“ʻOku ʻIkai Tonu!” Ko e Kaumeʻá, Sune 2023, 20–21.
ʻOku ʻIkai Tonu!
Ko e hā e ʻuhinga ne tokoni toko taha ai pē ʻa ʻIfalemí?
Naʻe hoko e talanoa ko ʻení ʻi Naisīlia.
Naʻe lele ʻa ʻIfalemi ʻi he vave taha naʻá ne lavá. Naʻe tā vave hono mafú. Ne mapuna ʻa e efú ʻi heʻene foʻi manga kotoa pē. Naʻe mafao atu hono nimá. Naʻá ne fuʻu ofi ʻaupito!
“Mate koe!” Ko e lea ia ʻa ʻIfalemí ʻi heʻene ala ki he uma ʻa hono tokoua ko ʻUkená.
“ʻIfalemi! ʻUkená!” Ko e ui mai ʻa Mami mei falé. “Kuo taimi ke mo foki mai. ʻOku kei lahi pē ngāue ke tau faí.”
Naʻe pehē ange ʻe ʻIfalemi, “ʻIo, Mami.” Naʻá na hū mo ʻUkena ki loto.
Ko e ʻaho ní, ko e fakamanatua ia e ʻaho fāʻeleʻi hona tuofefine siʻisiʻi ko Soaná. ʻE omi ha kau fakaafe ki he maʻu meʻatokoni efiafi ʻi hono ʻaho fāʻeleʻí. Naʻe lahi e meʻa ke faí.
Naʻe tokoni ʻa ʻIfalemi kia Mami ke ngaohi e foʻi keke ki he fakamanatua e ʻaho fāʻeleʻi ʻo Soaná. Naʻá ne saiʻia ke tokoni kia Mami ʻi he feimeʻatokoní. Tautautefito ki he taimi naʻá na ngaohi ai ha foʻi keké.
Naʻe sio atu ʻa ʻIfalemi ki hono tokouá mo e tuofefiné. Naʻe ngāue mālohi ʻa ʻUkena ke fakamaau e falé. Ka naʻe ʻikai teitei tokoni ʻa Soana ia. Naʻá ne lautohi pē.
“Ko e hā e ʻuhinga ʻoku ʻikai tokoni ai ʻa Soaná?” Ko e fehuʻi ia ʻa ʻIfalemí lolotonga ʻene tā e mahoaʻa ʻo e foʻi keké.
Naʻe pehē ange ʻe Mami, “Ko hono ʻaho fāʻeleʻí eni. ʻOku tau fai kotoa ʻene ngāué maʻana.”
“Ka ʻoku ʻikai totonu ia! He ʻikai tokoni mai ʻa Soana ia kapau ne ko hoku ʻaho fāʻeleʻí eni.” Naʻe kiʻi ongoʻi ʻita ʻa ʻIfalemi. Naʻe toe vave ange ʻene heu e poulú, pea ne pipihi mai ha meʻi mahoaʻa ʻo tau hono matá.
Naʻe mamali ʻa ʻIfalemi. Naʻe ‘i ai haʻane fakakaukau. Te ne ʻai ke palōmesi ange ʻa Soana ke tokoni ange ʻi hono ʻaho fāʻeleʻí. Kapau he ʻikai ke ne palōmesi ange, pea he ʻikai tokoni ʻa ʻIfalemi he ʻahó ni! Pea ʻe tonu leva.
Naʻá ne tala kia Mami ʻene palaní. Ka naʻe ʻikai fuʻu fiefia [ʻa Mami] ai.
Naʻá ne pehē ange, “Manatuʻi ke fakakaukau ki he meʻa ne mei fai ʻe Sīsuú.”
Naʻe fakakaukau ʻa ʻIfalemi kia Sīsū. Naʻe tokoniʻi ʻe Sīsū ʻa e niʻihi kehé, ka naʻe ʻikai ke Ne kole ha meʻa ke fakafetongi ʻaki ʻEne tokoní. Naʻe ʻiloʻi ʻe ʻIfalemi naʻe finangalo ʻa Sīsū ke ne tokoni ki he niʻihi kehé, ʻo hangē ko Iá.
Naʻe pehē ʻe ʻIfalemi, “ʻOku ou tui ʻoku finangalo ʻa Sīsū ke u tokoni kia Soana taʻe te u ʻai ke ne palōmesi mai ha faʻahinga meʻa maʻaku.”
Naʻe pehē ange ʻe Mami, “ʻOku ou tui pehē foki mo au.” Naʻá ne tokoni kia ʻIfalemi ke ne huaʻi e tou ʻo e keké ki he kapa taʻo keké.
Naʻe faʻo ʻe Mami ʻa e keké ki he ʻōvaní. Naʻe tokoni leva ʻa ʻIfalemi kia Mami ke ngaohi ha foʻi pai kakanoʻi manu (meat pie) ki he maʻu meʻatokoni efiafí. Naʻá ne fiefia ke ne ʻahiʻahiʻi.
Naʻe sio ʻa ʻIfalemi ʻoku ʻikai ke toe fakamaau fale ʻa ʻUkena ia. Naʻe lolotonga vaʻinga ia mo Soana.
Naʻe toe ongoʻi ʻita ʻa ʻIfalemi. Ko e hā e ʻuhinga ne tokoni toko taha ai pē iá? Mahalo ʻoku totonu ke ne maʻu ʻe ia ha konga ʻe ua ʻo e foʻi paí. Pea ʻoku ʻikai totonu ke kai ʻe Soana mo ʻUkena ha meʻi pai! Ko e tonú pē ia.
Ka naʻe toe fakakaukau ʻa ʻIfalemi kia Sīsū. Naʻá ne fakakaukau, ʻe finangalo ʻa Sīsū ke mau maʻu kotoa ha konga pai.
Naʻe tokoni ʻa ʻIfalemi kia Mami ke fakaʻosi e feimeʻatokoni efiafí. Naʻá ne tokoni foki ke teuteuʻi e tēpilé taʻe fekauʻi ia. Naʻá ne ongoʻi fiefia lahi ange. Naʻá ne ʻiloʻi naʻe folofola ange ʻa e Laumālie Māʻoniʻoní, kuó ne fai ʻa e fili totonú.
ʻI heʻenau tangutu kotoa ke kaí, naʻa nau hivaʻi ha hiva faiʻaho kia Soana. Naʻe hiva leʻolahi ʻa ʻIfalemi.
Naʻe tofiʻi ʻe Mami ʻa e foʻi paí, pea naʻe ala vave atu ʻa ʻIfalemi ke toʻo haʻane konga pai. Ka naʻá ne toe kiʻi taimi hifo.
Naʻá ne talaange kia Soana, “Te ke maʻu ʻe koe ʻa e ʻuluaki konga paí.” Ke monūʻia ho ʻahó!”
Ngaahi tā fakatātā ʻa Corey Egbert