“Ngaahi ʻEkitivitī ʻo e Haʻu, ʻo Muimui ʻIate Aú maʻá e Fānau Īkí,”Ko e Kaumeʻá, ʻEpeleli 2023, 49.
Fuakava Foʻoú
Ngaahi ʻEkitivitī ʻo e Haʻu, ʻo Muimui ʻIate Aú maʻá e Fānau Īkí
Ki he Toetuʻú
Talaange ki hoʻomou fānau īkí ʻa e talanoa ʻo e ʻuluaki Toetuʻú. Te ke lava ʻo fakaʻaongaʻi ʻa e fakatātā ʻi he peesi 24–25. Kole ki hoʻomou fānaú ke nau tuhu ki he Fakamoʻuí. Tokoniʻi kinautolu ke nau pehē, “Ko e Toetuʻú ʻoku fekauʻaki ia mo Sīsū Kalaisi!”
ʻI he Mātiu 15–17; Maʻake 7–9
Tokoniʻi hoʻomou fānau īkí ke ngaohi ha foʻi haati mei he toú pe ʻumeá. Talaange kiate kinautolu ko e taimi ʻoku tau muimui ai kia Sīsuú, ʻe lava ke ongoʻi ofi ange hotau lotó kiate Ia.
ʻI he Mātiu 18; Luke 10
Fakahā ki hoʻomou fānau īkí ʻa e ʻofa ʻa Sīsū Kalaisi ʻi he fānaú peá Ne faʻa tānaki kinautolu ʻo nofo takatakai ʻiate Ia (vakai, Mātiu 18:1–5). Puke ke ofi hoʻomou fānau īkí pea hivaʻi ʻa e “ʻOku Ongo ʻa e ʻOfá”(Tohi Hiva ʻa e Fānaú, 42–43).
ʻI he Sione 7–10
ʻAi hoʻomou fānau īkí ke nau sio ki ha sioʻata. Talaange kiate kinautolu ʻoku ʻafioʻi ʻe Sīsū honau hingoá, honau fōtungá, meʻa ʻokú ne ʻai ke nau fiefiá, mo e meʻa ʻokú ne ʻai ke nau loto-mamahí. Tokoniʻi hoʻomou fānau īkí ke nau lea, “ʻOku ʻafioʻi mo ʻofaʻi au ʻe Sīsū.”