“Bae Yumitu Mekem Hemia Tugeta,” Fren, Novemba 2023, 40–41.
Bae Yumitu Mekem Hemia Tugeta
Annie i fraet blong stat blong go long Yang Woman.
Stori ia i tekem ples long YSA.
Annie i skwisim kaliko blong dres blong hem. Hem i traem blong lisin long ol spika. Be hem i filim wan filing blong fraet mo bel blong hem i tantanem.
Tedei hem i dei we Annie bae i stat blong go long Yang Woman. Bae hem i go long klas stret afta long sakramen miting i finis. Evriwan oli talem long Annie se hem i mas glad, be hem i fraet bitim blong glad.
Hem i lukluk i go long Tami, bigfala sista blong hem. Tami i bin stap long Yang Woman blong tri yia, mo hem i laekem tumas. Oltaem hem i stap tokbaot long Annie hamas hem i laekem. “Bae yu mekem plante fren,” Tami i talem. “Hem i defren long Praemeri. Kolosap i semmak olsem se yu gro kam bigwan.”
Be Annie i no semmak long sista blong hem. Tami i laekem blong mitim ol niufala pipol, mo i isi long hem blong mekem ol niu fren. Annie i kwaet mo bae hem i wantem blong rid o dro bitim blong toktok long ol narawan.
Mo tu, Annie i gat ol smosmol red lam long fes blong hem mo hem i filim fraet blong oli luk. Hem i yusum spesel krim we i helpem hem. Be ol red mak long skin blong hem, oli no save lus nomo.
Afta long sakramen miting, Annie i stap pulpulum lek blong hem long vranda. “Mi no save go long Yang Woman tedei,” hem i talem long mama mo Tami.
Mama i luk wari. “Mi ting se yu glad tumas blong go long Yang Woman. ?Wanem i hapen?”
“Mi no save eniwan long ol bigfala gel ia.” Annie i tajem fes blong hem. “Mo bae oli laf long mi taem bae oli luk mi.”
Mama i haggem Annie. “Tingbaot se Tami tu bae i stap long ples ia.”
“Mi no olsem Tami,” Annie i talem. Hem i lukluk sista blong hem. “Yu save stap toktok long ol pipol.”
“Mi save i had blong go long wan niufala klas,” Tami i talem. “Be bae yumitu mekem hemia tugeta. Mi tu mi fraet taem mi stat blong go long Yang Woman.”
Ae blong Annie i open bigwan mo i lukluk long Tami. !Oltaem Tami i no stap fraet! Hem i bin trening from miusik long skul mo oli bin putum hem i lidim wan pat blong grup. Annie i no stap mekem ol samting olsem ia. Hem i stap traem nomo blong mekem ol samting we bae ol man oli no luksave.
“Be yu neva fraet,” Annie i talem.
Tami i smael. “!No, mi tu mi stap fraet! Mi bin fraet taem mi stap tren from miusik. ?Yu save wanem mi mekem?”
Annie i saksakem hed blong hem blong talem no.
“Mi bin prea mo mekem bes blong mi. Mo mi bin helpem ol narafala pikinini tu. Mi luk olsem se plante long olgeta oli fraet semmak olsem mi nomo. Blong stap helpem ol narawan blong no fraet i helpem mi blong no fraet.”
Annie i tingting long hemia. ?Bae hem i save mekem wanem we Tami i bin mekem mo helpem ol narafala gel long klas blong hem blong no fraet?
“?Yu ting se bae yu save go long Yang Woman klas tedei?” Mama i askem.
Annie i pulum bigfala win. Afta, hem i saksakem hed blong agri. Bae hem i save mekem.
Annie mo Tami i wokbaot i go long klasrum blong Yang Woman. Annie i lukluk long ol narafala gel. Sam long olgeta oli fraet olsem hem. Julie i stap tantanem wan hea blong hem long fingga blong hem mo Erica i stap kakae brebrekem ol sel blong fingga blong hem.
Annie i tingting long olsem wanem hem i save helpem tufala. Hem i go long Julie blong sidaon long saed blong hem. “Yu tu yu fraet?” Annie i talem sloslo long hem. “Bae evri samting i Oraet.”
Julie i smael, mo Annie i smael i gobak long hem. Fraet blong Annie i godaon smol nao. Ating, bae i tru ia se Yang Woman i gud tumas.
Ol pikja droing i kam long Toby Newsome