“Cameron ang Tigtugtog sa Piano,” Higala, Mayo 2023, 40–41.
Cameron ang Tigtugtog sa Piano
Si Cameron wala masayod kon unsaon sa pagtugtog, apan gusto siya nga motabang.
Kini nga istorya nahitabo sa USA.
“Ako anak sa Dios,” Si Cameron mikanta dungan sa ubang mga bata sa Primary. Si Cameron may kalisod sa pagdungog, apan ganahan siyang mokanta. Ug sa dili madugay manganta sila diha sa programa sa Primary. Usa nalang ka bulan!
Sa dihang nahuman ang panahon sa pagpanganta, si Sister Jones naghimo og usa ka pahibalo. “Ang atong pianista mobalhin na sa dili madugay. Ganahan mi nga aduna kaninyoy motugtog sa piano alang sa programa sa Primary. Aduna ba ninyo ang gustong motugtog og usa ka awit o duha?”
Miisa si Cameron sa iyang kamot. Gusto siya nga motabang sa programa.
Si Sister Jones misulat sa mga ngalan sa mga bata kinsa gusto nga motabang. “Si Emma. Ben. Ug si Cameron! “Wala ko kahibalo nga makatugtog diay ka.” Mipahiyom siya.
Si Cameron wala gayod mokuha og mga leksiyon kaniadto, apan siya gusto nga maghimo og mga kanta sa piano didto sa balay sa iyang lola.
“Dili pa kaayo ko maayo,” miingon siya. “Apan tingali makahimo ko niini kon magpraktis ko!”
“Salamat sa kaandam nga moserbisyo,” miingon si Sister Jones. Gihatagan niya ang matag usa ka bata og duha ka awit nga tugtugon.
Mibati si Cameron nga mura og nagdagan paingon sa hawanan. Ganahan gayod siya kanunay nga makakat-on, ug karon mao na kini!
“Mahinamon ka nga tan-awon! Aduna bay nahitabo sa Primary?” Si mama nangutana sa dihang misulod sila sa sakyanan human sa simbahan.
Mingisi sa Cameron. “Motugtog ko sa piano alang sa programa sa Primary!”
“Nalipay ko nga gusto kang motabang,” miingon si Mama. “Apan dili ka pa kaayo makamao unsaon pagtugtog ang piano aron mahimo kana.”
Milingkod og tarong si Cameron. “Makakat-on ra ko. Magpraktis ko og maayo! Magamit nako ang piano ni Lola.”
“Mas maayo nga atoa nang sugdan, dayon!” Miingon si Mama.
Si mama mitabang ni Cameron sa pagpangita og usa ka magtutudlo sa piano. Ang magtutudlo mipakita kaniya og yano nga pamaagi sa pagtugtog sa “Gusto Ko nga Makita ang Templo” ug sa “Ang Simbahan ni Jesukristo.”
Nagpraktis si Cameron kanunay kutob sa iyang mahimo didto sa balay ni Lola. Gipraktisan niya ang matag linya sa mga awit og balik-balik. Nasayop siya og kadaghan, apan nagpadayon siya sa pagpaningkamot ug nagpadayon sa pagtugtog. Sa kataposan makatugtog na siya sa duha ka awit.
Sa wala madugay panahon na alang sa programa sa Primary. “Unsay imong gibati?” Nangutana si Mama.
Gigakos ni Cameron ang iyang piano book duol sa iyang dughan. “Gikulbaan. Apan mahinamon usab.”
Sa dihang iyaha nang turno nga motugtog, ang kamot ni Cameron mikurog og gamay. Langitnong Amahan, palihog tabangi ko, siya nag-ampo diha sa iyang hunahuna. Miginhawa siya og lawom. Dayon siya mitugtog sa iyang labing maayo. Ang uban nga mga bata miduyog sa pagkanta.
Sa kataposan sa awit, mipahiyom siya. Makalingaw kadto! Nasayod siya nga ang Espiritu Santo nagtabang kaniya.
Karon nga Siya nakatugtog na og usa ka awit. Si Cameron mibati na nga mas masaligon. Dayon siya misugod sa ikaduha nga awit. Ang iyang mga tudlo mibalhin-balhin latas sa mga tekla [key] sama sa iyang gipraktis.
Kini nga awit mao ang paborito ni Cameron. Gihunahuna niya ang mga pulong samtang siya nagtugtog. “Ako motuo ni Jesukristo. Siya tahuron.” Si Cameron naningkamot og maayo aron makat-on sa mga awit alang sa programa.
Tingali ang pagtugtog sa piano mao ang usa ka paagi sa pagpaambit sa akong pagpamatuod, naghunahuna si Cameron.
Human sa programa, gigakos og maayo ni Mama si Cameron.
“Kumusta man to?” nangutana siya.
“Gikulbaan ko sa sinugdanan, apan makalingaw kadto!” Miingon si Cameron. Gusto siya nga magpadayon og praktis ug makakat-on og dugang pang mga awit.
Mga paghulagway pinaagi ni Adam Koford