“Pagtabang sa Masuso nga Igsoong Lalaki,” Higala, Nob. 2023, 16–17.
Pagtabang sa Masuso nga Igsoong Lalaki
Wala nay usa nga adunay panahon alang kang Lashia karon.
Kini nga istorya nahitabo sa South Africa.
Si Lashia adunay bag-ong masuso nga igsoong lalaki. Iyang ngalan mao si Liam. Aduna siyay itom nga buhok ug gagmay nga mga kamot ug mga tiil. Kyut kaayo siya!
Apan usahay ang pagkaanaay bag-o nga masuso diha sa pamilya lisod. Si Mama ug si Papa kanunayng bisi na karon. Ug sige og hilak si Liam.
“Ma, mahimo bang basahan ko nimo og istorya?” Nangutana si Lashia.
“Kinahanglan nakong limpyohan si Liam sa batiya,” miingon si Mama. “Tingali makabasa ka og usa ka istorya uban ni Ariana.”
Milingkod si Lashia sa salog uban sa iyang manghod nga babaye. Gipakli nila ang mga pahina sa usa ka libro. Apan lahi kini kon wala sila Mama.
“Pa, mahimo bang makigdula ka nako?” Nangutana si Lashia.
“Kinahanglan nakong tabangan si Mama sa masuso sa dili pa ko moadto sa trabaho,” miingon si Papa.
Nagmug-ot si Lashia. Si Mama ug si Papa wala na gayoy panahon alang kaniya karon! Kanunay nilang gitabangan si Liam.
Wala madugay mibiya na si Papa para sa trabaho. Gibutang ni Mama si Liam aron motagpilaw. Milingkod siya uban ni Lashia ug Ariana diha sa sopa. Ingon og gikapoy siya.
“Bisi na kaayo kami ni Liam,” miingon si Mama. “Mibati ka ba nga medyo nag-inusara?”
Mitando si Lashia. Daw gibati niya nga gusto siyang mohilak.
Gigakos ni Mama si Lashia ug Ariana. “Nagkinahanglan og daghang tabang si Liam karon tungod kay gamay pa kaayo siya. Dili pa siya makahimo og bisan unsa sa iyang kaugalingon, sama kanimo.”
“Nahibalo ko,” miingon si Lashia.
“Apan kon gusto nimo, makatabang ka nako sa pag-atiman ni Liam.” Mipahiyom si Mama.
“Tinuod?” Nangutana si Lashia. Ganahan siya niana nga ideya.
“Ako sab?” nangutana si Ariana.
“Ikaw sab,” miingon si Mama.
Wala madugay misugod sa paghilak si Liam. Sa dihang giilisan ni Mama ang iyang diaper, gihatag ni Lashia kaniya ang wipes.
“Salamat,” miingon si Mama.
Pagkasunod adlaw, sa dihang naligo si Liam, si Lashia ug Ariana mipili og limpyo nga sinina alang kaniya nga sul-obon. Kini adunay kyut nga gagmay nga mga hayop niini! Gihatag nila kini kang Mama aron iyang masul-oban si Liam.
“Salamat,” miingon si Mama.
Si Lashia ug Ariana naghunahuna og laing mga paagi sa pagtabang. Gitarong nila ang ilang mga higdaanan matag buntag nga wala na gisultihan. Usahay tarongon usab nila ang higdaanan ni Mama ug Papa! Ug sa dihang panahon na alang sa panihapon, gitabangan nila si Papa sa kosina.
“Salamat,” miingon si Mama ug Papa.
Sa dihang mihilak si Liam, misulay si Lashia sa pagtabang kaniya nga mobati nga arang-arang. Gigunitan niya siya ug nakig-istorya kaniya sa malumo nga tingog. Si Liam dili pa makasulti og salamat. Apan usa ka adlaw mipahiyom siya og dako kang Lashia!
Mibalos og pahiyom si Lashia. Malipayon siya nga makatabang siya sa iyang masuso nga igsoong lalaki ug sa iyang mama ug papa usab!
Mga paghulagway pinaagi ni Shawna J. C. Tenney