“Kaitibo ma Unimwaane Patrick Kearon,” Te Rao, Meei 2024, 7.
Weteaki te Abotoro ae Boou
Kaitibo ma Unimwaane Patrick Kearon
E anaaki man Trent Toone, “Te ‘tamaroa’ ao ‘rababan’ te taneiai n te maiu are e katauraoa Unimwaane Kearon n riki bwa te Abotoro,” Church News, Tianuare 23, 2024.
Unimwaane Patrick Kearon bon te membwa ae boou n te Kooran n Abotoro n te Tengaun ma Uoman! E bungiaki ao ni ikawairake i Engiran. Ngaia ao ana utu a makea naba i Saudi Arabia ngke iai ana mwakuri tamana ikekei. E weteaki bwa te Abotoro n Ritembwa 7, 2023.
Ngke te kairake n ataeinimwaane, e kaitibo Unimwaane Kearon ma tabeman mitinare i London man Ana Ekaretia Iesu Kristo ibukiia Aika Itiaki ni Boong Aika Kaitira ma e aki anaaki nanona n aia rongorongo. Imwiina, a moanna mitinare n reireina taekan te euangkerio ao e namakina te Tamnei ae Raoiroi. N ana tai n reiakina ae mwaiti riki iaon te Ekaretia, e karekea Unimwaane Kearon te kakabwaia man te nakoanibonga. E taku bwa bon te taneiai ae tamaroa are e buokia ni baireia bwa e na kaaina te Ekaretia. E bwabetitoaki n te bong are imwaain te Kiritimati ngke ai 26 ana ririki.
Unimwaane Kearon ao kainabana, ae Jennifer, iai aman natiia. Moan natiia e mate ngke e uaereke. Bon te tai ae kananokawaki irouiia Unimwaane ao Titita Kearon. Ma e buokiia ni kakorakorai aia onimaki iaon te mangauti ao ana euangkerio Iesu Kristo. E weteaki Unimwane Kearon bwa te Mataniwi ni Kabuta n te Itingaun n 2010. E tatangira norakiia kaain te Ekaretia ni buokiia aomata ake a kainnano ni kabutaa te aonaaba.
E rangi ni kakaitau Unimwaane Kearon ibukin te babaire ni kamaiu. E ataia naba bwa n taai ni karawawata ti kona n tainako n namakina ana tangira Tamara are i Karawa ao te Tia Kamaiu.