“Usa ka Tawo Kinsa Nakasabot,” Higala, Nob. 2023, 26–27.
Usa ka Tawo Kinsa Nakasabot
Ang mga higala ni Blair wala makasabot kon unsa ang kahimtang nga adunay Crohn’s disease.
Kini nga istorya nahitabo sa USA.
“Dili ko makaadto karon,” miingon si Blair. Ang iyang nawong nanginit tungod sa kaulaw.
Ang iyang mga higala mitutok kaniya. “Apan miingon ka nga moadto ka!” Miingon si Sammy.
“Nahibalo ko.” Mitutok si Blair sa iyang tiil. “Dili kaayo maayo akong gipamati. Pasayloa ko.”
“Mao kana ang imong giingon sa miaging higayon,” miingon si Jessica.
Wala makahibalo si Blair unsay isulti. Ganahan unta siya nga makaadto sa balay ni Sammy. Apan sakit gayod ang iyang tiyan karon. Gikinahanglan niyang mopauli ug mopahulay.
Si Blair adunay Crohn’s disease. Kini ang hinungdan nga mosakit ang iyang tiyan, ug sakit gayod kaayo kini. Sa kasagaran nga mga adlaw ang iyang tiyan mosakit lang og gamay. Apan sa ubang mga adlaw mas grabe kay sa uban. Karon mao ang usa niadto nga mga adlaw. Kon makapili pa lang unta siya kon hain nga mga adlaw nga mas masakitan siya. Ingon og mosakit og maayo ang iyang tiyan sa panahon nga gusto siya nga mobuhat og makalingaw nga butang.
“Lakaw na lang ta,” miingon si Sammy ngadto kang Jessica.
Sa dihang nauli si Blair, gitumar niya ang iyang tambal. Dayon misulay siya sa pagkatulog. Apan gisakitan gayod siya og maayo.
Miabot si Mama ug Papa aron sa pagsusi kaniya. Milingkod si Papa sa iyang higdaanan. “Kumusta man ang imong gibati?”
“OK ra. Nakatabang og gamay ang tambal,” miingon si Blair.
“Pasayloa ko nga dili ka makaadto sa balay ni Sammy,” miingon si Mama.
Nabati ni Blair ang mga luha diha sa iyang mga mata. “Dili kana makiangayon! Ang akong mga higala wala makasabot kon unsa kini.” Gilabay ni Blair ang usa ka unlan didto sa bungbong. “Gusto lang ko nga mamaayo.”
Si Papa migakos ni Blair. “Nakahibalo ko. Gusto ka ba og panalangin sa pagkapari?”
Mitando si Blair. Ang mga panalangin kasagaran nakatabang kaniya nga mobati og dugang nga kalinaw.
Gibutang ni Papa ang iyang mga kamot sa ulo ni Blair ug mipanalangin kaniya nga makapahulay ug mobati og kahupay. Nindot kadto nga panalangin. Nakatabang kini kaniya nga makahinumdom nga ang Langitnong Amahan nahigugma kaniya. Apan naguol gihapon siya mahitungod sa iyang mga higala.
Human sa panalangin, si Mama ug Papa mihatag kaniya og pang-goodnight nga halok. Mibiya sila aron makatulog siya.
Mihigda si Blair ug mipiyong. Ang panalangin nakatabang, apan gisakitan gihapon siya.
Miluhod siya kilid sa iyang higdaanan aron mag-ampo. Sa sinugdanan sama kini sa kadaghanan sa iyang mga pag-ampo. Giingnan niya ang Langitnong Amahan kon unsa ang iyang gipasalamatan ug mihangyo nga moarang-arang. Apan niining higayona mipadayon siya.
“Langitnong Amahan, naguol gyod ko. Gimingaw ko nga ikauban ang akong mga higala,” miingon siya. “Mibati ko nga nag-inusara. Walay nakasabot kon unsa ka dako ang akong kasakit sa matag adlaw. Gimingaw ko sa kaniadto nga wala pa ko nasakit.”
Samtang nagkataas ang pag-ampo ni Blair, mas nabati niya nga ang Langitnong Amahan naminaw sa iyang pag-ampo. Dili siya makadungog og makakita Kaniya, apan nabati niya ang Iyang gugma. Nasayod siya nga Siya nagpakabana sa unsay iyang isulti. Dili gusto si Blair nga matapos kana nga pagbati.
Nag-ampo si Blair hangtod nasulti niya sa Langitnong Amahan ang tanan niyang gibati. Dayon usa ka panghunahuna ang misantop sa iyang pangisip. Tingali dili gayod makahibalo ang mga higala ni Blair kon unsa ang bation nga adunay Crohn’s disease, apan nasayod ang Langitnong Amahan ug si Jesukristo. Nasayod Sila kon unsa ka dako ang iyang kasakit ug kon unsa ka dako ang kamingaw nga iyang gibati. Sila kanunayng maanaa alang kaniya.
Nabati ni Blair nga gigakos gayod siya og maayo. Human nga natapos niya ang iyang pag-ampo, milakaw siya aron pangitaon ang iyang mga ginikanan aron sultihan sila kon unsay nahitabo.
“Giurom ba ka?” Nangutana si Mama.
Mipahiyom si Blair. “Wala. Nag-ampo ko.”
Nasorpresa si Mama. “Taudtaod na man nga kami nag-good night nimo. Nag-ampo ba ka nianang tanang panahona?”
Taas ba gayod kaayo kini? Mitando si Blair. “Morag gigakos gayod ko og maayo. Ang Langitnong Amahan ug si Jesukristo nakahibalo kon unsay akong gibati. Tungod Kanila, dili ko kinahanglang mobati nga nag-inusara!”
Mga paghulagway pinaagi ni Tammie Lyon