“Ang Open House sa Templo,” Higala, Mayo 2023, 16–17.
Ang Open House sa Templo
Mahinamon si Svetan nga mosulod sa templo!
Kini nga istorya nahitabo sa USA.
Mibati nga mahinamon si Svetan. Ang iyang pamilya mobalhin gikan sa Argentina ngadto sa Estados Unidos. Ug karon panahon na gayod nga mosakay sa dako nga eroplano!
Mitan-aw gawas sa bentana si Svetan samtang milupad ang eroplano. Naghunahuna siya kon unsa kaha sama ang iyang bag-ong panimalay. Mahimong lahi ang tanan. Usa ka bag-ong balay. Usa ka bag-ong kwarto. Usa ka bag-ong kasilinganan. Ug bag-o nga mga higala nga himamaton! Mahinamon si Svetan.
Nasayod usab si Svetan nga ang iyang bag-o nga panimalay duol ngadto sa usa ka templo nga bag-ohay lang nga natukod. Sa Argentina, ang templo layo kaayo. Nakita lang niya kini sa mga litrato.
Si Svetan milingi ngadto ni Mami. “Sa imong hunahuna makita ba kaha nato ang templo gikan sa langit?”
Mipahiyom si Mami. “Dili tingali. Apan makita nato kini sa dili madugay.”
Mipahiyom og balik si Svetan. Miingon si Mami ug Papi nga ang templo dili pa abli. Apan sa dili madugay magkanaa og open house. Kana nagpasabot nga ang mga tawo makasulod aron makita kini sa dili pa kini ipahinungod. Ug ang pamilya ni Svetan moadto ngadto sa open house! Dili siya makahulat nga aktwal nga makita ang templo.
Paglabay sa pipila ka oras, si Svetan ug ang iyang pamilya anaa na sa ilang bag-o nga balay. Adunay daghan kaayo nga buhatonon. Mitabang si Svetan sa paghabwa sa ilang mga kahon ug sa paghimo sa ilang panimalay nga maanindot.
Sa adlaw sa dili pa ang open house, milingkod sila diha sa sala aron mag-istorya.
“Ang templo mao ang balay sa Ginoo,” miingon si Mami. “Kon kita anaa sa sulod, kinahanglan nga magbaton kita og balaan nga pagtahod. Nahibalo ka ba unsay ipasabot niana?”
“Hilom nga moistorya aron atong mas madungog ang Espiritu Santo?” Nangutana si Svetan.
“Husto kana,” miingon si Mami. “Daghan kaayo kita og makat-onan kon kita anaa diha sa templo.”
Mitando si Svetan. Gusto siya nga magbaton og balaang pagtahod aron iyang mabati ang Espiritu Santo diha sa templo.
Pagkasunod buntag, sayo nga mimata si Svetan. Nagsul-ob siya sa iyang pang-Dominggo nga sinina. Sa wala madugay panahon na nga moadto.
Naabot ang pamilya ni Svetan ngadto sa templo. Gitabangan sila sa mga tawo sa pagbutang og gagmay nga plastik nga mga hapin sa ilang mga sapatos.
“Nganong gibutang nila kining gagmay nga mga bag sa akong mga tiil, Mami?” Nangutana si Svetan.
“Tungod sulod sa templo bag-o ug limpyo ang tanan. Gusto natong atimanon kini.”
Usa ka babaye ang miabiabi kanila. Gibasa niya ang mga pulong diha sa pultahan sa templo: “Pagkabalaan ngadto sa Ginoo: ang Balay sa Ginoo.”
Gikuptan ni Svetan ang kamot ni Mami. Milakaw sila sa sulod. Matahom kaayo ang tanan! Tingali kini mao ang daw unsay mabati sa langit.
“Tan-awa!” Mihunghong si Svetan. Gitudlo niya ang usa ka painting. “Anaa ra si Jesus!”
Sa dihang nahuman na sila, mibati nga malipayon si Svetan. Mapasalamaton siya nga makasulod siya sa templo. Gusto siya nga mosulod pag-usab kon siya mas tigulang na.
Mga paghulagway pinaagi ni Mark Robison