“Ang Owl ug ang Orca,” Higala, Mayo 2023, 8–9.
Ang Owl ug ang Orca
Sa unsa nga paagi nga ang mga painting ni Dieter makatabang sa uban?
Kini nga istorya nahitabo sa Canada.
Gustong maminaw ni Dieter sa kinatibuk-ang komperensiya. Naningkamot siyang magpuyo sa paglingkod. Naningkamot siyang maminaw ngadto sa mga pakigpulong. Apan ang pagkaadunay autism nakapalisod kaniya nga mo-focus. Naglihok-lihok siya diha sa sopa. Nagdula siya sa iyang mga dulaan. Nagdagan-dagan siya.
Dayon mitan-aw siya ni Papa. Hilom nga naglingkod si Papa ug naminaw ngadto sa mga mamumulong. Gusto si Dieter nga mahimong sama kaniya. Mao nga gipagawas niya ang iyang mga gamit sa art. Tingali ang pagkolor sa usa ka hulagway makapahimo kaniya nga hilom nga maglingkod.
Samtang nagkolor siya, naminaw si Dieter kang Elder Jeffrey R. Holland nga namulong. Si Elder Holland nagsugilon og istorya mahitungod ni Jesus. Si Jesus mihangyo sa usa ka dato nga batan-ong lalaki sa paghatag sa tanan sa iyang kwarta ngadto sa kabos.*
Gusto usab ni Dieter nga motabang sa mga tawo nga walay igong kwarta. Ug nakaideya siya.
“Ma, gusto kong mag-paint og owl,” miingon si Dieter. “Mahimo bang drowingan ko nimo og usa?”
“Sige ba,” miingon si Mama. Nagdrowing siya [si Mama] og owl.
Gituslob ni Dieter ang iyang paintbrush ngadto sa pipila ka pintal. Gi-paint niya og una ang mga pako sa owl. Gihimo niya nga tabonon [brown] ang ubang mga balahibo ug kahil [orange] ang ubang mga balahibo. Samtang nag-paint siya, naminaw siya ngadto sa ubang pakigpulong. Bisan nahuman na ang tanang pakigpulong, nagpadayon si Dieter. Gusto niya nga mahimong hingpit ang owl.
Sa kataposan nahuman na si Dieter. Gipakita niya ang owl ngadto ni Mama.
“Nindot kaayo kana!” Miingon si Mama. “Ibitay ba nato kini?”
Milingo-lingo si Dieter. “Gusto nakong ibaligya kini ug ihatag ang kwarta aron sa pagtabang sa mga tawo kinsa walay igong kwarta. Sama sa ilang gihisgotan sa komperensiya.”
Mipahiyom si Mama. “Atong tan-awon kon unsay atong mabuhat.”
Gi-post niya ang usa ka litrato sa painting ni Dieter aron ibaligya sa online. Gisulat ni Mama nga ihatag ni Dieter ang kwarta ngadto sa usa ka dangpanan alang sa mga tawo nga walay mga balay.
Pagkasunod adlaw, gisusi ni Dieter ug ni Mama ang post. Dili makatuo si Dieter niini! Daghan kaayong mga tawo ang gustong mopalit sa iyang hulagway. Nalipay siya nga daghan kaayong mga tawo ang gustong motabang.
Usa ka kan-anan diha sa dakbayan ni Dieter ang mihangyo sa pagpalit sa painting. Miingon sila nga mobayad sila og 10 ka pilo kay sa gipangayo ni Dieter ug ni Mama! Ubang mga tindahan ang mihangyo kaniya alang sa mga painting usab. Adunay dugang nga bulahaton nga himoon si Dieter!
Nag-trace si Mama og dugang pa nga mga hayop, ug gipagawas ni Dieter ang iyang mga pintal. Nag-paint siya og usa ka lobo, usa ka liyon, ug usa ka orca. Mas ganahan kaayo siya sa orca. Ginganlan niya kini og “Otis ang Orca.” Usa ka tindahan alang sa mga grocery duol sa iyang balay ang mipalit niini. Sa sunod higayon nga miadto si Dieter sa tindahan, nakit-an niya kini nga gibitay sa bungbong!
“Tan-awa, Ma!” Gitudlo ni Dieter and painting.
“Wow!” Miingon si Mama. “Karon bisan kanus-a nga moanhi kita dinhi, makahinumdom kita kon sa unsa nga paagi ang imong mga talento nakatabang sa mga tawo.”
Mapasigarbohon si Dieter nga ang mga tawo ganahan sa iyang mga painting. Apan mas malipayon siya nga makatabang siya sa uban. Malipayon siya nga naminaw siya atol sa kinatibuk-ang komperensiya.
Mga paghulagway pinaagi ni Natalie Campbell