Hello gikan sa New Zealand!

Kat-oni ang mahitungod sa mga anak sa Langitnong Amahan sa tibuok kalibotan.

Ang New Zealand usa ka isla nga nasod sa Kadagatan sa Pasipiko. Mga 5 milyon ka tawo ang nagpuyo didto.

Mga templo

Ang New Zealand adunay usa ka templo, nga adunay duha pa nga gitukod! Ang Hamilton New Zealand Temple mao ang unang templo nga natukod sa habagatang katunga sa kalibotan.

Christmas Tree sa New Zealand

Ang pōhutukawa nga kahoy adunay pula nga mga bulak nga mamulak lang atol sa ting-ingit sa panahon sa Pasko. Ang mga tawo mogamit sa mga bulak aron idayan-dayan alang sa Pasko.

Mga pinulongan

Ang opisyal nga mga pinulongan sa New Zealand mao ang Iningles, Māori, ug New Zealand Sign Language. Ang Māori mao ang pinulongan sa unang katawhan nga miabot sa New Zealand.

Aron mosulti og higala sa Māori, kamo moingon og, “hoa”!

Hāngī

Ang Māori nga katawhan usahay moluto sa ilang pagkaon gamit ang usa ka hāngī. Ilang ibutang ang mga bukag sa karne ug mga utanon ibabaw sa gipainit nga mga bato diha sa usa ka lungag sa yuta. Dayon tabonan nila kini ug hulaton nga maluto.

Mga penguin

Ang kinagamyan nga penguin sa kalibotan, ang gamay nga asul nga penguin, nagpuyo sa New Zealand ug sa Australia. Daghang uban pa nga mga penguin ang nagpuyo usab subay sa baybayon sa New Zealand!

Kalihokan

Paghablon og Lino

Ang Māori nga katawhan maghablon og harakeke nga mga dahon aron makahimo og art. Makahimo kamo og inyong kaugalingon nga hinablon nga art gamit ang papel!

1. Piloa og katunga ang duha ka piraso sa papel. Dayon pagdrowing og parehas og gintang nga mga linya diha sa matag papel.

2. Putla ang mga linya diha sa unang papel, sugod sa pinil-an. Hunonga ang pagputol sa dili pa kamo moabot sa tumoy. Sa ikaduhang papel, ilahos sa paggunting subay sa mga linya aron sa paghimo og mga piraso.

3. Ablihi ang pilo sa unang papel. Biraha ang usa ka piraso sa papel sulod sa mga giguntingan, maghablon niini sa ibabaw ug sa ilawom. Mao gihapon ang buhata sa nahibilin nga mga piraso.

Resipe

Pavlova

Ang mga tawo sa New Zealand ganahan nga mokaon niini nga dessert alang sa Pasko!

1. Pagbatil og 4 ka puti sa itlog hangtod maporma ang humok nga krema. Hinay nga isagol og batil ang 1 ka tasa nga asukar hangtod mogahi ang krema.

2. Isagol sa 1/2 nga kutsara sa harina sa mais [cornstarch], 1 ka kutsarita sa puti nga suka, ug 1 ka kutsarita nga vanilla.

3. Taboni ang cooking sheet og papel o foil nga pag-bake ug ibubo ang sinagol. I-bake sa 275°F (135°C) sulod sa 1 ka oras. Palonga ang kayo ug ipabilin diha sa oven hangtod mobugnaw kini.

4. Butangi sa ibabaw og whipped cream ug presko nga prutas.

Seguroha nga makapangayo og tabang sa usa ka hamtong!

Sugyot sa Kahimsog

Prutas

Ang mga prutas adunay importante nga mga bitamina nga inyong gikinahanglan kada adlaw. Kaon og prutas sa matag pagpangaon aron magpabiling himsog. Nindot usab nga i-snack ang prutas!

Mga paghulagway pinaagi ni Natalie Briscoe