“Pag-ampo diha sa Playground,” Higala, Dis. 2023, 30–31.
Nag-ampo diha sa Playground
Ang pagpaningkamot sa pagkat-on og Iningles naghatag og labad sa ulo ni Davi!
Kini nga istorya nahitabo sa England.
Mahinamon si Davi alang sa panahon sa tingduwa. Naningkamot siya pag-ayo sa pagpaminaw sa iyang magtutudlo, si Miss Taylor. Apan naglisod siya sa pagsabot sa gisulti ni Miss Taylor sa Iningles. Nakapalabad kini sa ulo ni Davi.
Ang pamilya ni Davi bag-o lang mibalhin gikan sa Brazil ngadto sa England. Siya adunay bag-ong balay ug bag-o og eskwelahan. Apan ang kinadak-an nga kausaban sa tanan mao nga si Davi karon adunay bag-ong pinulongan nga angay kat-onan! Gimingaw siya sa iyang naandan nga panimalay. Gimingaw siya sa iyang tanang higala nga makasulti og Portuguese sama niya.
Si Miss Taylor mipakpak sa iyang mga kamot. “Panahon na sa tingdula!” miingon siya.
Si Davi miambak gikan sa iyang gilingkoran. Nakahibalo siya niana nga pulong! Mahimo siyang mokaon og lamian nga pagkaon ug magdula sa mga duyan. Ug makapahulay siya gikan sa pagkat-on og Iningles.
Kon si Davi mogawas, ang uban nga mga bata mag-una niya sa pagdagan aron magdula. Managhigala na sila. Ug silang tanan parehas na og pinulongan. Sa dihang si Davi misulay sa pagpaminaw nila, ang iyang utok milabad na usab. Gibati gayod niya nga nag-inusara.
Maayo unta nga ako adunay usa ka higala, hunahuna ni Davi. Unsay akong buhaton?
Nakahinumdom si Davi sa unsay gisulti sa iyang mama ug papa. “Mahimo ka nga mag-ampo bisan kanus-a, bisan asa, ug ang Langitnong Amahan maminaw kanimo,” miingon sila.
Usa kini ka perpektong higayon sa pag-ampo!
Mitan-aw si Davi sa palibot sa playground. Nakakita siya og usa ka kahoy nga balay-balay. Misulod si Davi. Hilom kadto didto. Miluhod siya, ug gikyugpos niya ang iyang mga bukton ug gipiyong ang iyang mga mata.
“Minahal nga Langitnong Amahan, gusto kong makigdula sa ubang mga bata. Gusto kong makakat-on og Iningles. Palihog tabangi ko.”
Sa dihang nahuman na siya sa pag-ampo, si Davi mibati og kainit, kamalinawon sa iyang kasingkasing. Nasayod siya nga bisan kon siya wala pay daghang higala, ang Langitnong Amahan kanunay nga iyang higala.
Human sa tingdula, si Davi mibalik sa lawak klasehanan. Lisud pa gihapon ang pagsabot sa Iningles. Apan mihukom siya nga magpadayon sa pagpaningkamot!
Sulod sa mga semana si Davi nagpraktis. Nagbasa siya og daghang istorya nga Iningles. Naminaw siya ni Miss Taylor. Nagpraktis usab siya sa pagpakig-istorya sa ubang mga bata.
Sa matag higayon si Davi mobati og kaguol, mag-ampo siya. Sa matag higayon nga ang iyang ulo molabad sa pagpaningkamot sa pagkat-on og Iningles, mag-ampo siya. Ug sa matag higayon nga nag-ampo siya, ang Langitnong Amahan mitabang kaniya nga mobati og kalinaw. Siya mibati nga mahimo siya nga mopadayon sa pagpaningkamot.
Gani dugang pang mga semana ang milabay. Nagkasayon na ang pagsabot ni Miss Taylor. Si Davi misugod na sa pagpakighigala ug pakig-istorya kanila. Nakadaog pa gani siya og primyo sa eskwelahan tungod sa pagpaningkamot og maayo ug sa pagbasa og maayo!
Usa ka adlaw usa ka bag-ong estudyante miabot sa eskwelahan sa klase ni Davi. Iyang ngalan mao si Leo. Gikan siya sa laing nasod ug dili kaayo makahibalo og Iningles.
Sa tingdula, nakita ni Davi si Leo nga naglingkod sa duyan nga nag-inusara. Magul-anon siyang tan-awon. Nakahinumdom si Davi kon unsa ka mingaw ang iyang gibati sa dihang siya bag-o pa. Gusto niya nga mamahimong higala ni Leo.
Midagan si Davi ngadto ni Leo. “Kumusta. Ako si Davi.” Iyang gipataas ang football. “Ganahan kang magdula?”
Mitando si Leo ug mikanaog sa duyan.
Si Davi mibati og kainit sa kahiladman. Nalipay siya nga nahimo siya nga higala ngadto ni Leo, sama sa Langitnong Amahan nga usa ka higala ngadto niya.
Mga paghulagway ni Maja Andersen