Fānaú mo e Toʻu Tupú

‘Oua ʻAupito Naʻá ke Teitei Foʻi

Fai ʻe Peleiki H., taʻu 10, ʻAlesona, USA

Lolotonga e tutuku ʻi he faʻahitaʻu māfaná, naʻá ku kau ʻi ha kalasi ʻenisinia fakalōpati ʻi he ako māʻolunga ofi ki hoku ʻapí. Ko e taha au ʻo e fānau iiki taha ʻi he kalasí. ʻI he ʻuluaki ʻahó, naʻe fakakulupu ai kimautolu ʻe heʻemau kau faiakó. Naʻa mau ako ʻi he ngaahi kulupu ko ʻení ʻa e founga ke fakapolokalamaʻi ai ʻa e ngaahi lōpatí. Naʻe fakaʻatā kimautolu ʻe he fakapolokalama koʻení ke mau faʻu ha ngaahi founga ki he ngaahi lōpatí ke lava ʻo tonu ʻenau ʻalu ʻi he ngaahi hala fihifihí. Naʻe faingataʻa ʻaupito ke ako, pea naʻe feʻunga mo ha ngaahi ʻaho lahi hono fakahoko ʻe heʻemau kulupú. ʻI ha ngaahi ʻaho ʻe niʻihi, naʻe ʻikai haʻu ʻa e kakaí ki he kalasí, ko ia ai ko au pē mo e tokotaha kehe naʻá ma fakahoko ʻemau ngāué.

ʻI he ʻaho fakaʻosí, naʻe fakakaukau e kau faiakó ke nau fai ha vaʻinga fakafiefia fakataha mo e kalasí kotoa. Naʻa nau ʻoange ki he kulupu takitaha ha nūtolo mōmoa ʻe 20 mo ha lole ʻe 10. Naʻa nau talamai ke mau langa ʻa e taua māʻolunga tahá. Ko e toko ua pē ʻi heʻemau kulupú he ʻaho ko iá, ko ia naʻe haʻu ha mēmipa mei ha kulupu ʻe taha ke tokoniʻi kimautolu.

Tā fakatātā ʻa Macky Pamintuan

Naʻa mau ngāue ʻi he tauá ʻi ha taimi lahi pea fai homau lelei tahá. Naʻe fuʻu fālahi ʻa e taua naʻa mau langá pea ʻikai ke fuʻu māʻolunga. Naʻa mau ongoʻi ne mau mei lava pē ʻo ngāue lelei ange. Naʻe loto hoku kaungā vaʻingá ke tuku, ka naʻá ku pehē ange, “ʻOua naʻa tau foʻi.” Naʻa mau toʻo kotoa ʻa e ngaahi kongokonga nūtolo mei he tafaʻaki ʻo e tauá ʻo fokotuʻu ia ki ʻolunga. Naʻe tupu māmālie pē ʻemau tauá!

Koeʻuhí naʻe ʻikai ke mau foʻi, ne mau māhanga ai mo ha kulupu ʻe taha ʻi he ʻuluakí. Naʻá ku ako ai neongo pe ko e hā hono lahi ʻo e faingataʻa ʻo ha ngaahi meʻa, ʻoku totonu ke ʻoua naʻa tau teitei foʻi!