“Managhigala sa Origami,” Higala, Mayo 2023, 30–31.
Managhigala sa Origami
Sa unsa nga paagi nga si Ari ug ang iyang mga higala makatabang ni Mrs. Franklin?
Kini nga istorya nahitabo sa USA.
“Break time!” Miingon ang magtutudlo ni Ari.
Ang mga katipon ni Ari sa klase milinya sa pagpanggawas ngadto sa nataran [playground]. Apan si Ari ug ang iyang mga higala imbis moadto sa playground moadto hinoon kanunay sa librarya. Sila ganahan nga mohulam og mga libro ug magtinabangay sa paghimo og mga papel nga pinilo [craft].
Si Kristin ug si Ella nagpaabot na dapit sa pultahan. Gikuha ni Ari ang iyang libro ug usa ka tumpi nga papel. Dayon miuna siya paingon sa hawanan.
“Ako manghinaot nga ang The Dragon Keeper’s Secret giuli na!” Miingon si Ari. “Gusto nako nga mahulaman kini sulod sa pipila ka semana.”
Sa dihang miabot na sila sa librarya, ang mga batang babaye mitimbaya ni Mrs. Franklin, ang librarian sa eskwelahan. Kanunay siyang motagad kanila nga dunay masanagon nga pahiyom. Apan karon ang iyang pahiyom dili na ingon niana ka masanagon.
Nagmug-ot si Ari samtang siya mipahimutang sa libro ibabaw sa lamesa. “Si Mrs. Franklin ba mora og nagguol sa imong paminaw?”
Gikibo lang ni Kristin ang iyang abaga. “Basin daghan lang siya og buhat.”
“Basin.” Milingkod si Ari ug mikuha og usa ka pirasong papel. Mainampingon siya nga mipilo niini, gihapsay sa iyang kumagko ang piniloan.
“Unsa ang atong himoon karon?” Nangutana si Ella.
“Ang mga Bookmark diay?” Miingon si Ari. “Sayon ra kini. Akong ipakita ninyo.”
Si Ari nagkat-on kon unsaon sa pagbuhat og origami. Mao kini ang matang sa art gikan sa Japan, gibuhat pinaagi sa pagpilo sa papel ngadto sa nagkalain-laing porma. Si Ari nasayod kon unsaon sa paghimo ang tanang matang sa porma, ug siya mitudlo sa iyang mga higala sa unsay iyang nakamaohan.
Gipakita ni Ari ngadto kang Kristin ug Ella kon giunsa paghimo ang matag pilo. Wala madugay silang tulo nakahimo na og gamay nga kwadrado nga bookmark.
“Kini ingon anion hangtod sa tumoy, sama ani.” Giabli ni Ari ang iyang libro ug gisuksok ang bookmark dapit sa ngilit sa pahina.
“Kanindot!” Mikuha og laing papel si Kristin. “Gusto nako nga masulayan kini mismo.”
Samtang nagbuhat sila, nag-istorya sila mahitungod sa mga libro nga ilang nabasa ug unsa ang gusto nilang basahon sa sunod. Mipasiplat si Ari og usab ngadto ni Mrs. Franklin. Mura og nagguol gihapon siya og gamay.
Sa wala madugay si Mrs. Franklin mihapit sa ilang lamesa.
“Kumusta, mga palangga.” Gibutang niya ang usa ka libro sa lamesa. Mao kadto ang libro nga dragon keeper! “Kini para nimo, Ari. Kahibalo ko nga nagpaabot ka aron mabasa kini.”
“Salamat!” Gipunit kini ni Ari.
Nanghupaw si Mrs. Franklin. “Gikawatan ang akong sakyanan karon. Gikuha nila ang tanan nako nga mga libro ug musika.”
“Dili kana maayo!” Miingon si Kristin.
Subo nga mipahiyom si Mrs. Franklin ngadto kanila. “Hinoon, butang ra kadto. Ang butang mahimong mapulihan. Nalipay lang ko nga walay nasakitan.”
Mitan-aw si Ari ni Mrs. Franklin nga mibiya.
“Manghinaot ko nga duna tay mahimo aron makatabang,” miingon si Ella.
Mitan-aw si Ari sa origami nga bookmark sa iyang mga kamot. “Tingali may mahimo ta!”
“Sama sa unsa?” Nangutana si Kristin.
Mingisi sa Ari. “Adtoa ko sa balay human sa eskwela. Duna koy ideya.”
Pagkasunod adlaw, si Ari, Kristin, ug Ella miadto sa librarya atol sa ilang break sama sa kanunay nilang gibuhat. Apan niining higayona, wala lang sila nagdala og libro. Aduna usab silay espesyal nga butang alang ni Mrs. Franklin.
“Gihimo namo kini para nimo!” Mihatag si Ari ni Mrs. Franklin og usa ka bag. “Kami nasayod nga dili namo mapulihan ang tanang butang nga gikawat, apan kami naghunahuna nga kini makapahimuot nimo.”
Mitan-aw si Mrs. Franklin sa sulod sa bag. Puno kini sa origami—mga bookmark, isda, mga kasingkasing, kabakaba. Dako iyang pahiyom.
“Pagkanindot ani! Salamat kaayo.” Mikuha siya og usa ka origami gikan sa bag. Nakapilo kini aron mahimong gamay nga libro. “Gamiton nako kining gamay nga journal aron isulat ang tanan nakong malipayon nga ginagmayng mahunahunaan!”
Mibalos og pahiyom sa Ari. Kanunay siya nga makahimo og butang nga nindot alang sa uban—usa ka pilo sa papel sa usa ka higayon.
Mga paghulagway ni Brian Martin