“O Se Folafolaga O Le Papatisoga,” Uo, Me 2024, 8–9.
O Se Folafolaga O Le Papatisoga
“Aisea e te manao ai e papatiso?” O le fesili lea a Tamā.
O lenei tala sa tupu i le ISA.
“Tama, e mafai ona ou papatiso pe a valu o’u tausaga?” Sa fesili atu ai Keaton.
Sa tilotilo i luga Tama mai le taaloga sa laua taaalo ai. “O se filifiliga telē. Mata e sili ai le faatali seia 18 ou tausaga?”
Sa mafaufau i ai Keaton. “Ae toeitiiti atoa le valu o o’u tausaga. Ma o le 18 e matua mamao lava!”
Sa filemu Tamā mo sina taimi. Sa ia faaminoiina lana vaega o le taaloga. “Aisea e te manao ai e papatiso?”
“Ou te alofa ia Iesu,” na fai atu ai Keaton. “Ma Ou te fia mulimuli ia te Ia.”
“O se mafuaaga sili lena e papatiso ai,” o le tala lea a Tama. Sa ataata o ia. “O le a ou lagolagoina oe pe afai o le mea lena e te filifilia. Pe valu pe 18 ou tausaga.”
Sa fusi faataamilo e Keaton ona lima ia Tama. “Faafetai!”
O Tama e le o se tagata o Le Ekalesia a Iesu Keriso o le Au Paia o Aso e Gata Ai. Ae sa alu pea lava o ia i le lotu faatasi ma Keaton ma Tina i nisi taimi. Ma a faia e Keaton ni lauga pe pepese faatasi ma isi tamaiti Peraimeri i le sauniga faamanatuga, e sau lava Tama i taimi uma.
Ina ua uma le la taaloga, sa maua e Keaton Tina i le umukuka.
“Fai mai Tama e mafai ona ou papatiso pe a valu o’u tausaga,” o lana tala lea.
Sa ataata Tina. “E manaia tele lena! Pe ua e mafaufau po o ai e te manao e papatisoa oe?”
Sa faatulaga e Keaton ipu mafolafola i luga o le laulau. “E te manatu e mafai e Tamamatua?” Sa auauna atu Tamamatua ma Tinamatua i se misiona i se isi aai.
“E mafai ona ta fesili,” o le tala lea a Tina.
Ina ua uma le taumafataga o le afiafi, sa vili Keaton faavitio ia Tamamatua ma Tinamatua i luga o le telefoni a Tina. Ina ua mae’a ni nai tatagi, sa faatumuina e o la foliga ataata le lau(screen).
“Talofa, Tinamatua! “Talofa, Tamamatua! Na fai atu ai Keaton. “Mate mai la? O le a ou papatiso mo lo’u aso fanau i lenei tausaga.”
“Ua lelei tele lena!” Na fai atu ai Tinamatua.
“E mafai ona e papatisoina a’u, Tamamatua?” Sa fesili atu ai Keaton.
Ona faateleina ai lea o le ataata a Tamamatua. “Ou te fiafia i ai.”
Ina ua oo mai le aso o lona papatisoga, sa saunia Keaton. Sa ave o ia e Tina ma Tama i se tamai falesa e lata ane i le mea sa auauna atu ai Tamamatua ma Tinamatua i le la misiona.
Sa laei Keaton ma Tamamatua i ofu papae. Sa la nonofo faatasi a o pepese tagata uma. Ona faia lea e Tina o se tatalo.
Sosoo ai, na tuuina atu e Tama se lauga. “Pe a e papatiso, ua e folafola atu e mulimuli ia Iesu Keriso ma tausi Ana poloaiga. Sa Ia aoao i tatou ia alofa le tasi i le isi. O le alofa o le auala sili lea e ola ai,” o lana tala lea.
Sa tilotilo Keaton i le ata o Iesu sa uuina e Tama.
“Pe a tatou alolofa i isi, latou te lagona ai le tausiaina lelei. E fesoasoani foi ia i tatou ia fiafia ma maua le filemu.” Sa tilotilo sa’o Tama ia Keaton. “Ou te mitamita ia te oe i le asō mo le folafola atu e mulimuli ia Iesu Keriso. Ou te faamoemoe o lou papatisoga e faamanatu atu ai ia te oe ia alofa i le Atua ma alofa i isi.”
Sa tuu atu e Keaton se opo lapo’a i a Tama. Ona ia mulimuli atu lea ia Tamamatua i totonu o le tamai vaipapatiso. Sa tuu e Keaton le lima e tasi i luga o le lima o Tamamatua ma le isi i le alofilima o Tamamatua. Sa fai e Tamamatua ia upu mo le tatalo o le papatisoga. Ona ia fesoasoani lea e faatofu ifo Keaton i totonu o le vai.
Ina ua alu a’e Keaton mai le vai, sa ataata o ia. Sa Ia faia! Sa mulimuli o ia ia Iesu Keriso. I se taimi latalata ane, o le a faamauina o ia ma maua le meaalofa o le Agaga Paia. Ona avea ai lea o ia o se tagata O Le Ekalesia a Iesu Keriso o le Au Paia o Aso e Gata Ai.
Sa fiafia Keaton e tausia lana folafolaga ia manatua Iesu ma tausi Ana poloaiga.
Ata na tusia e Alyssa Tallent