻene fakavave atu ke teuteú.
Naʻe fakafeʻiloaki ʻe Sanatani ʻi he lotú ʻene tamaí ki hono ngaahi kaungāmeʻá. Naʻe tangutu ʻene Tamaí ʻi hono tafaʻakí lolotonga e houalotu sākalamēnití. Naʻe ongoʻi fiefia ʻaupito ʻa Sanatani ke fakataha mo ʻene tamaí ʻi he lotú!
Hili ʻa e lotú, naʻe pehē ange ʻe heʻene Tamaí, “ʻOku fiemaʻu ke u ʻalu ki ha feituʻu. Te u ʻave koe hili hoʻo kalasi Palaimelí, SAI ia?”
Naʻe talaange ʻe Sanatani, “SAI ia.” Naʻá ne fakaʻamu ʻe nofo ʻene Tamaí, ka naʻá ne fiefia ʻi heʻene haʻú. Ko ha meʻa fakaʻohovale moʻoni ia he Sāpaté!
Ngaahi tā fakatātā ʻa Nadiyah Suyatna