“Ko e Tā Fakatātā mo Kalisitiané,” Ko e Kaumeʻá, Sune 2023, 30–31.
Ko e Tā Fakatātā mo Kalisitiané
Mahalo naʻa lava ʻa Kepueli ʻo tokoni kia Kalisitiane he taimí ni.
Naʻe hoko ʻa e talanoa ko ʻení ʻi Palāsila.
Naʻe pehē ʻe he pīsopé, “ʻE lea atu he taimí ni ʻa Sisitā ʻAlameita.”
Naʻe toʻo hake ʻe Kepueli ha laʻipepa mo ha ʻū penivahevahe. Naʻá ne saiʻia ke tā fakatātā lolotonga ʻene fanongo ki he ngaahi leá. Naʻe pehē foki mo hono tuofefine ko ʻĀlisí.
ʻI he taimi ko ʻení naʻe tā ʻe ʻĀlisi ha laione. Naʻe tā ʻe Kepueli ha tainasoa. Naʻá ne tā hano kia lōloa mo ha hiku.
Ne hanga hake leva ʻa Kepueli. Naʻe lue hangatonu mai ha kiʻi tamasiʻi kiate kinaua.
Naʻá ne fanafana ange kia ʻĀlisi, “ʻOiauē! Ko Kalisitiane ʻeni.”
Naʻe taʻu fā ʻa Kalisitiane. Naʻe ʻikai ke ne lava ʻo lea, pea naʻe ʻikai ke ne tangutu maʻu. Naʻá ne lue takai he falelotú lolotonga e ngaahi houalotú. Taimi ʻe niʻihi naʻá ne tā kohikohi ʻi he ʻū fakatātā ʻa Kepuelí.
Naʻe fufuuʻi ʻe Kepueli ʻene ʻū penivahevahé ʻi mui ʻi hono tuʻá. Naʻe ʻikai ke ne loto ke maʻu ia ʻe Kalisitiane.
Naʻe ala atu ʻa Kalisitiane ki he ʻū penivahevahé.
“ʻIkai! Ko e meʻa ia ʻaʻaku!” Ko e fanafana ange ia ʻa Kepuelí, mo tuhu ki he fāmili ʻo Kalisitiané. “ʻAlu ʻo tangutu ki lalo.”
Ka naʻe hangē naʻe ʻikai mahino ia kia Kalisitiané. Naʻá ne kei feinga pē ki he penivahevahe ʻa Kepuelí.
ʻI he tuku ʻa e houalotú, naʻe lue ʻa Kepueli mo Mami mo ʻĀlisi ki he Palaimelí.
“Ko e hā ʻoku lava ai pē ʻa Kalisitiane ia ʻo lue holo he falelotú kae pau ke u fakalongolongo au iá?” Ko e fehuʻi ange ia ʻa Kepueli kia Mamí.
Naʻe pehē ange ʻe Mami, “ʻOku kehe ʻa e founga fakakaukau ia ʻa Kalisitiané. ʻOku tokoni ʻa e lue holó ke ne ongoʻi nonga mo fiemālie ai.”
Naʻe pehē ange ʻe Kepueli, “Ka ʻokú ne faʻa hohaʻasi maʻu pē kitautolu.”
Naʻe fakafulofula ʻa ʻĀlisi. “Ko ʻene fie tā valivali pē ʻaʻana.”
“Ka ʻoku ʻikai poto ia ai!”
Naʻe talaange ʻe ʻĀlisi, “Mahalo pē ʻe lava ke ta tokoniʻi ia.”
ʻI he Sāpate hono hokó, naʻe tangutu ʻa Kepueli ʻi he tafaʻaki ʻo ʻĀlisí lolotonga e houalotu sākalamēnití. Hili hono paasi ʻo e maá mo e vaí, naʻá ne toʻo hake ʻene penivalivalí mo e pepá ke tā fakatātā. Naʻá ne sio atu leva ki he lue mai ʻa Kalisitiane kia kinauá.
Naʻe kamata ke fufuuʻi ʻe Kepueli ʻene ʻū penivalivalí, ka naʻá ne kiʻi taimi ai. Naʻe fofonga malimali ʻa Kalisitiane. Naʻe manatuʻi ʻe Kepueli ʻa e meʻa naʻe talaange ʻe ʻĀlisí. Mahalo ʻe lava ke ne tokoniʻi ʻa Kalisitiane ke tā fakatātā!
Naʻe malimali ʻa Kepueli kia Kalisitiane. Naʻá ne ʻunu kae lava ke haʻu ʻa Kalisitiane ʻo tangutu ʻi hono vahaʻa mo ʻĀlisí. Naʻe ʻoange ʻe Kepueli ha penivahevahe mo ha pepa kia Kalisitiane. Naʻe tokoni ʻa ʻĀlisi kia Kalisitiane ke ne pukepuke ʻa e penivahevahé. Naʻa nau tā fakataha ha fakatātā ʻo ha fanga kiʻi siana.
Naʻe kata ʻa Kalisitiane mo pasi hono nimá. Naʻá ne mata fiefia. Naʻe fiefia foki mo Kepueli. ʻI he taimi ko ʻení, naʻe tokoni ʻa Kepueli kia Kalisitiane ke ne puke ʻa e penivahevahé. Naʻá na tā fakataha ha kulī. Naʻe mamali ʻa Kepueli. Naʻe fakalata ʻa e tā fakatātā mo Kalisitiané.
ʻI he tuku ʻa e houalotú, naʻe ʻi ai ha fokotuʻuna fakatātā ʻa Kalisitiane. Naʻá ne kuku ʻa e ʻū fakatātaá mo tuhu ki he sea hono fāmilí. Naʻe taki ʻe Kepueli mo ʻĀlisi ʻa Kalisitiane ki hono fāmilí. Naʻe fakaʻaliʻali ange ʻe Kalisitiane ʻa e ʻū fakatātaá ki heʻene faʻeé mo malimali pē.
Naʻe fiefia ʻa Kepueli ʻi heʻene lava ʻo tā fakatātā mo Kalisitiané. Pea naʻá ne fiefia ʻi heʻene maʻu ha tuofefine naʻe hoko ko ha faʻifaʻitakiʻanga lelei.
Tā Fakatātā ʻa Josh Talbot