“Nabahaan sa Gugma,” Higala, Mayo 2023, 26–27.
Nabahaan sa Gugma
“Matabangan ba usab nato ang pamilya ni Jose?” Nangutana si Marius.
Kini nga istorya nahitabo sa Pilipinas.
Samtang si Marius misulod sa iyang balay, nakadungog siya og mga tawo nga nag-istoryahanay sa sulod. Milili siya sa bentana.
Kinsa kaha ang nia dinhi, naghunahuna siya. Ang iyang mama nagpuyo sa laing nasod alang sa trabaho, mao nga kasagaran siya lang ug si Lola sa panimalay.
Giablihan niya ang pultahan. Anaa didto ang tanan niyang mga higala!
“Sorpresa!” miingon sila.
“Gusto kami nga mosaulog sa imoha ug sa medalya nga imong nakuha sa imong Taekwondo nga kompetisyon,” miingon si Jose, ang labing suod nga higala ni Marius.
“Mapasigarbohon kaayo ko nimo.” Gigakos pag-ayo ni Lola si Marius. “Anaa sa telepono ang imong inahan! Segurado ko nga ganahan siyang makadungog sa tanan mahitungod sa imong medalya.”
Human nakig-istorya si Marius kang Mama, siya ug ang iyang mga higala naglingaw-lingaw sa party. Nalingaw sila sa pag-istoryahanay ug sa pagkaon sa lamian nga pagkaon ni Lola.
“Gusto kang mag-bowling uban nako ugma?” Nangutana si Jose sa wala pa siya molakaw.
“Oo!” Miingon si Marius.
Nianang gabhiona sa wala pa matulog, nag-ampo si Marius. “Langitnong Amahan, salamat Kanimo sa paghatag kanako og nindot kaayo nga mga higala ug pamilya. Palihog panalangini ang akong mama samtang tua siya sa layo. Ug palihog panalangini ko nga malingaw sa pag-bowling uban ni Jose ugma.”
Apan sa sunod adlaw, wala maka-bowling si Marius. Miabot ang usa ka dako nga unos, ug ang tanan kinahanglan nga magpabilin sa sulod. Naglingkod lang didto sa panimalay si Marius, naminaw sa ulan nga nagpangatagak sa atop. Nangandoy siya nga iyang makita si Jose.
Sulod sa tulo ka adlaw, nagsige og ulan. Ang mga kadalanan nagbaha sa tubig. Nabahaan usab ang ubang mga balay sa kasilinganan ni Marius.
Sa wala madugay nakita ni Marius si Lola nga didto sa kusina. Nagluto siya og pagkaon nga lami simhoton.
“Unsay imong giluto?” nangutana siya.
“Nagluto ko og pagkaon alang sa pipila ka pamilya sa atong ward,” miingon siya. “Nabahaan ang ilang mga balay, mao ang bishop mihangyo kanako sa pagtabang.”
Naghunahuna si Marius kang Jose. “Makaluto ba kita og pagkaon alang sa pamilya ni Jose? Tingali nagkinahanglan usab sila og tabang.”
“Nindot kaayo kana nga ideya,” miingon si Lola.
Nagluto si Marius og kan-on ug pinirito nga mga itlog alang ni Jose ug sa iyang pamilya. Dayon gitabangan niya si Lola sa pagputos sa pagkaon.
Sa kataposan ang ulan mihunong. Si Marius ug si Lola miubog ngadto sa kadalanan aron sa paghatod sa pagkaon. Ang tubig kutob sa mga tuhod ni Marius!
Nakit-an nila si Jose ug ang iyang pamilya nga nagbarog sa gawas sa ilang balay. Naghilak si Jose.
Gigakos ni Marius ang iyang higala. “Naguol ko nga nabahaan ang inyong balay,” miingon siya. “Si Jesus nahigugma kanimo. Ug kami usab.”
Magkauban si Marius ug si Jose nga mitabang sa paglimpyo sa lapokon nga mga butang sa balay ni Jose. Si Marius mikanta og “Ako Anak sa Dios” samtang sila nagtrabaho. Sa dihang mipahulay sila, si Marius mihatag ni Jose sa pagkaon nga iyang giandam alang kaniya.
“Salamat sa pagtabang sa akong pamilya,” miingon si Jose. “Ug salamat sa pagkaon! Lami kaayo kini.”
“Walay sapayan,” miingon si Marius.
“Mahimo ba nga ikaw makasulti kanako og dugang mahitungod ni Jesus? Ug sa awit nga imong gikanta?” mihangyo si Jose.
“Sige ba!” Miingon si Marius. “Ganahan ka ba nga mokuyog kanako sa simbahan karong Dominggo? Mao kana ang dapit diin nagkat-on ko mahitungod ni Jesus. Ug kita mahimong magkauban nga manganta usab.”
“OK,” miingon si Jose.
Si Marius mibati og kainit sa sulod. Malipayon siya nga nakatabang siya ni Jose ug sa iyang pamilya. Ug malipayon siya nga makapaambit usab sa ebanghelyo.
Mga paghulagway pinaagi ni Jamie Bauza