“Ko ha Kiʻi Konga Mā Siʻisiʻi,” Ko e Kaumeʻá, Sune 2023, 4–5.
Ko ha Kiʻi Konga Mā Siʻisiʻi
Naʻe ʻikai ha meʻa ʻi he laulau sākalamēnití!
Naʻe hoko ʻa e talanoa ko ʻení ʻi Kuatemala.
“ʻOku ou fiefia lahi ke u ʻalu ki he lotú ʻi he falelotú!” Ko e lea ange ia ʻa ʻAnaheá ʻi he maʻu meʻatokoni pongipongí.
Koeʻuhí ko e mahaki fakaʻauha COVID-19, naʻe ʻikai lava ai ke ʻalu ʻa ʻAnahea mo hono fāmilí ki he lotú ʻi ha meimei taʻu ʻe ua. Ka ʻi he ʻaho ní te nau lava ʻo aʻu ki ai! Naʻe fiefia ʻa ʻAnahea ke sio ki hono ngaahi kaungāmeʻá pea maʻu sākalamēniti fakataha foki mo honau uōtí.
Naʻe tangutu fakataha ʻa ʻAnahea mo hono fāmilí ʻi he falelotú. Naʻe taʻataʻalo ʻa ʻAnahea ki hono ngaahi kaungāmeʻá.
Naʻe vave ke hokosia e taimi sākalamēnití. Hili e himí, ne kūnima ʻa ʻAnahea pea punou hono ʻulú. Naʻá ne fakafanongo ki he lotu tāpuakiʻi ʻo e sākalamēnití. Naʻá ne sio leva ki ha kiʻi fakatātā ʻo Sīsū. Naʻe tokoni ia ke ne manatuʻi ke ʻapasia.
Naʻe ʻomi ʻe ha talavou ʻa e laulaú ki honau ʻotú. Ka ʻi he aʻu ʻa e laulaú kia ʻAnaheá, naʻe ʻosi ia!
Naʻe toe sio fakalelei atu ʻa ʻAnahea. ʻI he tuliki ʻo e laulaú, ne ʻi ai ha kiʻi meʻi mā ʻe taha ne toe. Naʻá ne toʻo hake ia ʻo ʻai ki hono ngutú.
‘I he toenga ʻo e ‘ahó, naʻe loto-moʻua ʻa ʻAnahea. Naʻá ne toutou fakakaukau pē ki he kiʻi meʻi konga mā siʻisiʻí. Naʻá ne loto-moʻua lolotonga e maʻumeʻatokoni efiafí. Naʻe ʻikai foki ke ne kai ʻene ʻaisikilimí ʻi he hikinga uá. Naʻá ne tangutu pē ʻi he tēpilé kae fufulu peleti ʻa Mami.
Naʻá ne fakakaukau, ʻOku ʻaonga nai e sākalamēnití kapau ne u toʻo pē ha meʻi momoʻi mā?
Naʻe holoholo ʻe Mami hono nimá ʻi ha taueli. “ʻOku ʻi ai ha meʻa ʻe hoko, siʻeku pele?”
Naʻe kalokalo ʻa ʻAnahea.
“ʻOku talamai ʻe he vaia ho ʻaisikilimí, ʻoku ʻi ai e meʻa ʻokú ke hohaʻa ki ai.” Naʻe malimali pē ʻa Mami mo tangutu hifo he tafaʻaki ʻo ʻAnaheá. “Ko e hā e meʻa ʻoku hokó?”
Naʻe loʻimataʻia e fofonga ʻo ʻAnaheá. “Naʻá ku vēkeveke ke maʻu e sākalamēnití he ʻahó ni. Ka ʻi he aʻu mai e laulaú kiate aú, ko ha meʻi momoʻi mā pē ne toé.” Naʻá ne mānava lōloa. “Naʻe hala nai ʻeku maʻu e sākalamēnití?”
Naʻe pehē ange ʻe Mami, “ʻIkai.” Naʻá ne fāʻofua kia ʻAnahea. “Naʻá ku sio atu ki hoʻo sio ki he kiʻi laʻitā ʻo Sīsū ʻoku faʻo ʻi hoʻo folofolá. Ko e hā e meʻa naʻá ke fakakaukau ki aí?”
“Naʻá ku fakakaukau ki he anga e ʻofa ʻa Sīsū ʻiate aú. Pea mo e ngaahi fakaʻilonga ʻo e faʻó ʻi Hono ongo nimá mo e vaʻé. Mo e meʻa kotoa naʻá Ne fai maʻatautolú.”
“Ke sio ki ai?” Ko e fehuʻi ia ʻa Mamí. “Ko e ʻuhinga ia ʻoku tau maʻu ai e maá mo e vaí. Ke manatua e feilaulau ne fai ʻe Sīsū maʻatautolú.”
“ʻA ia ʻoku ʻikai mahuʻinga e lahi ia ʻo e meʻi maá?”
“ʻIkai. Ko e meʻa ʻoku mahuʻingá, ko hoʻo ongo ʻi hoʻo manatua e Fakamoʻuí,” ko Mami ange ia. “Pea neongo naʻá ke maʻu pē ha kiʻi meʻi mā siʻisiʻi, ʻoku ʻikai siʻisiʻi ai e ʻofa ʻa Sīsū kiate koé. ʻOkú Ne ʻofa lahi ʻaupito ʻiate koe.”
Naʻe malimali ʻa ʻAnahea. Naʻá ne ʻiloʻi naʻe moʻoni ʻa Mami. ʻE lava ke hoko maʻu pē ʻa e sākalamēnití ko ha taimi makehe ke manatuʻi ai ʻa Sīsū—ʻo tatau ai pē pe ko ha kiʻi konga mā siʻisiʻi pē.
Tā fakatātā ʻa Jennifer Bricking