Tā Valivali Māsimá

Ta fakatātaaʻi ʻe Thomas S. Child

Naʻe folofola ʻa Sīsū Kalaisi ki Heʻene kau ākongá, “Ko e māsima ʻo māmani ʻa kimoutolu” (Mātiu 5:13). Ko e māsimá ko ha meʻa angamaheni pē ia ʻe lava ke fakaʻaongaʻi ki ha ngaahi meʻa lahi ʻoku fakaofo. Faʻu ʻa e tā valivali ko ʻení pea fakakaukau ki ha niʻihi ʻo e ngaahi meʻa fakaofo te ke lava ʻo fai ʻi he tokoni ʻa e ʻOtuá!

Fakaʻaongaʻi ʻa e kuluú ʻi ha laʻipepa ke tā ai ha fakatātā. Te ke lava ʻo tā ha meʻa pē ʻokú ke saiʻia ai!
Lingi ʻa e māsimá ki he laʻipepá. Feinga ke maʻu ha māsima lahi ke pipiki ki he kuluú ʻi he lahi taha ʻe malavá. Lulululuʻi ʻa e toenga māsimá ki ha poulu.
Toe ʻai pē ʻa e sitepu 2 kae ʻoua kuo ʻufiʻufi kakato ʻe he māsimá ʻa e kuluú.
Unu ʻa e polosi valí ki he vali vaí pea ʻai ʻa e polosí ke pā maʻamaʻa ki hoʻo fakatātā māsimá. ʻOku totonu ke mafola ʻa e lanú ʻi he māsimá. (Ko e lahi ange ʻa e vai ʻi hoʻo valí, ko e lelei ange ia e mafola ʻa e lanú.)
Tuku ke mōmoa hoʻo valivalí ʻi he poó kakato.