“Ko ha Ngāue Siʻisiʻi mo ha Ngaahi Tāpuaki Lalahi,” Ko e Kaumeʻá, Sune 2023, 2–3.
Mei he Kau Palesitenisī ʻUluakí
Ko ha Ngāue Siʻisiʻi mo ha Ngaahi Tāpuaki Lalahi
Mei he “Always Have His Spirit,” Ensign, Nōvema 1996, 59–61.
ʻI he taimi ʻoku tau papitaiso aí, ʻoku tau fakahaaʻi ai ʻoku tau loto-fiemālie ke toʻo kiate kitautolu ʻa e huafa ʻo Sīsū Kalaisí. ʻOku tau palōmesi foki ke fai ʻEne ngāué mo tauhi ʻEne ngaahi fekaú. Pea ʻoku hilifaki leva ʻe he kau maʻu lakanga fakataulaʻeikí honau nimá ʻi hotau ʻulú ke tāpuakiʻi kitautolu ʻaki e meʻafoaki ʻo e Laumālie Māʻoniʻoní.
Ko e taimi kotoa pē ʻoku tau maʻu ai e sākalamēnití, ʻoku tau fakafoʻou ʻetau ngaahi palōmesi ʻi he papitaisó. ʻOku tau teuteu, ʻaki ʻetau fakatomala mei he ngaahi fehalaaki kuo tau faí. ʻOku tau fakakaukau kia Sīsū Kalaisi. Pea ʻoku tau palōmesi ke manatuʻi Ia.
ʻI heʻetau fai e ngaahi meʻá ni, ʻoku fakamolemoleʻi kitautolu ʻe he ʻEikí. ʻOkú Ne palōmesi mai foki ko e taimi ʻoku tau tauhi ai ʻEne ngaahi fekaú, ʻe lava ke tau maʻu maʻu pē ʻa e Laumālie Māʻoniʻoní. Ko e Laumālie Māʻoniʻoní ʻa hotau fakafiemālié, fetuʻutakiʻangá, mo hotau fakahinohino ke foki ki he Tamai Hēvaní.
ʻE lava ke hangē ʻa e sākalamēnití ha kiʻi ngāue siʻisiʻí. Ka ʻokú ne ʻomi kiate kitautolu ha ngaahi tāpuaki lahi. ʻOku ou lotua te tau lava ʻo maʻu maʻu pē ʻa e ngaahi tāpuaki ko ʻení.
Ngaahi Tali ki he Sākalamēnití
Kuó ke fakafanongo lelei nai ki hono tāpuakiʻi ʻo e sākalamēnití? Fakatauhoa e ngaahi fehuʻi mo e tali ʻi laló. (Te ke lava ʻo lau e ongo lotu tāpuakiʻí ʻi he Tokāteline mo e Ngaahi Fuakava 20:77, 79.)
-
Ko e hā ʻoku tau manatuʻí?
-
Ko e hā ʻoku tau palōmesi ke faí?
-
Ko e hā ha ngaahi tāpuaki ʻoku palōmesi mai ʻe he ʻEikí kiate kitautolu?
-
Ko e sino mo e taʻataʻa ʻo e Fakamoʻuí
-
Ke ʻiate kitautolu maʻu ai pē ʻa Hono Laumālié
-
Ke toʻo kiate kitautolu e huafa ʻo Sīsuú, manatu maʻu ai pē kiate Ia, mo tauhi ʻEne ngaahi fekaú
Toʻohema: tā fakatātāʻi ʻe Apryl Stott; toʻomataʻu: tā fakatātāʻi ʻe Beth Whittaker