“Te Aro n Akoi n Tain te Katawanou,” Rao, Meei 2024, 36–37.
Te Aro n Akoi n Tain Te Katawanou
A na kona ni bwainingareia naba ataeinimwaane ake tabeman?
E riki te karaki aei i Biribin.
E ongo ana karebwerebwe tinana Dave ni mataroan ana ruu ni matu. E a boo te tai n uti. E rabinonako man ana kainiwene ao e teboka matana. I mwiina e bootaki ma Tinana, Tamana, ao tarina n te ruu mai moa.
“Mauri n te ingabong aei,” e taku Tinana. E moangare Dave ma te nimatutu. A katorobubua te utu, ao Tamana e tataro ni moanan waakina aia bong.
“I tangiria n tibwa te kibu ae tamaroa n te ingabong aei,” e taku te tina. E kauka ana Boki Moomon. “Aio Moronaai 7:45. ‘Ao te tangira ae kororaoi, e taotaonaki n nano, ao e akoi.’”
E iangoa te kibu aei Dave ngke e katauraoi nakon te reirei. E tataro, i mwain ae e otinako man te mataroa. “Taiaoka buokai bwa N na bwaina te akoi n te bong aei,” e tataro.
N te kiraati, e namakina te kukurei Dave ngke e a tia ni karaoi ana bwai n reirei. E kakauongo raoi ngke e anganiia tabeua tibering aika a boou ana Tia Reirei ae Frida bwa a na reiakini.
E aki maan ao ai tain te katawanou. E uota ana kumwara ae tiokanaki ao nimana ae mwaitorotoro Dave. E tekateka ma raraona ao a kakaraki.
I mwiina e ongo bwanaaia ataei n te taibora are irarikina. Uoman ataeinimwaane a bwainingarea te ataeinimwaane ae boou ae arana Jose. E nang rabwata ni uarereke Jose ibuakoia ana roro, ma e raoiroi nakoia aomata ao e mwakuri korakora n ana kiraati. Iai kanaia ataeinimwaane, ma akea kanan Jose.
“Bukin tera ko rang katuarereke? Akea kanam n am auti?” e titiraki Antonio.
E rairaki Dave nakoia ataeinimwaane n te tai are e a noora Joaquin n a anaa ana baeki Jose ao e karenakoa nakon Antonio. E biri Jose n rimwiin Antonio n anai ana bwai ni kaoki.
“Taiaoka anganai au baeki,” e taku Jose.
Ma a aki kan ongo Antonio ma Joaquin. “Am baeki e a rang mane ao e buakaka!” e taku Joaquin.
E ongo ni kabane aia taeka ni iowawa Dave, ma e maaku ni buoka Jose. Tera aia iango ataei ake tabeman? A na kona Joaquin ma Antonio ni bwainikiriinna naba?
I mwiina e iangoa ana kibu Tinana are e warekia n te ingabong anne. Te tangira ae kororaoi e akoi. E tangiriia Iesu Kristo bwa e na bwaina te akoi. Bon te bwai ae e riai ni karaoaki.
E teirake Dave ao e kaitaraia ataeinimwaane ake tabeman. “Katoka bwainikirinan Jose. Taiaoka kaoka ana baeki.”
“Tera am kangaanga?” e titiraki Joaquin.
“Bukin tera kam a bwainikiriina Jose? Akea te kairua ae karaoia,” e taku Dave. I mwiina E ikerake ni kamaanna. “E tangiriira ni kabane Iesu, ao E tangirira bwa ti na bwaina te akoi. Taiaoka katoka bwainikiriinan Jose. E kairua bwainikirinan te aomata. Ngkana kam reitinako ni karaoia, N na wetea te Tia reirei Frida.”
E baraaki Antonio n tarai ana kau. E kaoka ana baeki Jose. “Kabwara au bure,” e meremere. Ngaia ma Joaquin a okira aia kai n tekateka.
“Ko rabwa,” e taku Jose.
E boboa angan Jose, Dave. “Tia iraorao ngkai.”
E wingare Jose.
N ana auti, e karakina te bwai are e a tia n riki Dave.
“Anne e aki beebete, ma eti te bwai ae ko karaoia,” e taku Tamana.
“I kakatonga iroum ni karaoan te mwakuri n akoi,” e taku Tinana.
Te bong are i mwiina ngke e tabe Tinana ni buokia ni katauraoa ana katawanou, e bubuti Dave, “Ti kona ni karaoa uoua te tianiwiti?”
“Bukin tera? “Koa bon rang bora ni baki?” E titiraki Tinana.
E ngare Dave. “I aki, ma ngkoananoa I nooria bwa akea kanan Jose. I kan tibwa tabeua man kanau.”
“Anne te iango ae tamaroa!” Ekaotinakoa riki te kariki tinana ao e karaoa riki teuana te tianiwiti Dave.
N tain te katawanou, a ikotaki n tekateka Dave ao Jose ni kana aia tianiwiti. E tangira te ninikoria katokakiia ataei tabeman ake a iowawa nakon Jose. Ma e tatangira raoraona ae boou Dave, ao e ataia bwa e kukurei Tamara are i Karawa ngkai e rineia bwa e na akoi.