“Ko e Uepisaiti Koví,” Ko e Kaumeʻá, Sune 2023, 40–41.
Ma‘á e Fānau Lalahi Angé
Ko e Uepisaiti Koví
Naʻe ilifia ʻa Kēvini ke talanoa kia Mami.
Naʻe hoko ʻa e talanoa ko ʻení ʻi he ʻIunaiteti Siteiti ʻo ʻAmeliká.
Naʻe tafoki hake ʻa Kēvini ʻi he sea ʻo e komipiutá. Naʻá ne lomi ha ʻū kī kehekehe ʻi he kīpōtí.
Naʻá ne ui mai, “Mami, kuo taimi nai ke u vaʻinga ʻi he keimi lová?”
Naʻe sio mai ʻa Mami mei peito. “ʻI he ʻosi hoʻo homueká.”
Naʻe māpuhoi ʻa Kēvini. ʻE anga fēfē haʻane tokanga ki he homueká? Naʻá ne fuʻu ofi ʻaupito ke ikunaʻi e lēvolo hoko ʻo ʻene vaʻinga manako ʻi he komipiutá. Pea ko hono moʻoní ko ʻene homueká, ʻoku taʻeoli.
Naʻá ne pehē te ne lava pē ʻo kamataʻi ia. Naʻá ne hū ki ha uepisaiti. Naʻe ʻikai ke ngali fakalata ia hangē ko e keimi lová.
Naʻe sio ʻa Kēvini ki ha fehokotakiʻanga. Naʻá ne lomiʻi ia. Naʻe ʻave ia ʻe he fehokotakiʻangá ki ha uepisaiti ʻoku ʻi ai ha ʻū tā ʻo ha kakai ne ʻikai ke nau tui ha vala.
Naʻá ne fakakaukau, ʻoku kovi ʻeni. ʻOku totonu ke u mavahe mei ai. Naʻe sio ʻa Kēvini ki mui. Naʻe ʻikai ha taha ʻe sio mai. Naʻá ne toe sio ki ha ʻū fakatātā. Naʻá ne fieʻilo pē.
Naʻe kamata ke ongoʻi ʻe Kēvini ʻoku kiʻi taʻefiemālie. Naʻá ne tāpuniʻi fakavave ʻa e uepisaití. Naʻá ne feinga ke foki ki heʻene homueká. Naʻá ne fakakaukau, ʻOku sai pē ia. Ko ha ʻū tā pē ʻe niʻihi ne u sio aí. Ka naʻe ʻikai mole ai ʻa e ongoʻi taʻefiemālié.
Naʻe ongoʻi ʻe Kēvini ʻoku totonu ke ne talanoa kia Mami fekauʻaki mo e uepisaití. Ka naʻá ne ilifia. Fēfē kapau ʻe ʻita ia?
ʻI he pō ko iá, hili e maʻu meʻatokoni efiafí, ne tokoni ʻa Kēvini kia Mami ke fufulu e peletí.
“ʻOkú ke ongoʻi sai pē?” Ko e fehuʻi ange ia ʻa Mamí.
Naʻe talaange ʻe Kēvini, “ʻIo.”
Ka naʻe ʻikai ke ne ongoʻi sai. Naʻá ne ongoʻi hangē ka ne tangí. Naʻe toe foki mai ʻene ongoʻi ʻoku totonu ke ne tala kia Mamí. Ka naʻe kei ilifia pē ʻa Kēvini.
Naʻá ne lotu fakalongolongo, Tamai Hēvani, tokoniʻi ange muʻa au. Naʻá ne kiʻi ongoʻi fiemālie ange.
“ʻE lava nai ke ta talanoa?” Ko e fehuʻi ange ia ʻa Kēviní.
Naʻe pehē ange ʻe Mami, “ʻIo. Ko e hā e meʻa ʻokú ke fie talanoa ki aí?”
Naʻe sio ʻa Kēvini ki he falikí. Naʻe ʻikai ke ne fakapapauʻi pe te ne kamata fēfē. “ʻI he taimi naʻá ku fai ai ʻeku homueká, naʻá ku sio ki ha saiti ne ʻi ai ha ʻū fakatātā ʻo ha kakai ʻoku ʻikai hanau vala. Naʻá ku fieʻilo pē. Ka ko ʻeni, ʻoku ʻikai ke u lava ʻo fakangaloki e meʻa ne u sio ki aí.”
Naʻe talaange ʻe Mami, “ʻOku ou fiefia ʻi hoʻo talamai kiate aú.” Naʻá ne fāʻofua kia Kēvini. “Ko ha meʻa angamaheni pē ʻa e fieʻiló ia. ʻOkú ke ʻiloʻi ʻoku kovi ʻa e ngaahi meʻa ko iá, pea ʻoku ʻikai totonu ke ke sio ai. Ka ko e meʻa ʻoku sai aí ko hoʻo faitotonú. Te ke ongoʻi fiemālie ange he taimí ni koeʻuhí kuó ke tala mai kiate au.”
“ʻOku ʻikai ke ke ʻita koe?” Ko e fehuʻi ange ia ʻa Kēviní.
Ne talaange ʻe Mami, “ʻIkai. ʻOku ou ʻofa ʻiate koe. ʻOku ou fie tokoniʻi koe. Pea ʻoku pehē pē mo e Tamai Hēvaní. ʻOkú Ne lava maʻu pē ke tokoniʻi koe ke ke fakaleleiʻi ha ngaahi meʻa.”
Naʻe puli atu e ongoʻi taʻefiemālie ʻa Kēviní.
Naʻá ne talaange, “Naʻá ku manavasiʻi ke u tala atu. Ka naʻá ku ongoʻi fiemālie ange hili ʻeku fai ha lotú.”
“ʻOku hangē ne tokoniʻi koe ʻe he Laumālie Māʻoniʻoní ke ke loto-toʻá!” Ko Mami ange ia.
Naʻe ongoʻi nonga mo fiemālie ʻa Kēvini ʻi he taimi naʻá ne lotu aí. Ka ʻi he kimuʻa peá ne lotú, naʻá ne ongoʻi hangē naʻe fiemaʻu ke ne talanoa mo Mamí.
Naʻe talaange ʻe Kēvini, “ʻOku ou tui naʻe tokoniʻi au ʻe he Laumālie Māʻoniʻoní ʻi he taimi kotoa pē. Naʻá Ne talamai kiate au ʻoku kovi ʻa e ʻū fakatātaá. Pea naʻá Ne talamai ʻoku fiemaʻu ke u tala atu e meʻa naʻe hokó.”
Naʻe pehē ange ʻe he Fineʻeikí, “ʻOku ou ʻi heni maʻu pē kapau ʻokú ke fie talanoa ki he ngaahi meʻa pehení. He ʻikai ke u ʻita ai. Ta ngāue fakataha ke faʻu ha palani malu ʻi he komipiutá.”
Naʻe malimali ʻa Kēvini. “Ko ha fakakaukau lelei ia kiate au.”
Tā Fakatātā ʻa Laura Catrinella