“Labaw Pa Kaysa usa ka Maayo nga Adlaw sa Pagbansay,” Higala, Nob. 2023, 14–15.
Labaw Pa Kaysa usa ka Maayo nga Adlaw sa Pagbansay
Ang babaye wala sa maayong buot. Makatabang kaha si Ismael?
Kini nga istorya nahitabo sa Bolivia.
Mipahiyom si Ismael samtang migawas siya didto sa kahayag sa adlaw. Siya ug si Papá moadto sa parke. Samtang nanglakaw sila, gigunitan ni Ismael ang kamot ni Papa ug gidala ang iyang football. Ganahan si Ismael nga mogahin og panahon uban ni Papá—ilabi na kon magdula sila og football!
Sa dihang naabot sila sa parke, mitan-aw sa palibot si Ismael. Usa ka babaye ang nangguna og sagbot duol sa football field. Usa ka pamilya ang naglakaw sa daplin sa dalan. Apan walay nagdula didto sa football field. Si Ismael ug Papá adunay daghan kaayo nga luna aron sa pagbansay!
“Andam na nga modula?” Nangutana si Papá.
“Oo!” Paspas kaayong midagan si Ismael kutob sa iyang mahimo ngadto sa field. Gibuhat niya ang zigzag nga mga drill, penalty kicks, ug corner shots.
Gipatiran ni Papa ang bola og kusog kaayo. Milupad kini agi ibabaw sa ulo ni Ismael!
“Akong kuhaon,” miingon si Ismael. Midagan siya ngadto sa suok sa field ug gipunit ang bola. Nakita niya ang babaye nga nangguna gihapon sa yuta. Ingon og gikapoy siya.
“Ako na ang goalie karon,” mitawag si Papá. “Sulayi kon maka-iskor ka!”
Midagan balik si Ismael ug gipatiran ang bola padulong ngadto sa goal. Mikab-ot si Papa aron sa pagpugong niini apan nakalusot gayod.
“Goaaaal!” Miabiba si Ismael samtang ang bola miigo sa net.
Sa wala madugay milabay ang tibuok usa ka oras. “Oras na nga mouli,” miingon si Papá.
Gitan-aw og balik ni Ismael ang babaye nga nangguna. Ang pagtrabaho nga init ang adlaw dili ingon ka makalingaw sama sa pagdula og football, naghunahuna siya. Gusto niya nga palipayon siya [ang babaye]. Dayon aduna siyay ideya.
“Papá, dili ba kana nga babaye naghimo og maayo nga trabaho?” nangutana siya.
“Unsa?” Gitan-aw ni Papá ang babaye. “Aw, oo.”
“Hunahuna nako kinahanglan moadto kita ug sultihan siya!” miingon si Ismael.
“Aw, kinahanglan kitang magdali og uli. Naghulat si Mamá kanato,” miingon si Papá.
Gitan-aw ni Ismael ang babaye nga nagtrapo sa iyang agtang. Ang pagbati nga makig-istorya kaniya nagkakusog. “Gibati gayod nako nga kinahanglang makig-istorya kita kaniya,” miingon siya. Gigunitan niya ang kamot ni Papá ug milakaw paingon ngadto kaniya [sa babaye].
“Maayong buntag, ma’am,” miigon si Ismael nga mikaway.
Wala mohangad ang babaye. “Unsay imong gusto?”
Nakabantay si Ismael nga dili kaayo siya malipayon. Apan kana wala makapugong kaniya. “Gusto kong mosulti kanimo nga nagbuhat ka og nindot kaayo nga trabaho!”
Niining higayona ang babaye mihangad ngadto kaniya.
Mipahiyom si Ismael. “Salamat sa pag-atiman sa parke!”
Mibawos og pahiyom ang babaye. “Salamat,” miingon siya. Dayon mas midako ang iyang pahiyom. “Daghan kaayong salamat.”
Malipayon si Ismael samtang naglakaw siya pauli uban ni Papá.
“Sa akong hunahuna ang unsay imong gisulti importante kaniya,” miingon si Papá. “Nalipay ko nga naminaw ka sa imong pagbati.”
“Ako sab.” Naghunahuna si Ismael sa makadiyot. Dayon nangutana siya, “Sa hunahuna nimo ang Espiritu Santo ba kadto?”
Mitando si Papá. “Usahay ang Espiritu Santo mohatag kanato og hunahuna sa pagtabang sa usa ka tawo. Ug mao gayod kana ang imong gibuhat.”
Mingisi si Ismael. Ang pakig-istorya sa babaye usa lang ka gamay nga butang, apan gihimo niyang mas maayo ang iyang adlaw. Ang pagpaminaw sa Espiritu Santo mihimo usab sa iyang adlaw nga mas maayo!
Mga paghulagway pinaagi ni Jennifer Bricking