“Faasoaina o le Alofa o le Atua,” Uo, Me 2023, 32-33.
Faasoaina o le Alofa o le Atua
Sa le iloa e Thais se tala po o se mea e fai, ae sa manao o ia e fesoasoani.
Na tupu lenei tala i Polivia.
Sa o se taeao vevela o le taumafanafana. Sa talanoa ma taliē Thais ma lana uo o Claudia a o la savavali i le malae soka. Faatoa uma le la vasega faletaalo, ma o lea o le a la o i le matematika.
O loo i le taimi malolo o tamaiti laiti. Sa tilotilo atu Thais ia i latou o taaalo.
Ona ia vaaia lea o se teineitiiti laitiiti o nofo na o ia i luga o fasitepu. Ina ua la latalata atu, sa iloa atu e Thais o loo tagi o ia.
Sa talotalo atu Thais ia Claudia e sau i le teineitiiti.
Sa faanonou Claudia ma lulu lona ulu e leai. “O le a ta tuai.”
A o le’i fai atu se tala a Thais, sa savali ese Claudia.
Sa tilotilo atu Thais i le teineitiiti. Pe a ma le lima ona tausaga. Sa natia ona foliga i le va o ona tulivae, ma sa ufitia lona ulu i ona lima.
Sa saofai Thais i ona autafa. Sa sosō ese teisi le teineitiiti.
“O seki oe?” Sa fesili lemu atu ai Thais.
E le’i tali mai le teineitiiti. Sa le mautinoa e Thais le tala e fai atu po o le mea e fai.
“E mafai ona ou fesoasoani atu ia te oe?” na sosoo ai lesi ana fesili.
Sa faamimini tauau o le teineitiiti.
“O lo’u igoa o Thais. O ai lou igoa?”
Na iu lava ina tilotilo a’e le teineitiiti ia Thais. “Nicol.”
“Aisea ua e tagi ai, Nicol?”
“E taufaalili mai tagata uma ia te a’u ona o lo’u lapoa,” sa ia fai atu ai i le va o masusῡ.
Sa solo e Thais foliga o Nicol. “Ou te faamalie atu na latou faia na tala. E le afaina po o a manatu o tagata.”
“Latou te fai mai ou te le aulelei.”
“Ia, ou te manatu e sese i latou!” Sa fai atu ai Thais ma se ataata. “E ese lou aulelei ma matua faapitoa lava foi. Na e iloaina lena mea?”
Sa mafaufau Thais i se tasi o pese e sili ona fiafia i ai mai le Peraimeri. Ua ia iloa nei le tala e fai.
“O oe o se afafine o le Atua,” o le tala lea a Thais, ma uu lima o le teineitiiti.
Sa talanoa teisi Thais ma Nicol. Sa ia faamatalaina le taua tele o Nicol i le Tama Faalelagi, lona aiga, ma le toatele o isi sa alolofa tele ia te ia. Mai lea mea itiiti i lea mea itiiti, sa amata ona ataata Nicol.
Ina ua mavae ni nai minute, sa tu i luga Nicol ma fusi mau Thais. “Faafetai!” o lana tala lea.
Sa vaaia e Thais lana uo fou o tamoe ese atu ma se ataata tele. Sa manaia le lagona o le fesoasoani ia Nicol ia maua se lagona lelei ma iloa le telē o le alofa o le Atua mo ia.
Ona tu foi lea o Thais i luga. E tatau foi ona o’u tamoe e pei o Nicol i ou tuai i le matematika! sa ia mafaufau ai, ma ataata a o ia faanatinati atu i le vasega.
Ata na tusia e Flavio Remontti