“Pag-ihap sa mga adlaw paingon sa Pasko,” Higala, Dis. 2023, 10–11.
Pag-ihap sa mga adlaw paingon sa Pasko
Ang paborito nga tradisyon ni Mathis mao ang pagpasiga sa mga kandila alang sa Pasko.
Kini nga istorya nahitabo sa Germany.
“Mathis! Emilian!” Nanawag si Mama. “Panahon na nga pasigahon ang mga kandila sa lukong [wreath].”
Gibutang ni Mathis ang iyang libro ug midagan paingon sa sala. Ang iyang manghod nga lalaki, si Emilian, misunod kaniya.
Adunay daghang butang nga ganahan ni Mathis mahitungod sa Pasko. Ganahan siya nga maghimo og lebkuchen nga mga biskwit. Ganahan siya nga dayan-dayanan ang kahoy. Apan ang iyang paborito nga bahin mao ang pagpasiga sa mga kandila aron mangandam alang sa Pasko.
Gitawag nila kini nga ang lukong sa Pag-abot. Ang lukong adunay upat ka pula nga kandila nga gipahimutang sa berde nga mga sanga. Sa Germany, pasigahon sa mga tawo ang mga kandila matag Dominggo sa bulan sa bisperas sa Pasko. Sa unang semana, pasigahon nila ang usa ka kandila. Sa sunod semana, pasigahon nila ang duha. Sa ikatulo, pasigahon nila ang tulo. Ug sa Dominggo sa dili pa ang Bisperas sa Pasko, pasigahon nila ang tanang upat.
Gitan-aw ni Mathis si Papa nga gitabangan si Emilian sa pagpasiga sa duha ka kandila. Ang hayag nga mga kalayo makita nga ingon og malipayon.
“Mama, unsay buot ipasabot sa pag-abot?” Nangutana si Mathis.
“Ang pag-abot mao ang panahon sa dili pa ang Pasko,” miingon si Mama. “Ang mga kandila motabang kanato sa pag-ihap sa mga adlaw. Ug mao usab ang atong mga kalendaryo sa Pag-abot!”
Gikab-ot ni Mama ang matahom nga kahoy nga balay sa ibabaw sa butanganan sa mga libro. Iya kining gibutang sa lamesa. Nagmahinamon si Mathis nga nakakita lang niini.
Sila adunay duha ka kalendaryo sa Pag-abot niining tuiga. Dili kini regular nga mga matang sa kalendaryo. Espesyal kini nga mga matang, alang lamang sa Pasko! Ang una usa ka gamay nga kahoy nga balay nga adunay 24 ka pultahan—usa alang sa matag adlaw sa dili pa ang Pasko.
“Imo nang turno sa pag-abli og usa ka pultahan!” Miingon si Mama.
Mingisi si Mathis ug giablihan ang pultahan alang karong adlawa. Adunay duha ka gagmay nga kendi sa sulod! Gihatag niya ang usa kang Emilian.
“Kahibalo ka,” miingon si Papa, “ang pag-abot nagpasabot usab sa pag-anhi sa usa ka tawo o usa ka butang nga importante. Nakahinumdom ba kamo kang kinsang pag-anhi ang atong gisaulog sa Pasko?”
“Jesus!” Nagdungan og sulti si Mathis ug Emilian.
Mitando si Mama. “Ang mga tawo nagpaabot og liboan ka tuig alang sa pag-anhi ni Jesukristo. Atong gisaulog ang Iyang pagkatawo atol sa Pasko. Ug ugma damlag, moanhi Siya pag-usab sa kalibotan.”
Gihanduraw ni Mathis kon unsa kaha ang pagbati kon moanhi pag-usab si Jesus. Mibati siyag kainit sa sulod.
“Ablihi ang laing kalendaryo, Mathis!” Miingon si Emilian.
“OK!” Gikab-ot ni Mathis ang ikaduhang kalendaryo. Gihimo kini ni Oma (Lola) alang gayod kanila. Usa kadto ka sab-itanan nga adunay 24 ka tag-as nga laso nga nagbitay gikan niini. Ang matag laso adunay gipilo nga piraso sa papel nga adunay usa ka kasulatan mahitungod ni Jesukristo nga gihigot niini. Matag adlaw sa dili pa ang Pasko mobasa sila og usa ka kasulatan mahitungod ni Jesus.
Gibira ni Mathis ang sunod nga papel gikan sa laso. “Ania ako nagdalag maayong balita alang kaninyo nga makalipay kaayo sa tanang katawhan,” iyang gibasa. “Kay karong gabhiona, natawo sa lungsod ni David ang inyong Manluluwas, ang Kristo nga Ginoo.”*
Mibati nga malinawon si Mathis samtang siya ug ang iyang pamilya mitan-aw sa mga kandila nga midan-ag. Sulod sa duha ka semana, ilang pasigahon ang tanang upat ka kandila, ug ang paghulat alang sa Pasko matapos na! Apan nasayod si Mathis nga ang Pasko dili lamang ang bugtong nga butang nga ilang gipaabot. Naghulat sila nga moanhi si Jesukristo.
Mga paghulagway pinaagi ni Violet Lemay