“Toe Mamā,” Uo, Me 2024, 18–19.

Toe Mamā

Saunia e Dawn Nelson

(E faavae i se tala moni)

Sa le mafai foi ona ou filifilia le mea sa’o mo le aso e tasi! Sa mafaufau ai Emily.

O lenei tala sa tupu i le ISA.

Sa tu Emily i totonu o le vai faatasi ma Tama ma ataata. Sa faatalitali o ia mo lenei aso mo ni vaiaso! Sa tata lona fatu ona sa le’i alu muamua lava o ia i lalo o le vai. Ae sa fiafia lava o ia e papatiso e pei ona faia e Iesu Keriso.

Sa moeiini ona mata ma faalogologo atu ia Tama o fai le tatalo o le papatisoga. Ona ia polokaina lea o lona isu, moeiini ona mata, ma gagau ona tulivae a o faamagoto o ia e Tama i totonu o le vai.

Sa vave ona toso a’e o ia i luga e Tama, ma sa alu ese le vai mai ia te ia. Sa tau soloiesea e Emily mai ona mata, ae sa ataata o ia. Sa ese ona lagona i le taimi nei. Sa faatumulia o ia i se lagona fou ma fiafia. Sa manao o ia ia lagonaina pea lava pea!

Sa tuu atu e Tamā ia te ia se opo lapo’a. Ou te iloa le auala e faatumauina ai lenei lagona lelei, sa mafaufau ai Emily. Pau le mea ou te faia o le filifili o le mea sa’o ma ia faapei o Iesu Keriso! Sa ia lagonaina le mautinoa e mafai ona ia faia.

Ina ua latou taunuu i le fale, sa tamoe atu Emily mai le taavale i le faitotoa i luma. Sa faapena foi lona tuagane e fa tausaga, o Jonah. E taunuu atu loa Emily i le faitotoa ma amata ona tatala, ae uu mai e Jonah lona sakete ma toe toso mai i tua—ma le malosi.

“Aua!” Sa ee atu Emily. Sa ia toso ese lona sakete mai ona lima. Ona ia polokaina lea o lona ala ina ia le mafai ona ia alu muamua i totonu. Sa ia lagonaina le ita tele!

Teineitiiti o loo ee atu i le tuagane laitiiti

Sa faafuasei ona faamalo o ia. Sa faatumulia o ia i se lagona le lelei. Sa ia laa ese mai le ala ma tuu atu Jonah e tamoe i totonu.

“Faamalie atu!” sa ia valaau atu ai ia te ia. Faatoa uma lava ona ia faia se filifiliga sese. E le ono ee atu le Faaola ia Jonah. Na mafai faapefea ona vave ona ia sasi? Ua mou atu lona lagona fiafia fou.

Ua ou faaleagaina, sa ia mafaufau ai. Sa le mafai foi ona ou filifilia le mea sa’o mo sina aso e tasi!

O le aso na sosoo ai o le Aso Sa. A o sauni Emily mo le lotu, sa ia mafaufau i lona ia ee atu ia Jonah. Sa le lelei pea ona lagona.

I le taimi o le sauniga faamanatuga, sa talosaga atu ai le epikopo ia Emily e sau i luma. O le a faamauina o ia. O lona uiga o le a ia maua le meaalofa o le Agaga Paia. Ona ia saofai lea i lalo o se nofoa. Sa tuu lemu e Tama ona lima i luga o lona ulu.

Teineitiiti o loo mauaina le faamanuiaga o le faamauga

Sa moeiini mata o Emily ina ua amata Tama. Sa ia faalogo o ia fai mai upu, “Talia le Agaga Paia.”

Sa faalogo pea Emily.

“Emily, ia manatua pea ona o Iesu Keriso, e mafai ai ona e salamo pe a e faia se filifiliga sese,” o le tala lea a Tama. “O taimi uma lava e te tagofia ai le faamanatuga, e mafai ona e mafaufau i le feagaiga na e osia ina ua e papatiso. E mafai ona e toe folafola atu e mulimuli ia te Ia.”

A o faamae’aina e Tama le faamanuiaga, sa lagona e Emily le fiafia ma le toafilemu. Sa ia iloa o loo ta’u atu e le Agaga Paia ia te ia o le a lelei mea uma. Sa le afaina lona le atoatoa. Ona o Iesu Keriso ma Lana Togiola, ua mafai ai ona salamo o ia ma faamagaloina! Sa faanoanoa o ia ona sa ee atu o ia ia Jonah, ma sa silafia e le Tama Faalelagi o le a ia taumafai pea.

Sa ataata Emily a o la toe savavali atu ma Tama i o la’ua nofoaga. Sa sosoo ai ma le faamanatuga, ma sa tulimatai atu i ai Emily.