“Tibwaakin ana Tangira te Atua,” Rao, Meei 2023, 32–33.
Tibwaakin ana Tangira te Atua
E aki ataa te bwai ae na taekinna ke ni karaoia Thais, ma e tangiria ni ibuobuoki.
E riki te karaki aei i Bolivia.
Bon te ingabong ae kabuebue. A marooro ni ngarengare Thais ma raraona ae Claudia ngke a nakonako i nuukan te marae ni butibooro. E a tibwa bane aia kiraati n te gym, ao ngkai a nang nakon te kiraati n te numera.
A motirawa ataeiake a urarereke riki. E matakuakiniia Thais ngke a takakaro.
I mwiina e noora te ataeinnaine ae uarereke n tekateka n ti ngaia i aon te tabo n tamwarake. Ngke a kaan riki, e nooria Thais bwa e tang.
E kateitea bainaThais n anoa Claudia bwa e na roko nakon te ataeinnaine ae uarereke.
E mata n un Claudia ao e ioioa atuna n rawa, “Ae ti na rimwi.”
I mwain ae e na kona n manga taetae riki Thais, e a taonnako Claudia.
E taraa te ataeinaine are e uarereke arei Thais. Tao ai nimaua ana ririki ni maiu. E raba ubuna i marenan bubuan waena, ao e rabuna atuna ni baina.
E tekateka i rarikina Thais. E mwaing nako teutana te ataeinnaine are e uarereke arei.
“Ko raoiroi?” E titiraki ni karaurau Thais.
E aki kaeka te ataeinnaine. E aki ataia bwa tera ae e na taekinna Thais ke tera ae na karaoia.
“I kona ni buokiko?” e titirakinna riki.
E kakuia angana te ataeinnaine.
“Arau bon Thais. “Antai aram?”
N tokina te tai e tararake n taraa Thais te ataeinnaine aei. “Nicol.”
“Bukin tera ko tang, Nicol?”
“A bwainikirinai ni kabane ibukina ngkai I marikarika,” e taetae ibuakon tangina.
E kaoa ubun Nicol. “Ai kawara ngkoe ngkai a taekina anne nakoim. Tai tabe ma aia iango aomata.”
“A taku bwa I aki botonnaine.”
“Ma, ngai irou a kairua!” E kaeka Thais ma te moangare. “Ko bon rang botonnaine ao man onoti. Ko ata anne?”
E iangoa teuana te anene ae mamaten nanona man te Buraimwarii Thais. E a ata te bwai ae e na taekinna ngkai.
“Ngkoe bon Natin te Atua,” e taetae Thais, ao n anaa bain te ataeinnaine.
E taetae teutana Thais ma Nicol. E kabwarabwara aron kakaawakin Nicol iroun Tamara are i Karawa, ana utu, ao aomata aika a mwaiti riki ake a rang tangiria. Teutana i mwiin teutana, e moanna ni moangare Nicol.
I mwiin tabeua te miniti, e teirake Nicol ao e inga n rabwata Thais ni koonna. “Ko rabwa!” e taku.
E taraa raoraona ae boouThais are e birinako ma te moangare ae bubura. E kakukurei buokakin Nicol bwa e na nakoraoi ana namakin ao n ata mwaitin tangirakina iroun te Atua.
I mwiina e kibarake n teirake Thais. I riai ni biri n ai aron Nicol mwina N na rimwi nakon te mumera! e iango, ma te moangare ngke e kawaekoa nakon ana kiraati.
Kamataataan korotamnei iroun Flavio Remontti