“Kanunayng Magkauban,” Higala, Dis. 2023, 40–41.
Kanunayng Magkauban
Malipayon si Amir nga maselyo sa iyang pamilya sulod sa templo.
Kini nga istorya nahitabo sa Italy.
Gigunitan ni Amir ang kamot ni Mama samtang naglakaw sila sa tugpahanan sa eroplano sa Rome, Italy. Bag-ohay lang sila misakay sa eroplano gikan sa ilang panimalay sa Greece. Mangadto sila sa templo aron maselyo isip usa ka pamilya! Ang iyang magulang nga babaye miabot gani gikan sa layong dapit aron maselyo siya ngadto kanila.
“Asa si Lola?” Nangutana si Amir, nga nagtan-aw-tan-aw sa palibot. Nag-untol-untol siya nga nagkinto og gamay. Mahinamon kaayo siya!
“Makit-an ra nato siya,” miingon si Mama.
Si “Lola” dili gayod mao ang lola ni Amir, apan ganahan siyang maghunahuna kaniya sa ingon niana nga paagi. Sama siya sa iyang misyonaryo nga anghel! Mitabang siya sa iyang pamilya nga magkat-on mahitungod sa ebanghelyo. Ug karon nagtabang siya kanila nga moadto sa templo alang sa unang higayon!
“Tua ra siya!” Misinggit si Amir. “Kumusta, Lola!”
Gikaway ni Amir ang iyang bukton. Mikaway og balik si Sister Bush uban sa dako nga pahiyom. Miduol siya ug gigakos si Amir. “Andam ka na ba?”
“Oo!” Miingon si Amir.
Mitawag og taksi si Sister Bush aron ihatod sila sa templo. Misakay si Amir tupad sa iyang igsoong babaye. Sa wala madugay miliko sa eskina ang taksi, ug si Amir makakita na sa templo. Dako kaayo kini ug nindot kaayo.
“Mas nindot pa kining tan-awon kaysa mga litrato!” Miingon si Amir.
Si Amir ug ang iyang pamilya milakaw libot sa templo ug mikuha og pipila ka litrato. Dugay na kaayo silang nangandoy niini nga adlaw.
Sa dihang panahon na nga mosulod, gibati ni Amir nga daw naglakaw siya pasulod sa langit. Ang sulod limpyo ug hayag. Ang mga worker sa templo buotan kaayo. Gibati ni Amir nga ingon og ang Langitnong Amahan nagtan-aw kaniya. Mibati siya nga luwas.
Naghulat si Amir samtang ang iyang mga ginikanan ug igsoong babaye miadto sa lahi nga bahin sa templo. Duha ka mabination nga mga worker sa templo ang nagpaabot uban niya ug mihatag kaniya og puti nga mga sinina nga isul-ob. Gipakita nila siya og usa ka bidyo mahitungod ni Jesukristo. Mibati siya nga malinawon.
Sa dihang oras na, ang mga worker sa templo migiya kaniya sa taas. Nangita si Amir ni Jesus diha sa mga painting. Nakapalipay kaniya nga mahibalo nga anaa siya sa balay sa Dios.
Matahom ang lawak nga ilang gisudlan. Usa ka dako, nagkidlapkidlap nga kahayag ang nagbitay gikan sa kisami. Duha ka dagko nga mga salamin ang nag-atubang sa usag usa diha sa mga bungbong. Ang iyang pamilya naghulat nang daan didto.
Si Mama ug Papa miluhod sa usa ka altar nga gitabonan og humok nga tela ug naggunitay sa mga kamot. Mihangyo ang usa ka worker sa templo kang Amir ug sa iyang igsoong babaye sa pagluhod sa altar uban kanila. Kini mabati nga ingon og magkauban silang naghiusa human nga nabulag sa taas nga panahon.
Nakahilak si Amir og mga luha sa kalipay. Ang iyang pamilya makita nga malipayon usab. Nasayod siya nga ang mainiton nga pagbati mao ang Espiritu Santo. Malipayon siya nga silang tanan nagkauban didto.
Sa dihang panahon na nga mobalik sa Greece, nanamilit nga gigakos ni Amir ang iyang magulang nga babaye. Naguol siya nga mobiya na sila. Apan nasayod siya nga tungod sa templo, ugma damlag sila kanunayng magkauban.
Mga paghulagway pinaagi ni Toby Newsome