“Wan Tes blong Traem Yu,” Fren, Novemba 2023, 30–31.
Wan Tes blong Traem Yu
Jared i save se Jisas Kraes i stap long saed blong hem.
Stori ia i hapen long Franis.
Jared i bangem balong krosem basketbol kot. Olgeta we oli plei oli kam raonem hem, mo ol sus blong olgeta i stap mekem noes long flo.
“!Mi fri!” Gabriel i singaot.
Jared i pasem balong long Gabriel mo gohed blong stap ron. Afta, Gabriel i pasem balong i gobak. Jared i sutum balong i go long ring blong basketbol.
!SWOOS!
!Balong i go insaed!
“Naes wok, Jared,” koj blong hem i talem long hem afta long gem. “Yu save, trening blong go plei agensem ol nara ples long kantri bae i stat afta long tu wik.”
Jared i smael. I gat sam long olgeta we oli plei we oli invaetem olgeta blong kam long trening blong tim ia.
“Ol trening ia bae oli tekem ples long Sandei,” Koj i talem. “?Yu ting se bae yu save kam long taem ia?”
Glad blong Jared i lus kwiktaem olsem we i bin kam kwiktaem olsem.
“?Long Sandei?” Jared i askem.
“Yes. ?I gat wan problem?”
Jared i tingting long hem. !Hemia i janis blong hem blong plei long wan nambawan tim! Be Sandei hem i taem we hem i go long jos mo lukluk nomo long Sevya.
“Ol Sandei oli ol spesel dei blong mi,” Jared i talem. “Be bae mi toktok long papa mo mama blong mi abaot hemia.”
Long naet ia, Jared i sidaon long bed wetem papa mo mama blong hem. Hem i stap saksakem balong blong basketbol blong hem i go antap long ea mo stap tingting. “Mi wantem tumas blong trening blong tim,” mi i talem long mama mo papa. “Be mi no wantem blong mekem long wan Sandei. Mi save se God i moa impoten bitim basketbol.”
“?Wanem nao yumi save mekem blong help?” Mama i askem.
Jared i tantanem balong long han blong hem. “Bae yumi save mekem wan prea tugeta?”
Hem i putumaot basketbol blong hem mo nildaon wetem mama mo papa. “Dia Papa long Heven,” hem i talem, “Mi wantem mo, wantem tumas blong trening blong basketbol tim. !Be ol trening ia oli stap long wan Sandei! Mi save se Sandei i dei we mi givim long Yu. ?Wanem Nao Mi Save Mekem?
Afta long prea, Jared i kasem wan filing blong kamfot.
“?Yu filim olsem wanem?” Mama i askem.
“Bae mi no go sapos ol trening ia oli stap long wan Sandei,” hem i talem. “Be mi gat wan filing se bae i Oraet.”
Tu dei i pas, mama blong Jared i kasem wan imel. !Imel ia i talem se ol trening ia bae oli nomo stap long wan Sandei be naoia bae i stap long Satedei!
Jared bae i save trening mo obei long !sabat dei i tabu! Hem i save se Papa long Heven i bin harem prea blong hem.
Long tu wik ia, Jared i praktis long basketbol olsem we hem i save mekem. Taem we bigfala dei i stap kam, Jared i mekem evri bes blong hem. Hem i ron spid long taem blong gem, i sutum plante poen, mo singaot blong glad from tim blong hem.
“Olgeta ia we oli stap plei bae oli gohed blong trening blong tim,” koj i talem afta long fas raon. “Plis lisin long nem blong yufala.”
Hat blong Jared i pam laod. Koj i singaotem wan nem. Afta, wan narawan. Mo wan narawan. Jared i filim se hop blong hem blong stap pat long tim, i stat blong lus smosmol.
I no longtaem, koj i ridim flatem ol nem long lis. Hem i no bin singaotem nem blong Jared. Jared bae i no muv i go long nekis raon blong ol trening.
Jared i sidaon long jea aotsaed long ples blong eksasaes mo stap lukluk daon long sus blong hem. Hem i bin wok had tumas. Be hem i filim olsem se evri wok blong hem i blong nating nomo.
Taem mama i kam from hem, Jared i saksakem hed blong hem blong no agri. “Mi no stap long tim.”
Mama i putum han raon long hem mo haggem hem strong. “Mi sore se i no bin hapen olsem we yumi bin wantem,” hem i talem.
Jared i pulum bigfala win blong hem. Afta, wan tingting blong kamfot i kam long hem.
“Oltaem ol samting bae oli no save hapen olsem we mi wantem,” hem i talem. “Be Jisas Kraes i save stret wanem filing blong mi. Hem i stap long saed blong mi.”
Mama i smael. !“Yes, i tru! Hem i save wanem yu stap filim.”
Jared i smael i gobak. Hem i harem nogud yet, be hem i harem moa gud blong save se Sevya i andastanem wanem hem i stap filim. Jared i save se oltaem Jisas bae i lavem hem mo sapotem hem.
Ol pikja i kam long Britain Morris