“Pagkamabination alang sa Pasko,” Higala, Dis. 2023, 4–5.
Pagkamabination alang sa Pasko
“Pwede rang ilaha na ang akong paniudto,” miingon siya.
Kini nga istorya nahitabo sa Japan.
Gitabangan ni Akari ang iyang manghod nga babaye, nga si Miori, sa pagpahiluna sa ilang Belen [Nativity set]. Ganahan siya nga mag-andam alang sa Pasko.
Ang pigura [figure] sa batang si Jesus nangab-ot gikan sa pasongan nga may pahiyom sa Iyang nawong. Mipahiyom usab si Akari. Nakapahunahuna kini kaniya kon unsa ka dako ang paghigugma ni Jesus kaniya. Daghang tawo sa Japan ang wala magsaulog sa pagkatawo ni Jesukristo sama sa gibuhat sa pamilya ni Akari. Apan sa gihapon nanghatag sila og mga regalo ug migahin og panahon kauban ang pamilya atol sa Pasko.
Mibagting ang telepono ni Papa. Gitubag niya kini ug nakig-istorya og kadiyot. “Salamat sa pahinumdom,” miingon siya. “Magkita ta sa buntag sa Pasko.” Gibutang niya ang telepono.
“Moadto ka ba sa proyekto sa pagserbisyo?” Nangutana si Akari.
“Husto kana,” miingon si Papa. “Moadto ko sa Tokyo aron motabang sa paghatag og pagkaon ngadto sa mga tawo nga walay mga panimalay. Pipila ka tawo sa atong ward motabang kada tuig.”
“Pwede ba kong mouban karon?” Nangutana si Akari.
“Sige ba!” Miingon si Papa. “Makauban usab si Miori.”
Sa buntag sa Pasko, ang pamilya ni Akari mimata og sayo aron sa pag-abli sa mga regalo. Ganahan kaayo si Akari sa iyang regalo! Mahinamon siya nga modula niini unya.
Si Mama miputos og mga paniudto alang sa tanan ug nanamilit nga migakos kanila. Dayon si Akari, si Papa, ug si Miori misakay sa tren.
Sa dihang naabot ang tren sa Tokyo, gigiyahan ni Papa si Akari ug Miori ngadto sa usa ka parke nga adunay daghang tolda ug mga tawo.
“Kini mao ang mga tawo nga atong gianhi aron sebisyohan,” miingon si Papa. “Wala kaayo silay pagkaon, ug ang pagbaton og pagkaon alang sa Pasko mahimong usa ka panalangin kanila.”
Usa ka grupo sa mga tawo ang mipahiluna og mga pan, mga panaksan sa noodles, ug mga dessert diha sa mga lamesa. Nakakita si Akari og pipila ka bata nga iyang kaedad nga mitabang usab.
“Kining tanan ba nga mga tawo gikan sa atong simbahan?” Nangutana si Akari ni Papa.
“Dili tanan,” miingon si Papa. “Dili ba kana nindot kaayo kon unsa ka daghan sa mga tawo ang gustong motabang?”
Si Akari, Miori, ug Papa mibutang og mga pagkaon sulod sa mga putos. Dayon mitabang sila sa paghatag sa mga pinutos ngadto sa mga tawo nga naglinya. “Malipayong Pasko,” miingon si Akari sa matag tawo.
Sa wala madugay nahurot ang mga pinutos. Apan sa gihapon duna pay mga tawo nga naglinya nga naghulat og pagkaon!
Nagmug-ot si Papa. “Tingali dili paigo.” Miatubang siya sa mga tawo nga naghulat. “Pasayloa ko. Nahutdan na kami og pagkaon.”
Dili gusto si Akari nga molakaw kadto nga mga tawo nga walay pagkaon. Aduna bay butang nga iyang mabuhat?
“Pwede rang ilaha na ang akong paniudto,” miingon siya.
“Maayo nga ideya!” Miingon si Papa. “Ipakigbahin natong tanan ang atong mga paniudto.” Mitando ang ubang mga tigtabang. Gipagawas nila ang para paniudto nga ilang gidala alang sa ilang kaugalingon. Ang tanang tawo diha sa linya nakakuha og pagkaon!
Medyo gigutom si Akari, apan OK lang kana. Ang mga tawo nga didto sa parke mas nagkinahanglan og pagkaon kaysa kaniya.
“Mapasigarbohon ko nimo,” miingon si Papa pagsakay nila sa tren pauli. “Nindot kaayo nga imong gipakigbahin ang imong pagkaon.”
“Mao kana ang unsay buhaton ni Jesus,” miingon si Akari.
Si Akari mibati nga mainiton ug malipayon sulod sa tibuok adlaw. Ug dili lang tungod kay Pasko kadto! Malipayon siya nga nahimo niya ang pagpakigbahin sa gugma sa Manluluwas.
Paghulagway pinaagi ni Amanda Yoshida