“Ang Puti nga Medyas,” Higala, Dis. 2023, 36–37.
Ang Puti nga Medyas
Wala magtuo si Chakell nga mausab gayod ang iyang igsoon nga lalaki.
Kini nga istorya nahitabo sa USA.
Gikataw-an ni Chakell ang binuang nga mga litrato sa iyang igsoon nga babaye. Bisperas kadto sa Pasko, ug siya ug ang iyang pamilya nagdula og usa ka drowing-drowing palibot sa halingan.
Ang Bisperas sa Pasko ang paborito nga adlaw ni Chakell sa tibuok tuig. Mibati siya nga komportable ug malipayon human sa tanang lami nga pagkaon ug pagkatawa. Dili siya gusto nga matapos kini!
“Sige,” miingon si Mama. “Panahon na alang sa puti nga medyas!”
Mingisi si Chakell. Ang Bisperas sa Pasko mao ang iyang paborito nga adlaw, ug kini mao ang usa sa iyang paborito nga mga tradisyon.
Sa dapit diin siya nagpuyo, ang mga tawo magbitay og dagko, nindot nga mga medyas dapit sa halingan atol sa Pasko. Pagkabuntag sa Pasko, mapuno kini og lamian nga mga pagkaon! Apan kini nga medyas espesyal kaayo. Si Chakell ug ang iyang pamilya mopuno niini og mga gasa alang kang Jesus.
Mipagawas si Mama og matahom nga puti nga medyas nga adunay bulawan nga sidsid. Dayon gihatagan niya ang matag tawo og gamay nga piraso sa papel ug usa ka lapis. “Isulat ang usa ka butang nga gusto ninyong isaad kang Jesus sunod tuig,” miingon siya.
“Dayon ibutang nato kini diha sa medyas, ug basahon nato kini sunod tuig inig ka Bisperas sa Pasko,” midugang si Papa. “Apan una, basahon nato ang atong mga saad sa miaging tuig.”
Gikuot niya ang medyas ug gipagawas ang gagmay nga mga piraso sa papel gikan sa miaging tuig. Gihatag niya kini, ug si Chakell hilom nga mibasa sa iyaha: “Mas motabang ko sa panimalay.” Nagtuo siya nga maayo ang iyang nabuhat bahin niana niini nga tuig. Apan unsa man ang iyang isulat niining higayona?
“Kahibalo ko kon unsay akong isulat!” malipayon nga misulti ang iyang igsoon nga babaye.
Si Chakell naghunahuna unsa ang iyang ikahatag kang Jesus. Unsa ang iyang mas maayo nga mabuhat sunod tuig aron mahimong mas sama Kaniya? Unsa ang Iyang gustong ipabuhat kaniya?
Mao kadto dihang nakita niya ang iyang magulang nga lalaki, si Braeden, nga nagsulat og usa ka butang diha sa iyang piraso sa papel.
Nagmug-ot si Chakell. Dili siya makakita kon unsa ang iyang gisulat, apan segurado siya nga dili kini bisan unsa nga butang nga buhaton gayod niya.
Si Braeden sungogan kaayo ni Chakell, ug dili kaayo maayo ang ilang pagtagad sa usag usa niining tuiga. Gihigugma niya ang iyang magulang nga lalaki, apan wala siya magtuo nga maningkamot gayod siya [Braeden] nga mahimong mas sama ni Jesus.
Nganong maldito man kaayo siya nako? naghunahuna siya.
Nagtan-aw siya ni Braeden samtang nagpilo si Braeden sa iyang papel ug misulod niini sa puti nga medyas.
Nakita ni Braeden nga nagtutok siya ug mipahiyom. “Ayaw og lili,” miingon siya.
Mitan-aw og balik si Chakell sa iyang papel ug misulat, “Maningkamot kong mahimong buotan sa tanan niining tuiga.” Dayon gibutang usab niya ang iyang papel sulod sa medyas.
Sa wala madugay oras na aron matulog. Apan dili makahunong og hunahuna si Chakell mahitungod sa unsay gisulat ni Braeden. Kinahanglang walay bisan kinsa nga mobasa sa saad sa laing tawo ngadto ni Jesus, apan gusto gayod siya nga makahibalo!
Samtang ang uban nangandam nga matulog, miyuhot si Chakell ngadto sa puti nga medyas. Nakit-an niya ang piraso sa papel ni Braeden ug giablihan kini.
“Mosaad ako nga mahimong mas mabination ngadto ni Chakell karong tuiga,” miingon kini.
Dili siya makatuo niini. Mao ba gayod kini ang gisulat ni Braeden? Nabati niya ang mga luha sa iyang mga mata ug mainampingong gisulod og balik ang papel ngadto sa medyas.
Si Mama kanunayng misulti nga ang pagbaton og hugot nga pagtuo kang Jesukristo makatabang ni bisan kinsa nga mag-usab ug mahimong mas sama Kaniya. Tingali husto siya. Tingali makatabang gayod si Jesus kang Braeden ug kaniya nga mahimong mas buotan ngadto sa usag usa.
Pagkasunod buntag samtang milingkod si Chakell alang sa pamahaw, mibati gihapon siya og kainit sa sulod. Sa dihang nanaog si Braeden sa hagdanan siya migakos kaniya og maayo.
Misiga ang mga mata ni Braeden. “Uy, para unsa ni?”
“Gusto lang kitang gakson,” miingon siya. “Malipayong Pasko!”
Mingisi si Braeden ug migakos kaniya og balik. “Malipayong Pasko.”
Mga paghulagway pinaagi ni Kevin Fales