“Ang Milagro ni Jimena didto sa Templo,” Higala, Mayo 2023, 36–37.
Ang Milagro ni Jimena didto sa Templo
Gikulbaan si Jimena. Apan nasayod siya nga ang Ginoo motabang kaniya.
Kini nga istorya nahitabo sa Guatemala.
Misakay si Jimena sa sakyanan ug gitaod ang iyang seat belt. Siya ug ang iyang mga ginikanan nagpadulong ngadto sa templo. Kini mao ang iyang unang higayon sa pagbuhat og mga bunyag sa templo. Si Papi ang mobunyag niya alang sa pipila sa ilang mga katigulangan. Dili makahulat si Jimena!
Apan dayon nakahunahuna og usa ka butang si Jimena nga nakapatarantar kaniya. “Papi,” miingon siya, “unsaon man ang akong pump?”
Si Jimena adunay type 1 nga diabetes. Aron magpabilin nga himsog, kanunay siyang nagsul-ob og gamay nga device nga gitawag og insulin pump aron motabang sa pagkontrolar sa lebel sa sugar sa iyang dugo. Kon dili siya magsul-ob niini sulod sa taas kaayo nga panahon, masakit siya.
“Tugotan ba nila ako nga sul-obon kini sulod sa templo?” Nangutana si Jimena. Ang iyang kasingkasing nagpitik og kusog. “Unsaon man kon moadto nako sa tubig?”
“OK ra na,” miingon si Papi. “Mahimo nimong isul-ob ang imong pump hangtod nga moadto ka sa tubig. Dayon tabangan ka ni Mamá sa pagsul-ob niini og balik inig haw-as nimo.”
Mitando si Mamá. “Ug kon magsugod og lain ang imong lawas samtang nagbuhat ka sa mga bunyag, sultihi lang si Papi ug mahimo kang mohunong.” Gigunitan og maayo ni Mamá ang iyang kamot. “Ubanan ka namo sa tibuok panahon.”
“OK,” miingon si Jimena. Gikulbaan pa gihapon siya. Apan si Mamá ug Papi mitabang kaniya nga moarang-arang ang pamati.
Sa dihang miabot sila, gigunitan ni Jimena ang mga kamot ni Mamá ug Papi samtang naglakaw sila paingon ngadto sa mga pultahan sa templo. Sa dihang mitikang na siya pasulod, mibati si Jimena og mainiton, makapahupay nga pamati. Nasayod siya nga ang Espiritu Santo nagsulti kaniya nga ang Langitnong Amahan motabang kaniya, bisan og gikulbaan siya. Ma-OK ra ang tanan, sama sa gisulti ni Papi.
Nag-ilis si Jimena og puti nga mga sinina. Dayon gitabangan ni Mamá si Jimena sa pagtangtang sa iyang pump. “Sa pipila lang kini ka minuto,” miingon si Mamá. Gigakos niya si Jimena.
Miubog si Jimena ngadto sa tubig. Nagpaabot si Papi kaniya. Gituyhad niya [ni Papi] ang iyang kamot ug gitabangan siya sa pagkanaog sa mga hagdan.
Misulti si Papi og pag-ampo sa bunyag ug gipaunlod si Jimena ilawom sa tubig. Sa paghaw-as niya, mipahiyom si Jimena. Dayon mipahigayon pa sila og pipila ka dugang nga mga bunyag.
“OK ra ba ang imong pamati?” Mihunghong si Papi sa iyang dalunggan.
“Oo!” miingon si Jimena.
Si Papi mibunyag kaniya sa pipila pa ka dugang nga mga tawo. “Makabuhat pa ba ka og dugang?” nangutana siya pag-usab.
“Oo!” miingon si Jimena.
Human sa kataposang bunyag, gitabangan ni Mamá si Jimena sa pagtaod sa iyang pump ug gisusi ang sugar sa dugo ni Jimena. Mipahiyom si Mamá. Normal ra! Kadto ingon og wala ra gayod tangtanga ni Jimena ang iyang pump.
Sunod miadto sila ngadto sa usa ka mas gamay nga lawak. Gibutang ni Papi ang iyang mga kamot sa ulo ni Jimena. Siya mikompirmar kaniya nga usa ka miyembro sa Ang Simbahan ni Jesukristo sa mga Santos sa Ulahing mga Adlaw alang sa mga tawo nga patay na diin siya gibunyagan alang kanila. Karon ang iyang mga katigulangan mahimong mopili nga magpasakop sa Simbahan ni Jesukristo!
Sa home evening pagkasunod semana, si Jimena ug ang iyang mga ginikanan naghisgot mahitungod sa ilang temple trip. “Ang templo mao ang balay sa Ginoo,” miingon si Papi. “Kon kita moadto, makabaton kita og mga milagro sa atong mga kinabuhi.”
“Unsa nga matang sa mga milagro?” nangutana ang manghod nga lalaki ni Jimena, si Pablo.
“Gikulbaan ko nga tangtangon ang akong insulin pump aron moubog ngadto sa tubig,” miingon si Jimena. “Apan sa dihang nagbuhat ko og mga bunyag, wala gani ko mibati nga naglain ang lawas. Usa kadto ka milagro!” Mipahiyom si Jimena. “Ug bisan og nahadlok ko, ang Espiritu Santo mitabang kanako nga mobati nga kalma. Usa usab kadto ka milagro.”
Mga paghulagway pinaagi ni Alyssa Petersen