“Ko ha Text ʻOku Fuʻu Angakovi,” Ko e Kaumeʻá, ʻEpeleli 2023, 36–37.
Ko ha Text ʻOku Fuʻu Angakovi
“ʻOiauē ʻikai!” Ko e lea ange ia ʻa Saké.
Naʻe hoko ʻa e talanoa ko ʻení ʻi he ʻIunaiteti Siteiti ʻo ʻAmeliká.
“Kātaki, Lesieli!” Naʻe kole ʻe Sake ki hono tuofefine lahí. “Kātaki ʻo toe fai ha foʻi vaʻinga ʻe taha mo kimautolu!”
“He ʻikai ke u lava, Sake.” ʻOku ʻi ai ʻeku ngāue fakaako mei ʻapi,” ko Lesieli ange ia. “Mahalo ko e pō ʻapongipongí.” Naʻá ne hū ki tuʻa mei he lokí.
“ʻOku ʻikai te ke toe vaʻinga mo au!” Ko e lea ange ia ʻa Saké, ʻo kiʻi leʻolahi ange ʻi he meʻa naʻá ne fakataumuʻa ki aí.
Naʻe talaange ʻe heʻene tamaí , “Sake tuku ke ne fai ʻene ngāue fakaako mei ʻapí.” Naʻá ne tufa ʻa e fanga kiʻi kongokonga kehekehe ʻo e vaʻingá kae tangutu fakatoupīkoi pē ʻa Sake ʻi hono seá Naʻe hangē naʻe fakahoko maʻu pē ʻe Lesieli ʻa e ngāue fakaako mei ʻapí. Pea te ne ʻi he ʻunivēsití ʻi he taʻu hono hokó! ʻE tātaaitaha ke ne toe sio ki ai.
Naʻe pehē ange ʻe heʻene faʻeé , “Sake, ko ho taimí ʻeni.”
Naʻe ʻunuakiʻi ʻe Sake ʻene meʻa vaʻingá pea tatali ki hono taimi hokó. Naʻá ne sio ki he telefoni ʻene faʻeé. Naʻe ‘i ai ʻene fakakaukau. Naʻe toʻo hake ʻe Sake ʻa e telefoní ʻo taipeʻi fakavavevave ha pōpoaki.
Mālō e lelei, Lesieli. ʻOkú ke fuʻu angakovi. ʻOfa atu, Sake.
Ko ʻena. Naʻe mamali pē ʻa Sake peá ne lomiʻi ʻa e send. Naʻá ne tangutu hifo ki hono seá. Ke ikuna he taimí ni ʻa e vaʻingá.
Hili ʻenau takitaha maʻu ʻa e faingamālie ke vaʻingá, naʻe tatangi e telefoni ʻa e Fineʻeikí. Naʻá ne lau e meʻa ʻi he telefoní.
Naʻá ne pehē mai, “ʻE, Sake?” “ʻOku ou tui ko e text ʻeni kiate koe.”
Naʻe malimali ʻa Sake. Naʻá ne fifili pe ko e hā ʻa e tali mai ʻa Lesielí. Naʻá ne toʻo e telefoní ʻo lau e tohí.
Mālō e lelei, Sake. Ko ha foha fakalangi koe ʻo e ʻOtuá! ʻOfa atu, Sisitā Sitiuati.
Naʻe fakafokifā pē ʻa e ʻikai ke ongoʻi sai ʻa Saké Naʻá ne fakatau ʻene mānavá mo pehē, “ʻOIAUĒ ʻIKAI!” “ʻOiauē ʻikai, ʻoiauē ʻikai, ʻoiauē ʻikai!”
“Ko e hā?” Ko e fehuʻi ange ia ʻene tamaí.
Naʻe ʻikai ke text ʻa Sake ki hono tuofefine ko Lesielí. Naʻe text ia kia Sisitā Sitiuati! Lesieli Sitiuati Naʻá ne talaange ki he hoa ngāue fakaetauhi ʻene Faʻeé ko ha fefine angakovi lahi, anga fulikivanu, mo anga palakū ia. Naʻe fakapuliki ʻe Sake hono matá ʻaki hono nimá. Naʻá ne fie totolo ki he lalo tēpilé ʻo nofo ai ʻi ha taʻu ʻe teau. Mahalo ha taʻu ʻe tahaafe.
“Ko e hā e meʻa ʻoku hokó, Sake?” Ko e fehuʻi ange ia ʻene Faʻeé.
“Naʻá ku ʻave ha text taʻefakaʻapaʻapa kia Sisitā Sitiuati kae ʻikai kia Lesieli. Naʻe ʻikai ke u ʻuhinga ki ai!” Naʻe toe text fakavavevave ʻa Sake kia Sisitā Sitiuati.
ʻOku ou kole fakamolemole atu, Sisitā Sitiuati. Naʻe fakataumuʻa e text ko iá ki hoku tuofefiné.
Naʻe uʻu ʻe Sake hono loungutú [tupu mei heʻene manavasiʻí], ʻo tatali ki heʻene tali maí. Te ne ʻita nai? Naʻe angalelei maʻu pē ʻa Sisitā Sitiuati ki he tokotaha kotoa pē. Fēfē nai kapau naʻá ne fakamamahiʻi ʻene ngaahi ongó?
Naʻe tatangi ʻa e telefoni ʻene Faʻeé.
Sake, ʻoku ou fakamolemoleʻi koe! Naʻá ku fiefia ke fanongo meiate koe, neongo kapau ko e ngaahi leá naʻe ʻikai teitei hangē ia ko koé. Kuo fuoloa ʻeku maheni mo koé, pea ʻoku ou ʻiloʻi ko ha tamasiʻi lelei koe te ke fai ha ngaahi meʻa lelei lahi ʻi ha ʻaho. Mahalo pē te ke fai ha meʻa lelei he pooni!
Naʻe kiʻi mānava ʻa Sake. Naʻá ne ongoʻi fiemālie ange he taimí ni.
“ʻOku SAI PĒ nai e meʻa kotoa?” Ko e fehuʻi ange ia ʻene Faʻeé.
Naʻe pehē ange ʻe Sake,“ʻOku ou tui ki ai.”
Naʻe pehē ange ʻe heʻene Faʻeé , “ʻOkú ke monūʻia ʻi hoʻo text kia Sisitā Sitiuatí kae ʻikai ki ha taha kehé. “ʻOkú ne faʻa vave maʻu pē ke fakamolemole.”
Naʻe kamokamo pē ʻa Sake. Naʻe hoko ʻa Sisitā Sitiuati ko ha faʻifaʻitakiʻanga lelei. Pea naʻá ne ʻiloʻi naʻe ʻikai totonu ke ne ʻave ʻa e text ko iá ki hono tuofefiné. Naʻá ne ʻiloʻi naʻe mahuʻinga ke ne fakaʻaongaʻi ha ngaahi lea ʻofa, kae ʻikai ke fakamamahiʻi e niʻihi kehé.
Naʻá ne puna ki ʻolunga. “Te u foki vave mai pē. ʻOku ʻi ai ha meʻa kuo pau ke u ʻalu ʻo tala kia Lesieli!”
Tā fakatātaaʻi ʻe Mike Laughead