“Te Iraorao Rinanon te Borau,” Te Rao, Meei 2024, 14–15.
Te Iraorao Rinanon te Borau
A na kanga n takakaro ngkana aki ota n aia taetae i marenaia?
E riki te karaki aei i Tiaman.
“There is sunshine in my soul today!” E anene Matvii. Tinana ao tarina, Tymofii, a anene ma ngaia. E roo tinanikun wintoon te kaa. Ma te anene e buoka karekean te kakukurei.
Bon te tai ae kanakonano irouin Matvii ma ana utu. A mwaing nako Tiaman ibukina bwa e aki mano mweengaia. A tia ni mwananga i nanon uoua te bong, ao ngkai a kan roko ikekei. Te bitiobi ikai i Tiaman e kabutiia n te kaa nakon te tabo are a na tiku iai.
E kukurei Matvii bwa Tamara are i Karawa e a tia ni buokiia ni karokoia i Tiaman ma te kamanoaki. Ma e uringa Tamana. E tiku i abana ibukin te buaka. E rangi n raraoma irouna Matvii.
E katea te kaa te bitiobi i tinanikun te auti. “Kaaraki nakon mweengau.”
E anaa ana baeki Matvii ao e iriia ana utu n rinnako. Bon akea te karongoa. A bae ni kaman tia ni matu ana utu bitiobi.
“Kam kona n tiku n ana ruu Mats ao Lore ngkai kam mena ikai,” e taku bitiobi.
“Taninga,” e taku Tinana. “E aki koaua ae a nang anganiira aia ruu.”
E moangare te bitiobi. “A kukurei ni karoaia. Ti tangiria bwa kam na namakina te mweengaraoi.”
E katoutoua atuuna Tinana. Ko rabwa!”
N te moaningabong, a nakon te umwanikuuka Matvii ao Tymofii ibukin te kaingabong. E tekateka n te taibora te bitiobi ma te ataeinimwaane ao te ataeinnaine. A aki tara n ikawai riki nakon Matvii.
“Aikai natiu Mats ao Lore,” e taku bitiobi.
“E kakukurei te kaitibo ma ngkami,” e taku Tymofii.
Mats ao Lore a tara n nano uoua.
“A kabi am taetae,” e taku bitiobi. “Ma I kakoaua bwa e na nakoraoi ami iraorao.”
E mata n un Matvii. A na kanga n iraorao ngkana aki kona n taetae i marenaia? E namakinna bwa e a bua otan taai are e a tia n aneneia ngke e bong.
I mwiin amwarakeia, a kaota te ruu n takakaro nakoia Mats ao Lore. A takakaro ma tabeua bwain takakaro uoman ataei aika a uarereke riki nakoia. E keetinna Matvii bwa tariia ao mwaneia Mats ma Lore.
E taekina te bwai teuana Mats. Kaanga tangin te titiraki, ma e aki ataia Matvii bwa tera ae e taekinna. E tekateka Mats ao e kauka te bwaoki ni kaati. E karinanii ni kabwarikoi. I mwiina a rinei kaati ngaia ma Lore. E kan takakaro Matvii. Ma e kabi arona!
E katikui ana kaati Mats ao e tara Matvii. Iai te bwai ae manga taekinna riki.
E a kan tang Matvii. E aki kan maeka i Tiaman ngkana akea ae kona n oota irouna.
Iai te bwai ae taekinna Lore nakon Mats, i mwiina e biri nakon nnen bwaai. E oki neiei ao e a katea te takakaro ae boou i aon te timanti.
E bwaati te takakaro aei Matvii. Mwakoro ni kai a titebo ma ake iai n ana auti. Bon te borau! E a tia n tatakakaro ma Tamana iai mai i mwaina. E katoutoua atuuna Matvii ma te kukurei. E bwaati n takakaro n aei.
E wiingare Lore ao e waaki ni katei waana.
E kamwainga waana uoua te tikuea Matvii ao e tatara Lore ngke e kabuta ana tautia. I mwiina e kamwainga ana bitiobi Matvii nakon ana tautia Lore. A kukurei ngai ma Tymofii. E kanakoa te ang n uun Lore, ma e bon moangare.
A rang maan n takakaro. E aki maan i mwiina ao a ngarengare. A bon aki oota n aia taetae, ma a bon unga.
I nanon wiiki ake i mwiina, a kunei takakaro riki tabeua ake a bane ni bwaati. A takakaro n te butibooro i tinaniku ma ataein Tiaman ake tabeman. E reireinna naba tabeua taetaen Tiaman Matvii. N tabetai e kairua, ma e teimatoa ni kataia.
E bon tangira naba tamana ao mweenga Matvii. Ma e kukurei bwa Tamara are i Karawa e a tia ni buokia ni karekeia raraona aika a boou.
Kamataataan korotamnei iroun Hannah Li