Magtibangay Kita Niini

Ni Jane McBride

(Gibase sa usa ka tinuod nga istorya)

Nahadlok si Annie nga magsugod sa Young Women.

Kini nga istorya nahitabo sa USA.

Gikuskos ni Annie ang tela sa iyang sinina. Naningkamot siyang maminaw ngadto sa mga mamumulong. Apan anaa kaniya ang kakulba, dili mahimutang nga pagbati.

Karon mao ang adlaw nga si Annie magsugod sa pagtambong sa Young Women. Moadto siya sa klase inig human dayon sa panagtigom alang sa sakramento. Ang tanan misulti kang Annie nga kinahanglang magmahinamon siya, apan hinuon, nahadlok siya.

Mitan-aw siya kang Tami, iyang magulang nga babaye. Si Tami tulo na ka tuig sa Young Women, ug ganahan kaayo siya niini. Gisultihan niya kanunay si Annie kon unsa kini ka nindot. “Daghan kaayo ka og mahimong mga higala,” miingon si Tami. “Lahi kini sa Primary. Halos parehas ka sa usa ka hamtong.”

Apan si Annie dili sama sa iyang igsoon nga babaye. Ganahan si Tami nga makighimamat og bag-ong mga tawo, ug sayon alang kaniya nga makahimo og mga higala. Hilomon si Annie ug mas ganahan nga magbasa o magdrowing kaysa makig-istorya sa uban.

Si Annie adunay bugasbugas usab, ug naulaw siya bahin sa iyang panagway. Migamit siya og espesyal nga cream, nga nakatabang. Apan ang pula nga mga burot sa iyang panit dili gayod mawala.

Human sa panagtigom alang sa sakramento, hinay kaayong naglakaw si Annie diha sa pasilyo. “Dili ko makaadto sa Young Women karon,” gisultihan niya si Mama ug Tami.

Makita nga nabalaka si Mama. “Abi nakog mahinamon ka bahin sa pag-adto sa Young Women. Unsa may nahitabo?”

“Wala koy nailhan nga bisan kinsa sa mas magulang nga mga babaye.” Gihikap ni Annie ang iyang nawong. “Ug tingali mokatawa sila kon makakita sila kanako.”

Gigakos ni Mama si Annie. “Hinumdomi nga si Tami anaa pod didto.”

“Dili ko sama ni Tami,” miingon si Annie. Gitan-aw niya ang iyang igsoong babaye. “Maayo ka sa pagpakig-istorya sa mga tawo.”

“Nasayod ko nga lisod nga moadto sa usa ka bag-o nga klase,” miingon si Tami. “Apan magtinabangay kita niini. Nahadlok pod ko sa dihang nagsugod ko sa Young Women.”

Mitan-aw si Annie kang Tami sa dakong katingala. Si Tami ingon og maisogon kaayo kanunay! Mi-try out gani siya sa musical sa iyang eskwelahan ug nakakuha sa labing mahinungdanon nga papel. Si Annie wala nagbuhat og mga butang nga sama niana. Naningkamot lang siya nga dili mabantayan.

“Apan dili man gayod ka mahadlok,” miingon si Annie.

Mipahiyom si Tami. “Siyempre mahadlok man gyod ko! Nahadlok ko sa dihang mi-try out ko alang sa musical. Kahibalo ka unsay akong gibuhat?”

Milingo-lingo si Annie.

“Nag-ampo ko og gibuhat ang akong labing maayo. Ug gitabangan usab nako ang ubang mga bata. Ingon og daghan kanila kay nahadlok sama lang kanako. Ang pagtabang sa uban nga mahimong maisogon nakatabang kanako nga mahimong maisogon.”

Naghunahuna si Annie mahitungod niana. Mabuhat kaha niya ang unsay gibuhat ni Tami ug tabangan ang ubang bata nga mga babaye diha sa iyang klase nga dili mahadlok?

“Sa imong hunahuna makaadto ba ka sa Young Women karon?” Nangutana si Mama.

Miginhawa og lawom si Annie. Dayon mitando siya. Mahimo niya kini.

Milakaw si Annie ug Tami paingon sa lawak klasehanan sa Young Women. Gitan-aw ni Annie ang ubang bata nga mga babaye. Ang uban kanila makita nga gikulbaan sama kaniya. Gilubid ni Julie ang usa ka lugas sa buhok palibot sa iyang tudlo samtang gikitkit ni Erica ang iyang mga kuko.

Naghunahuna si Annie kon unsaon niya sa pagtabang kanila. Miadto siya aron makigtupad ni Julie. “Gikulbaan pod ba ka?” Mihunghong si Annie. “Ma-OK ra kini.”

Mipahiyom si Julie, ug mibalos og pahiyom si Annie. Wala na kaayo mahadlok si Annie karon. Tingali mahimong nindot gayod ang Young Women.

Mga paghulagway pinaagi ni Toby Newsome