“Stap Helpem Bebi Brata,” Fren, Novemba 2023, 16–17.
Stap Helpem Bebi Brata
I nogat wan i gat taem blong kam long Lashia naoia.
stori ia i hapen long Saot Afrika.
Lashia i gat wan niufala bebi brata. Nem blong hem, Liam. Hem i gat blak hea mo ol smosmol han mo lek. !Hem i naes tumas!
Be samtaem blong gat wan niufala bebi insaed long famli i had. Oltaem mama mo papa tufala i bisi naoia. Mo Liam i kraekrae tumas.
“?Mama, yu save ridim wan stori long mi?” Lashia i askem.
Mama i se, “Bae mi mas wasem Liam insaed long besin blong swim. “Bae yu save ridim wan stori wetem Ariana.”
Lashia i sidaon long flo wetem smol sista blong hem. Tufala i tanem ol pej blong wan buk. Be i no semmak taem we mama stap wetem tufala.
“?Papa, bae yu save pleiplei wan gem wetem mi?” Lashia i askem.
“Mi nid blong helpem mama wetem bebi bifo mi go long wok,” papa i talem.
Lashia i mekem fes blong hem i nogud. !Mama mo papa i neva gat taem blong stap wetem hem nao! Oltaem tufala i stap helpem Liam.
I no longtaem papa i aot blong go long wok. Mama i putum Liam i go daon blong slip smol. Hem i sidaon wetem Lashia mo Ariana long sofa jea. Hem i taet.
Mama i talem, “mitufala i bin stap bisi tumas wetem Liam.” “?Yutufala i misim mitufala smol?”
Lashia i saksakem hed blong agri. Hem i filim olsem se bae hem i wantem blong krae.
Mama i haggem Lashia mo Ariana. “Liam i nidim bigfala help naoia from se hem i smol tumas. Hem i no save mekem eni samting yet hemwan olsem we yutufala i save mekem.”
“Mi save,” Lashia i talem.
“Be sapos yu wantem, yu save helpem mi blong kea long Liam.” Mama i smael.
“?Tru?” Lashia i askem. Hem i laekem aedia ia.
“?Mi tu?” Ariana i askem.
“Yu tu,” mama i talem.
I no longtaem, Liam i stat blong krae. Taem mama i jenisim daepa blong hem, Lashia i karem wetwet pepa tawel blong waepem hem i kam long mama.
“Tangkyu,” Mama i talem.
Long nekis dei, taem Liam i swim, Lashia mo Ariana i lukaot wan klin klos blong hem i werem. !Klos ia i gat ol naes smosmol animol long hem! Tufala i karem i go long mama mekem se hem i save mekem Liam i werem.
“Tangkyu,” Mama i talem.
Lashia mo Ariana tufala i tingting long ol narafala wei blong help. Tufala i mekem gud bed blong tufala evri moning, mo i no gat wan i talem long tufala blong mekem. !Samtaem tufala i mekem bed blong mama mo papa tu! Mo taem we i taem blong kaekae long aftenun, tufala i helpem papa long kijin.
“Tangkyu,” Mama mo papa i talem.
Taem Liam i krae, Lashia i traem blong helpem hem blong i harem gud bakegen. Hem i karem hem mo toktok long hem long wan kwaet voes. Liam i no save talem tangkyu yet. !Be wan dei hem i smael bigwan long Lashia!
Lashia i smael i gobak long hem. !Hem i glad se hem i save helpem bebi brata blong hem mo mama mo papa blong hem tu!
Ol pikja oli kam long Shawna J. C. Tenney