Kveðja frá Taílandi!

Lærið um börn himnesks föður víða um heim.

Taíland er land í Suðaustur-Asíu. Þar búa um 72 milljón manns.

Tungumál

Taílenska er opinbert tungumál í landinu. Taílenska stafrófið hefur 72 bókstafi.

Á taílensku er hægt að bjóða vini velkomna með því að segja „kin khao reu yang.“

Það þýðir: „Hefur þú fengið þér að borða ennþá?“

Songkran-hátíðin

Fólkið í Taílandi fagnar nýju ári með heimsins stærsta vatnsslag. Það skvettir vatni hvert á annað til að minnast þess að þvo allt hið slæma í burtu. Þetta varir í þrjá daga!

Tígrishellirinn

Tígrishellismusterið er búddamusteri þar sem margt fólk tilbiður og biðst fyrir. Til að komast að því, þarf maður að klifra 1.260 þrep upp á fjall. Í hellinum eru spor eftir tígrisdýr!

Fljótandi markaðir

Í Taílandi getur fólk verslað í bátum á ánni, eins og litlar, fljótandi verslanir. Árnar eru einn af ferðamátunum um höfuðborgina. Margar byggingar eru á staurum til að halda þeim yfir vatnsyfirborðinu.

Leikur

Slanga bítur í halann

Veljið einhvern til að vera slanga 1 og annan til að vera slanga 2. Allir hinir standa bak við slöngu 1 og halda í þá sem standa framan við sig. Slanga 2 reynir að komast fram hjá slöngu 1 og fá þann sem er síðastur í röðinni til að sleppa takinu. Allir sem sleppa eru úr leik!

Uppskrift

Som Tam

Grænt papaya-salat er algeng uppskrift í Taílandi. Hér er uppskrift sem þið getið prófað!

1. Blandið í stóra skál 1 ½ matskeið af pálmasykri (eða púðursykri), 1 ½ matskeið fiskisósu (eða sojasósu), og 2 matskeiðum af límónusafa. Hrærið þangað til sykurinn er uppleystur.

2. Brjótið niður 2 hvítlauksgeira og 1 eða fleiri rauðan chillipipar. Saxið 3 grænar baunir. Skerið 1 tómat í báta.

3. Takið hýðið af 1 grænu papaya (eða 3 grænum eplum). Rífið eða skerið í þunnar sneiðar.

4. Setjið allt í skálina og blandið.

Við þökkum fjölskyldu Panya fyrir að deila þessari uppskrift!

Myndskreyting: Mackinzie Rekers