French Toast alang sa Tanan

Ni Pollyanna Mattos Vecchio

(Gibase sa usa ka tinuod nga istorya)

Usa lang ka gamay nga pagserbisyo sa Pasko nakatabang nila nga makakaplag og bag-ong higala.

Kini nga istorya nahitabo sa Brazil.

Si Rebeca naggunit sa kamot sa iyang igsoong babaye. Miambak sila gikan sa sofa ug milagubo ang carpet. Ang duha ka batang babae miagik-ik.

“Mas taas pa!” Miingon si Melissa.

“Mga bata, ayaw pag-ambak-ambak sa balay. Dili ta gusto nga makatugaw ni Miss Daisy og ingon niini ka sayo,” nagtawag si Mama gikan sa kusina.

Nagmug-ot sila si Rebeca ug Melissa ug nanglingkod. Bag-o lang silang nakabalhin sa bag-o nga apartment. Si Miss Daisy mao ang silingan nga nagpuyo sa ilang silong.

“Nakakita na ba ka ni Miss Daisy?” Gipangutana ni Melissa si Rebeca.

“Wala. Pero nahadlok ko niya. Nakadungog ko nga dili siya ganahan og mga bata,” miingon si Rebeca.

Misiga ang mga mata ni Melissa. “Apan unsaon na lang ang atong French-toast nga tradisyon?”

Ang Bisperas sa Pasko pipila na lang ka adlaw. Ang paborito nila ni Rebeca ug Melissa nga tradisyon sa pamilya mao ang paghimo og French Toast isip usa ka pahalipay nga dalit [treat] alang sa tanan nilang mga silangan. Kini nga tuig mahimong espesyal tungod kay kini ang ilang unang higayon nga mohimo niini diha sa ilang bag-ong panimalay.

“Tingali labyan ra nato ang pultahan ni Miss Daisy,” miingon si Rebeca.

Sa Bisperas sa Pasko, ang mga batang babaye nangmata nga mahinamon sa paghimo og French toast.

Mitabang si Rebeca ni Papa nga mobatil sa mga itlog, gatas, asukal, ug cinnamon. Gituslob ni Melissa ang pan ngadto sa binatil nga itlog. Dayon ilang giluto ang pan. Sa wala madugay, ang ilang tibuok apartment nanimahong sama sa cinnamon.

Sa kataposan, ilang gibutang sa mga bag ang French toast ug gisulatan sa mga ngalan sa ilang mga silingan ang matag usa.

Gisira ni Rebeca ang kataposan nga bag. “Andam na!” miingon siya.

Giihap ni Papa ang mga bag ug gisusi ang tanan nga mga ngalan. “Wala nako makit-i ang usa nga para ni Miss Daisy,” miingon siya.

Nagtinan-away sila si Rebeca ug Melissa sa usag usa.

“Dili kami ganahan nga mohatag og usa ngadto niya,” miingon si,” Rebeca. “Dili siya ganahan og mga bata.”

Nagmug-ot si Papa. “Ang atong tradisyon mao ang pagpaambit ngadto sa tanang silingan. Di ba kaha kinahanglan nga maghimo ta og usa alang kang Miss Daisy?”

Si Rebeca ug si Melissa nasayod nga sakto si Papa. Gisudlan nila ang usa pa ka bag ug gisulatan og “Miss Daisy” diha niini.

Gidala nila ang mga bag ngadto sa matag silingan. Sa kataposan, miabot sila sa pultahan ni Miss Daisy.

Unsa kaha no kon dili siya ganahan sa pahalipay nga dalit [treat]? Unsa kaha kon singkahan niya sila?

Ang mga batang babaye miginhawa og lawom. Dayon gitoktok nila ang pultahan.

“Kinsa man kana?” Nangutana si Miss Daisy. Miabli siya sa pultahan ug mitan-aw kanila. Siya adunay mubo nga puting buhok. Dili siya hadlok tan-awon.

Sa makadiyot, si Rebeca ug Melissa wala masayod unsay isulti.

“Kami ang mga silingan nimong nagpuyo sa taas,” miingon si Rebeca.

Gitunol ni Melissa ang bag. “Nagdala kami og French toast alang kanimo. Malipayong Pasko!”

“Oh, salamat! Ganahan ko og French toast.” Gikuha ni Miss Daisy ang bag. “Kamo diay ang akong bag-ong mga silingan? Gusto ko nga mahimamat kamo, apan nagtuo ko nga dili mo ganahan og mga tigulang nga sama nako.”

Nagtinan-away sila si Rebeca ug Melissa nga misiga ang mga mata. “Kami nagtuo nga dili ka ganahan og mga bata!” Miingon si Rebeca.

Mikatawa si Miss Daisy. “Mahal nako ang mga bata! Dali dayon. Pakit-on ko kamo sa mga litrato sa akong mga apo.”

Misulod silang tanan sa apartment ni Miss Daisy. Adunay mga bulak bisan asa ug daghang litrato sa pamilya.

“Lingkod. Mao pa gyod paghimo nako og juice sa passionfruit,” miingon si Miss Daisy. Giipisan niya og juice ang mga baso. “Tingali sakto kaayo ni nga ipares niining lamian nga French toast.”

Ang mga batang babaye ug ang ilang mga ginikanan midawat sa mga baso sa juice. Pagkalami niadto!

Nahibaloan nila ang mga ngalan sa mga apo ni Miss Daisy. Naminaw pa gani sila sa musika sa Pasko kauban niya.

Si Rebeca ug si Melissa nasayop mahitungod ni Miss Daisy. Buotan siya. Ug makalingaw usab! Ang French toast sa Pasko mao ang talagsaon nga tradisyon. Niining tuiga, nakatabang kini nila nga makahimo og usa ka bag-ong higala.

Mga paghulagway pinaagi ni Shawna J. C. Tenney