Tokoni ʻaki e ʻĀtí

Fai ʻe Sisitā Kristin M. Yee

Tokoni Ua ʻi he Kau Palesitenisī Lahi ʻo e Fineʻofá

Mei ha ʻinitaviu mo Gretchen Picklesimer Kinney.

Kuó u tā fakatātā ʻi he kotoa ʻo ʻeku moʻuí. ʻI heʻeku kei siʻí, naʻá ku tā fakatātā he taimi kotoa pē. Naʻe kole mai ʻe heʻeku faʻeé ke u fai ange ʻa e talanoa ki he fakatātā kotoa pē naʻá ku taá. Naʻá ku talaange ʻa e ngaahi talanoá, pea naʻá ne hiki ia maʻaku.

ʻAati meia Kristin M. Yee ʻi heʻene kei siʻí

Talu mei heʻeku kei siʻí mo ʻeku fakaʻamu ke u hoko ko ha tokotaha ʻaati. Naʻá ku saiʻia he sio ʻi he ngaahi faiva katuní. Naʻá ku fakaʻamu ke kau ʻi hono faʻu ha faʻahinga meʻa pehē. Naʻe tui maʻu pē ʻeku faʻeé te u aʻusia ia, pea naʻá ne tokoniʻi au ke u tui te u lava ʻo aʻusia ia.

Ke lelei ange ʻeku ʻātí, naʻe lahi ʻeku akoako fakahoko iá. Naʻá ku tā taʻetotongi ha ngaahi meʻa. Naʻá ku tā ha ʻū pousitā ki ha ngaahi polokalama ʻi he tukui koló. Naʻá ku tā valivali e matapā sioʻata ʻo e ʻū falekoloá. Naʻá ku tā ha ngaahi pena (banner). ʻI ha taimi ʻe taha, naʻá ku tokoni ke tā ha ngaahi seti ʻi ha fale hiva ʻopelā (opera).

Naʻe akoʻi au ʻe he ngaahi aʻusia ko ʻení, ko e ʻātí ko ha founga ia te te lava ai ʻo tokoni. Naʻá ku fiefia ʻi heʻeku fakaʻaongaʻi hoku ngaahi talēnití ke tokoniʻi e niʻihi kehé. Naʻá ku ongoʻi vēkeveke ange koeʻuhí naʻá ku ngaohi ha meʻa fakaʻofoʻofa maʻa ha taha kehe.

ʻI heʻeku fuʻu lahí, naʻá ku hoko ko ha tokotaha tā fakatātā maʻá e Disney. Naʻá ku ʻahiʻahiʻi ha ngaahi meʻa foʻou pea naʻá ku maʻu ha ngaahi talēniti ne ʻikai ke u ʻilo ne u maʻu. Naʻe tataki mo fakahinohinoʻi au ʻe he Tamai Hēvaní ki he feituʻu ne fiemaʻu ke u ʻi aí.

ʻOua naʻá ke manavasiʻi ke ʻahiʻahiʻi ha ngaahi meʻa foʻou! ʻOku ʻikai fiemaʻu ia ke ke hoko ko e lelei taha ʻi ha meʻa ka ke toki fiefia ai. Fakakaukau ki he ngaahi talēniti te ke lava ʻo fakaʻaongaʻi ʻi he taimí ni ke tokoni aí. ʻI he taimi ʻoku tau fakaʻaongaʻi ai hotau talēnití ʻi he founga ʻa e Tamai Hēvaní, ʻokú Ne tokoniʻi ke tau fakalakalaka mo fakatupulaki ia.

ʻŪ Fakatātā ʻoku Ngaʻunú

Faʻu haʻo fakatātā pē ʻaʻau ʻoku ngaʻunu! Ko hoʻo potó pē, te ke lava foki ʻo tokoniʻi mo ha taha kehe.

Kosiʻi ha kiʻi laʻipepa mei he pepá pea peluki vaeua ia.
Fakaava ʻa e laʻipepa ne pelukí. Tā ha fakatātā ʻi he konga ki laló. ʻE malava pē ko ha monumanu, ko ha tokotaha, pe ko ha faʻahinga meʻa pē ʻokú ke saiʻia ai!
Toe peluki fakafoki ʻa e laʻipepá. Tā fakatatau ki hoʻo ʻuluaki fakatātaá, kae ʻai ha fanga kiʻi liliu ke faʻu ʻaki ha tatau foʻou.
Vilohi maʻu e laʻipepa ʻi ʻolungá ke ne takatakaiʻi ʻa e pení. Pea ʻunuki vave leva ʻa e pení ki ʻolunga mo lalo ke fetongitongi ʻa e ongo fakatātaá. ʻE hangē ia ʻoku ngaʻunu hoʻo fakatātaá!