“Te Berita n te Bwabetito,” Te Rao, Meei 2024, 8–9.
Te Berita n te Bwabetito
“Bukin tera ngkai ko tangiria ni kan bwabetitoaki?” E titiraki Tamana.
E riki te karaki aei i USA.
“Tamau, I kona ni bwabetitoaki ngkana e koro waniua au ririki?” E titiraki Keaton.
E tararake Tamana man te takakaro are a takakaro iai. “Bon te rinerine ae bubura. E aki raoiroi riki ngkana ko taninga koron 18 am ririki?”
E tabe n iangoia Keaton. “Ma e nang koro waniua au ririki ngkai. Ao 18 e rang raraoanako!”
E kainabwaabu tamana n te tai ae uarereke. E kabuta waana. “Bukin tera ngkai ko tangiria ni kan bwabetitoaki?”
“I tangira Iesu,” e taku Keaton. “Ao I kan Iriiria,”
“Anne te kaeka ae moan te tamaroa ibukin te kan bwabetitoaki,” e taku Tamana. E matangare. “N na boutokaiko ngkana anne ae ko rineia. Ngkana waniua ke 18 am ririki.”
E koona tamana Keaton n rabwatia. “Ko rabwa!”
Tamana bon tiaki kaain Ana Ekaretia Iesu Kristo Ibukiia Aika Itiaki ni Boong aika Kaitira. Ma e teimatoa n naanako n taromauri ma Keaton ao Tinana n tabetai. Ao ngkana e anga ana marooro Keaton ke e anene ma ataein te Moanrinan ni boowin te toa, e iriri Tamana n taainako.
I mwiin banen aia takakaro, e nakon Tinana n te umwanikuuka Keaton.
“E taku Tamau bwa I kona ni bwabetitoaki ngkana e koro waniua au ririki,” e taku.
E wiingare Tinana. “Ai kakukureira anne! Ko a tia n iangoia bwa antai ae e na bwabetitoiko?”
E katokai raurau Keaton i aon te taibora. “N am iango e kona ni karaoia Tibum te Unimwaane?” Grandpa ao Grandma a beku n te mition n te kaawa are teuana.
“Ti kona n titirakinna,” e taku Tinana.
Imwiin te katairiki, e tareboniia Tibuna te Unimwaane ao te Unaine Keaton n te witeokooro i aon ana tareboon Tinana. I mwiin tabeua tangin te tareboon, a noori moaia ni moangare i aon te tikuriin.
“Mauri, Grandma! Mauri Grandpa!” E taku Keaton. “Ketinna bwa tera? N nang bwabetitoaki n au koronririki n te ririki aei.”
“Ai tamaroa anne!” E taku Grandma.
“Ko kukurei ni bwabetitoai, Grandpa?” E titiraki Keaton.
E a bubura riki moangaren Grandpa. “I rang kukurei ni karaoia.”
Ngke e a roko ana bong ni bwabetito, e tauraoi Keaton. Tinana ao Tamana a buti ma ngaia nakon te umwantabu ae uarereke ae uakaan ma te tabo are a beku iai Grandpa ao Grandma n aia mition.
A oneiia Keaton ma Grandpa n kunnikai aika mainaina. A uaia n tekateka ngkai e anene te koraki. I mwiina e tataro Tinana.
I mwina, e anga ana marooro Tamana. “Ngkana ko bwabetitoaki, ko berita bwa kona iriira Iesu Kristo ao ni kawakin Ana tua nako. E reireiniira bwa ti na itangitangiri i marenara. Te tangira bon te kawai ae te kabanea n tamaroa ae na maiuakinaki,” e taku.
E taraa tamnein Iesu Keaton are e tautaua Tamana.
“Ngkana ti tangiriia aomata, a namakinna bwa a mwannanoaki. E buokiira naba ni karekea te kukurei ao te rau.” E taraa Keaton Dad. “I kakatonga iroum n te bong aei ngkai ko berita bwa ko na iriira Iesu Kristo. Au kantaninga bwa am bwabetito e na kauringko n taainako bwa ko na tangira te Atua ao n tangiriia aomata.”
E inga ma tamana Keaton. I mwiina e rimwiin Grandpa nako nanon te tabo n bwabetito ae uarereke. E katoka baina teaoma Keaton iaon angan Grandpa ao are teuana ni baina. E taekina te tataro ni bwabetito Grandpa. I mwiina e buoka Keaton ni kateboa i nanon te ran.
Ngke e otirake Keaton man te ran, e moangare. E a koro bukina! E a tia n iriira Iesu Kristo. N te tai ae tawe, e kamatoaki ao e karekea ana bwaintangira te Tamnei ae Raoiroi. Ngkanne e a riki bwa kaain ana Ekaretia Iesu Kristo ibukiia Aika Itiaki ni Boong aika Kaitira.
E kukurei ni kawakina ana berita Keaton n ururinga Iesu ao ni kawakin Ana tua.
Kamataata n te tamnei iroun Alyssa Tallent