“Wan we I Save Andastanem Samting,” Fren, Novemba 2023, 26–27.
Wan we I Save Andastanem Samting
Fren blong Blair i no andastanem filing ia blong wan we i kasem sik ia Krons.
Stori ia i tekem ples long YSA.
“Bae mi no save kam long yufala tedei,” Blair i talem. Fes blong hem i hot mo red from hem i sem.
Ol fren blong hem oli stap lukluk fes blong hem. “Be yu bin talem se bae yu kam!” Sammy i talem.
“Mi save.” Blair i stap lukluk i godaon long lek blong hem. “Mi filim gud tumas. Mi sore.”
“Hemia toktok we yu bin talem lastaem,” Jessica i talem.
Blair i no save wanem blong talem. Hem i wantem tumas blong go long haos blong Sammy. Be bel blong hem i soa tumas tedei. Hem i nidim blong go hom mo spel.
Blair i kasem sik blong Krons. Hemia i mekem bel blong hem i soa, mo i mekem hem i harem nogud tumas. Plante taem bel blong hem i soa smosmol nomo. Be sam dei i mowas bitim ol narafala dei. Tedei hem i wan long ol dei ia. Hem i stap tingting se sapos nomo hem i save jusum wijwan dei nomo blong bel blong hem bae i soa long hem. I olsem se bel blong hem i stap soa bigwan evri taem we hem i wantem blong mekem wan samting blong gat wan gudtaem.
“Yumi go,” Sammy i talem long Jessica.
Taem we Blair i kasem hom, hem i drink meresin blong hem. Afta, hem i traem blong slip. Be hem i harem nogud tumas.
Mama mo papa i kam blong jekem hem. Papa i sidaon long bed blong hem. “?Yu filim olsem wanem?”
“Okei. Meresin i helpem hem blong smoltaem,” Blair i talem.
“Mi sore from se yu no save go long haos blong Sammy,” Mama i talem.
Blair i filim ol wota blong ae long ae blong hem. “!I no stret olsem! Ol fren blong mi oli no andastanem wanem mi stap go tru long hem.” Blair i sakem wan pilo long wol blong haos. “Mi wantem blong kam oraet nomo.”
Papa i haggem Blair. “!Mi save! ?Bae yu wantem blong kasem wan prishud blesing?”
Blair i saksakem hed blong agri. Oltaem ol blesing oli stap helpem hem blong filim pis.
Papa i putum han blong hem long hed blong Blair mo givim blesing long hem blong i save spel mo filim kamfot. Hem i wan naesfala blesing. Hemia i helpem hem blong tingbaot se Papa long Heven i lavem hem. Be hem i harem nogud yet from ol fren blong hem.
Afta long blesing, mama mo papa i kisim Blair blong talem gud naet. Tufala i aot blong mekem se hem i save slip.
Blair i ledaon i go bak daon mo klosem ae blong hem. Blesing i bin helpem hem, be hem i stap harem nogud yet.
Hem i nildaon long saed blong bed blong hem blong prea. Faswan, i semmak olsem plante prea blong hem oltaem. Hem i talem long Papa long Heven abaot ol samting we hem i tangkyu from, mo askem blong hem i save harem gud. Be long tetaem ia, hem i stap gohed nomo.
“Papa long Heven, mi harem nogud tumas. Mi misim blong stap wetem ol fren blong mi,” hem i talem. “Mi filim se mi stap miwan. I no gat wan we i andastanem harem nogud blong mi evri dei. Mi misim taem blong mi bifo we mi no bin sik yet.”
Hamas longfala taem we Blair i stap prea, moa hem i filim se Papa long Heven i stap lisin long prea blong hem. Hem i no save harem o luk Hem, be hem i filim lav blong Hem. Blair i save se Hem i wantem blong harem wanem we hem bae i talem long Hem. Blair i no wantem filing ia blong stop.
Blair i prea kasem we hem i talem evri samting we hem i filim blong talem. Afta, wan tingting i kam long maen blong hem. Maet ol fren blong Blair bae oli neva filim harem nogud blong sik ia Krons, be Papa long Heven mo Jisas Kraes, Tufala i save. Tufala i save hamas harem nogud we hem i stap fesem mo filing ia se hem i stap hemwan. Oltaem bae Tufala i stap long ples ia from hem.
Blair i filim se hem i stap kasem wan bigfala hag we i bitim ol narawan. Afta we hem i finisim prea blong hem, hem i go blong faenem papa mo mama blong hem blong talem long tufala wanem we i bin hapen.
“?Olsem wanem, yu gat wan nogud drim?” Mama i askem.
Blair i smael. “No. Mi bin stap prea.”
Mama i sapraes. “Mifala i talem gud naet longtaem smol i pas. ?Yu bin stap prea blong longfala taem ia kasem naoia?”
?I tru se yu bin prea kasem naoia? Blair i saksakem hed blong agri. “Hem i olsem se mi stap kasem wan bigfala hag. Papa long Heven mo Jisas Kraes Tufala i save wanem we mi stap filim. From Tufala, !Mi no nid blong filim se mi stap miwan!”
Ol pikja droing oli kam long Tammie Lyon