“Ang mga Tryout,” Higala, Nob. 2023, 30–31.
Ang mga Tryout
Si Jared nasayod nga si Jesukristo anaa sa iyang habig.
Kini nga istorya nahitabo sa France.
Gi-dribble ni Jared ang bola latas sa korte. Ang mga magdudula midagan palibot kaniya, ang ilang mga sapatos nagsagitsit sa salog.
“Libre ko!” Nanawag si Gabriel.
Gipasa ni Jared ang bola ngadto ni Gabrile ug nagpadayon sa pagdagan. Dayon gipasa ni Gabriel og balik ang bola. Giitsa ni Jared ang bola ngadto sa ring.
SWOOSH!
Misulod kini!
“Nindot imong pagdula, Jared,” miingon ang iyang coach human sa dula. “Kahibalo ka, duha na lang ka semana ang mga tryout alang sa rehiyonal nga team.”
Mingisi si Jared. Pipila lang ka magdudula ang gidapit nga mo-try out alang niana nga team.
“Sa Dominggo ang mga tryout,” miingon ang coach. “Sa imong hunahuna makaadto kaha ka?”
Ang kahinam ni Jared daling nawala sama sa pag-abot niini.
“Sa Dominggo?” Nangutana si Jared.
“Oo. Problema ba kana?”
Naghunahuna si Jared mahitungod niini. Kini mao ang iyang kahigayonan nga modula sa usa ka maayo kaayo nga team! Apan ang mga Dominggo mao ang panahon nga mosimba siya ug motutok sa Manluluwas.
“Ang mga Dominggo usa ka espesyal nga adlaw alang nako,” miingon si Jared. “Apan makigsulti ko sa akong mga ginikanan mahitungod niini.”
Nianang gabhiona, milingkod si Jared diha sa iyang higdaanan uban sa iyang mga ginikanan. Giitsa-itsa niya sa hangin ang bola sa basketbol samtang naghunahuna siya. “Gusto gyod kong mo-try out alang sa team,” giingnan niya si Mama ug Papa. “Apan dili ko gustong buhaton kini sa Dominggo. Nasayod ko nga ang Dios mas importante kay sa basketbol.”
“Unsay among mabuhat aron makatabang?” Nangutana si Mama.
Gituyok ni Jared ang bola diha sa iyang mga kamot. “Mahimo ba kitang mag-ampo og dungan?”
Gipadaplin niya ang iyang bola sa basketbol ug miluhod uban ni Mama ug Papa. “Minahal nga Langitnong Amahan,” miingon siya, “Gusto gyod ko nga mo-try out alang niini nga team sa basketbol. Apan ang mga tryout kay sa Dominggo! Nasayod ko nga ang Dominggo mao ang adlaw nga akong ihatag Kanimo. Unsay akong mahimo?”
Human sa pag-ampo, mibati si Jared og makahupay nga pagbati.
“Unsay imong gibati?” Nangutana si Mama.
“Dili ko moadto kon ang mga tryout kay sa Dominggo,” miingon siya. “Apan aduna akoy pagbati nga mahimong OK ra ang tanan.”
Paglabay sa duha ka adlaw, ang mama ni Jared nakadawat og email. Miingon kini nga ang mga tryout kay sa Sabado na hinuon!
Maka-try out si Jared ug makabalaan sa adlaw nga igpapahulay! Nasayod siya nga ang Langitnong Amahan nakadungog sa iyang pag-ampo.
Sa misunod nga duha ka semana, si Jared nagbansay og basketbol kutob sa iyang mahimo. Sa dihang miabot ang importante nga adlaw, gihimo ni Jared ang iyang labing maayo. Paspas siyang midagan taliwala sa mga pagdula, naka-iskor sa kadaghanan sa iyang mga itsa, ug miabiba alang sa iyang mga kauban.
“Ang mosunod nga mga magdudula mopadayon sa mga tryout alang sa team,” miingon ang coach human sa unang hugna. “Palihog paminawa ang inyong ngalan.”
Naglagubo og maayo ang kasingkasing ni Jared. Gitawag sa coach ang usa ka ngalan. Dayon laing ngalan. Ug lain pa. Gibati ni Jared nga nagsugod sa pagkawala ang iyang paglaom nga makaapil sa team.
Sa wala madugay natapos sa coach ang lista. Wala niya gitawag ang ngalan ni Jared. Dili na mopadayon ni Jared ngadto sa sunod nga hugna sa mga tryout.
Milingkod si Jared sa bangko sa gawas sa gym ug mitutok sa iyang mga sapatos. Naningkamot gayod siya og maayo. Apan mora og ang tanan niya nga paningkamot walay kapuslanan.
Sa dihang gikuha siya ni Mama, milingo-lingo si Jared. “Wala ko makaapil sa team.”
Gigakos siya og maayo ni Mama. “Pasayloa ko nga wala mahitabo ang atong gusto,” miingon siya.
Miginhawa og lawom si Jared. Dayon, usa ka makapahupay nga hunahuna ang misantop kaniya.
“Ang mga butang dili kanunayng mahitabo sa paagi nga akong gusto,” miingon siya. Apan si Jesukristo nasayod gayod kon unsay akong gibati. Modapig Siya nako.”
Mipahiyom si Mama. “Husto ka! Nasayod gayod siya kon unsay imong gibati.”
Mipahiyom og balik si Jared. Naguol gihapon siya, apan miarang-arang ang iyang gibati nga nasayod nga ang Manluluwas nakasabot kon unsa ang iyang gibati. Nasayod si Jared nga si Jesus kanunayng mohigugma ug mosuporta kaniya.
Mga paghulagway pinaagi ni Britain Morris