“Ko e Fili ki he Tisikoú,” Ko e Kaumeʻá, Sune 2023, 10–11.
Ko e Fili ki he Tisikoú
Naʻe ongoʻi fiemālie ange ʻa Meti ʻi heʻene sio ki he tisikou hono kaungāakó.
Naʻe hoko ʻa e talanoa ko ʻení ʻi he ʻIunaiteti Siteiti ʻo ʻAmeliká.
Naʻe faʻo ʻe Meti hono sū tisikoú ki heʻene kató. Ko e toki ʻosi ia e kalasi tisikoú, pea kuo taimi e kai hoʻataá. Naʻá ne fetaulaki mo hono kaungāmeʻa ko ʻEsiliní ʻi he matapaá.
“Ko e hā hoʻo fakakaukau ki he foʻi hiva foʻoú?” Ko e fehuʻi ange ia ʻa Meti ʻi heʻena lue ki he loki kai hoʻataá. ʻOku teuteu ʻenau kalasí ke nau tisikou ki ha foʻi hiva foʻou ki heʻenau fakaʻaliʻali fakaʻosi ki he taʻú, ʻi muʻa ʻi he kotoa honau ngaahi fāmilí.
Naʻe pehē ange ʻe ʻEsilini, “Mahalo ʻoku sai pē.”
Naʻe pehē ange ʻe Meti, “ʻOku ngali kehe e ngaahi foʻi lea ʻe niʻihi. ʻOku ʻikai ke u fuʻu saiʻia ai.”
Naʻe fakakaukau ʻa Meti te ne ongoʻi mā kapau ʻe sio ʻene ongomātuʻá mo hono kiʻi tehiná ʻokú ne tisikou ki he fasi peheé.
Naʻe fakaʻilonga fehuʻi ʻa ʻEsilini. “ʻOku saiʻia moʻoni hoku tuongaʻané ai. ʻOku tuʻo lahi ʻene faʻa taá.”
“ʻOi.” Naʻe punou ʻa Meti ki lalo.
Naʻe fakakaukau ʻa Metí ki he foʻi hivá he ʻahó kakato. Naʻe ʻikai ke ne saiʻia ʻi he ongo naʻá ne maʻú. Ka naʻe ʻikai fakakaukau ʻa ʻEsilini ia naʻe kovi. Mahalo naʻe sai pē ia.
Naʻe manatuʻi ʻe Meti ha lēsoni efiafi fakafāmili naʻe fai ʻe hono fāmilí fekauʻaki mo e mūsiká. Naʻe pehē ʻe Mami ʻe lava ke tokoni ʻa e mūsika leleí ki he kakaí ke nau ongoʻi ʻa e Laumālie Māʻoniʻoní. Pea ʻe lava ʻe he mūsika ʻoku lea koví ʻo ʻai ke faingataʻa ange ʻenau ongoʻi e Laumālié. Mahalo pē ko e Laumālie Māʻoniʻoní naʻá ne talaange naʻe ʻikai sai ʻa e hivá.
Naʻá ne fakafulofula. Naʻe ʻikai ha lea kapekape ʻi he foʻi hivá. Naʻe kei kovi pē nai ia?
ʻI he aʻu atu ʻa Meti ki ʻapí, naʻá ne talanoa kia Mami fekauʻaki mo e foʻi hivá.
“Te ke lava nai ʻo sio ki he ngaahi foʻi leá pea ʻomi ho fakakaukaú?” Ko e kole ange ia ʻa Metí.
Naʻá na fekumi fakataha ki he ngaahi lea ʻo e foʻi hivá ʻi he ʻinitanetí. Naʻe siofi ʻe Meti ʻa e fofonga ʻo Mamí lolotonga ʻene laukongá.
Ne mata mamahi ʻa Mami. Naʻá ne pehē ange, “ʻOku mahino kiate au e ʻuhinga ʻoku ʻikai ai ke ke saiʻia aí. ʻOku ʻikai ke ʻi ai ha lea kapekape ia ai, ka ʻoku ʻikai ke u tui ko ha hiva lelei ia ke tisikou ki ai e kalasi faá. Te u ʻeke ia ki hoʻo faiako tisikoú ʻapongipongi.”
ʻI he ʻaho hono hokó, naʻe talanoa ʻa Mami ki he faiako ko Mīsisi Selatá, ʻi he akó . Naʻe hohaʻa ʻa Meti naʻa loto-mamahi ʻa Mīsisi Selata, ka naʻe ʻikai! Naʻá ne pehē naʻe mahino kiate ia ʻa e ʻuhinga naʻe ʻikai saiʻia ai ʻa Mami ʻi he foʻi hivá. Ka naʻá ne pehē naʻe fuʻu tōmui ke liliu e fasí.
Naʻe pehē ange ʻe Mīsisi Selata, “ʻE lava pē ke ʻoua ʻe tisikou ʻa Meti ia ki he foʻi hivá. Te ne lava pē ʻo mālōlō mei he foʻi tisikou ko iá.”
Naʻe ongo fakailifia ʻa e tangutu toko tahá. Naʻe fakakaukau ʻa Meti ke kole kia ʻEsilini ke na mālōlō fakataha. Naʻe talaange ʻe ʻEsilini ʻio!
ʻI he hokosia e ʻaho ke fai ai e fakaʻaliʻali tisikoú, naʻe fetaulaki ʻa Meti mo ʻEsilini ʻi he holó.
“ʻOku ou fiefia te ke mālōlō fakataha mo au!” Ko e lea atu ia ʻa Meti mo e malimalí.
Ka naʻe ʻikai malimali mai ʻa ʻEsilini ia. Naʻá ne talaange ʻi heʻene fakatonutonu hono pivá, “Heʻikai te u mālōlō au mo koe. Te u tisikou fakataha au mo e toengá.”
Naʻe ongoʻi taʻefiemālie ʻa Meti. Naʻe ʻikai ke ne fie tangutu toko taha pē. Ka naʻe ʻikai pē ke ne ongoʻi fiemālie ki he foʻi hivá.
Naʻe tuʻu laine ʻa Meti fakataha mo e toengá ʻo tisikou ki he ʻuluaki foʻi hivá. Ne hokosia leva e taimi ki he foʻi hiva hokó.
Naʻe tā vave hono mafú. Na‘á ne fai ha kiʻi lotu ʻi hono lotó. Hili iá naʻá ne mihiʻi ʻene mānavá, lue ki he tafaʻaki ʻo e siteisí, ʻo tangutu ki lalo.
ʻI he mavahe ʻa Meti mei he funga siteisí, naʻá ne ongoʻi fiemālie ange. Naʻá ne sio he tisikou hono kaungāakó. ʻI heʻene ʻosí, naʻá ne pasipasi. Naʻá ne ongoʻi fiefia mo māfana.
Naʻe malimali ʻa Meti. Naʻe fakalotosiʻi ke tangutu toko taha pē, ka naʻá ne ongoʻi fiefia ʻi heʻene fakafanongo ki he Laumālie Māʻoniʻoní.
Tā fakatātaaʻi ʻe Susana Gurrea