“Moa Bitim wan Gudfala Dei blong Praktis,” Fren, Novemba 2023, 14–15.
Moa Bitim wan Gudfala Dei blong Praktis
Woman ia i no luk hapi. ?Bae Ismael i save helpem hem?
Stori ia i hapen long Bolivia.
Ismael i smael taem i go stanap aotsaed blong san i saenem hem. Hem mo Papá tufala i stap go long pak. Taem oli stap wokbaot i go, Ismael i holem han blong Papá mo holem futbol blong hem. Ismael i laekem blong spenem taem wetem Papá—!speseli taem tufala i pleiplei futbol!
Taem tufala i kasem pak, Ismael i lukluk raon. Wan woman i stap pulumaot rabis gras kolosap long futbol fil. Wan famli i stap wokbaot long saed blong rod. Be i no gat man i stap pleiplei long futbol fil. !Ismael mo Papá bae tufala i gat bigfala spes blong praktis!
“Yu rere blong pleiplei?” Papá i askem.
“!Yes!” Ismael i ron spid i go long fil blong futbol. Hem i mekem ol sik sak trening, ol penalti kik mo ol kona sut.
Papá i kikim balong strong. !Balong i flae ova long hed blong Ismael!
“Bae mi go karem,” Ismael i talem. Hem i ron i go long kona blong fil mo karem balong. Hem i luk woman ia i stap pikimap toti yet. Hem i taet.
Papá i singaot, “Bae mi gol kipa naoia.” “!Bae yumi luk sapos yu save sutum wan poen!”
Ismael i ron i gobak mo kikim balong i go stret long gol. Papá i pusum han blong blokem be i mestem.
“Poeeen!” Ismael i singaot mo glad taem balong i fas long net.
I no longtaem wan aoa i pas. “Taem blong go hom,” Papá i talem.
Ismael i lukluk i gobak long woman ia we i stap karemaot ol rabis gras. Blong stap wok aotsaed long san i no save mekem wan i hapi olsem blong stap pleiplei futbol, hem i stap tingting long maen blong hem. Hem i wantem blong mekem woman ia i hapi. Afta, hem i kasem wan aedia.
“Papá, ?yu ting se woman ia i stap mekem wan gudfala wok ia?” hem i askem.
“?Wanem?” Papá i lukluk i go long woman ia. “Ah, yes.”
“!Mi ting se yumitu mas go talem long hem!” Ismael i talem.
“Okei, yumitu mas hariap tu blong go hom. Mamá i stap wet long yumitu,” Papá i talem.
Ismael i wajem woman ia i waepem fored blong hed blong hem. Filing ia blong toktok long hem i kam moa strong. “Mi filim strong se yumitu mas mekem,” hem i talem. Hem i holem han blong Papá mo tufala i wokbaot i go long woman ia.
“Gud moning sista,” Ismael i sakem han long tata long hem.
Woman ia i no lukluk i go antap. “?Yutufala i wantem wanem?”
Ismael i luksave se hem i no hapi tumas. Be hemia i no stopem hem. “Mi wantem blong talem long yu se yu stap mekem wan gudfala wok!”
Naoia woman ia i lukluk i go antap long hem.
Ismael i smael. “Tangkyu blong stap lukaot gud long pak!”
Woman ia i smael i gobak long hem. “Tangkyu,” hem i talem. Afta, smael blong hem i kam moa bigwan. “Tangkyu tumas.”
Ismael i filim hapi taem hem i wokbaot i go hom wetem Papá.
“Mi ting se wanem we yu talem long hem i impoten long hem,” Papá i talem. “Mi glad se yu lisin long filing we yu bin kasem.”
“Mi tu.” Ismael i tingting blong wan smoltaem. Afta hem i askem, “?Yu ting se hemia i Tabu Spirit?”
Papá i saksakem hed blong agri. “Samtaem Tabu Spirit i givim wan tingting long yumi blong helpem wan narawan. Mo hemia nao stret samting we yu bin mekem ia.”
Ismael i smael. Blong toktok long woman ia i wan smol samting nomo, be Ismael i bin mekem dei blong hem i kam gudfala dei. !Blong stap lisin long Tabu Spirit i bin mekem dei blong hem tu i kam wan gudfala dei!
Ol pikja oli kam long Jennifer Bricking