“Ko e Lēsoni ki he Meʻa ʻoku Kaunga Kovi ki he Moʻuí,”Ko e Kaumeʻá, ʻEpeleli 2023, 32.
Ko e Lēsoni ki he Meʻa ʻoku Kau Kovi ki he Moʻuí
Mei ha ‘initaviu mo Sydney Squires.
ʻI hoku taʻu 10, naʻe lahi e ngaahi meʻa naʻe kaunga kovi ki heʻeku moʻuí. Ko e angamahení, naʻá ku faʻa vaʻinga ʻi tuʻa ʻi he faʻahitaʻu māfaná. Ka naʻe ʻikai hoko ia ʻi he taʻu ko iá! Naʻe hanga ʻe he ngaahi meʻa naʻe kaunga kovi ki heʻeku moʻuí ʻo ʻai ke faingataʻa ʻeku mānavá. Naʻe lahi taha pē ʻeku nofo falé. Ko e meʻa kotoa pē naʻá ku fiemaʻu ke faí, hangē ko e vaʻinga soká, naʻe fiemaʻu ha ivi lahi ange.
Hili e taʻu ko iá, naʻe foki mai hoku faingataʻaʻia fakaemoʻuí ʻi he faʻahitaʻu māfana kotoa pē. Naʻe ʻikai ke mau maʻu ha faitoʻo ke tokoni. Ka naʻa mau ʻiloʻi te u lava ʻo mānava lelei ange ʻi he falekaukaú ʻi ha toe feituʻu kehe ʻi he falé. Ko ia ne u mohe pē ʻi he falekaukaú mei Mē ki ʻAokosi. Naʻe ʻikai ke lāunga hoku fāmilí. Naʻa nau tuku ke u mohe pē ai ʻi he faʻahitaʻu māfana kotoa pē ʻi he taʻu ʻe nima.
Tā fakatātā ʻa Mark Robison
ʻI he kamataʻanga ʻo e faʻahitaʻu māfana takitaha, naʻe foaki mai ʻe heʻeku tamaí ha tāpuaki lakanga fakataulaʻeiki kiate au. Naʻá ne tāpuakiʻi au ʻi he taʻu ki he taʻu, ke mole atu hoku faingataʻaʻia fakaemoʻuí. Naʻe lotua au kotoa ʻe heʻeku faʻeé, ngaahi tuofāfiné mo e tokouá. Ka naʻe ʻikai lava ʻe he ngaahi tāpuakí mo e ngaahi lotú ʻo fakaleleiʻi vave hoku faingataʻaʻia fakaemoʻui leleí.
Naʻe akoʻi au ʻe hoku faingataʻaʻia fakaemoʻui leleí ʻaki ha ngaahi lēsoni mahuʻinga lahi lolotonga e faʻahitaʻu māfana ʻe nima ko iá. Naʻá ku ako ke fai ha ngaahi meʻa faingataʻa. Naʻá ku ako ke mālōlō koeʻuhí ke u lava ʻo fakaʻaongaʻi fakapotopoto hoku iví. Naʻá ku ako ke ʻoua te u ilifia. Fāifai, ʻi he fakaʻau ke u matuʻotuʻa angé naʻe fakaʻau ke sai ange hoku faingataʻaʻia fakaemoʻui leleí.
Ko e ʻahó ni, ʻoku ou lava ʻo ngāue mālohi ʻi ha taimi lōloa, neongo hili e helaʻia ʻa e kakai kehé. ʻOku ou kei tuku pē ha taimi ke u mālōlō ai kae lava ke u fakaʻaongaʻi fakapotopoto hoku iví. Pea ʻoku ʻikai ke u ilifia, koeʻuhí he ʻoku ou tui kia Sīsū Kalaisi.
Mahalo ʻe ngali fakaoli, ka ʻi he ʻaho ní ʻoku ou houngaʻia ʻi he meʻa ne kaunga kovi ki heʻeku moʻuí! Naʻa nau hoko ko ha tāpuaki koeʻuhí ko e ngaahi lēsoni naʻa nau akoʻi maí.