“Agalelei i le Taimi o le Malologa,” Uo, Me 2024, 36–37.
Agalelei i le Taimi o le Malologa
Mata e ula foi isi tamaiti ia te ia?
O lenei tala sa tupu i Filipaina.
Sa faalogo Dave i lona tina o tuitui i le faitotoa o lona potumoe. Ua oo i le taimi e nofo ai i luga. Sa ia taavale ese mai le moega ma fufulu ona foliga. Ona ia faatasi atu lea ia Tina, Tama, ma ona tei i le potu i luma.
“Manuia le taeao,” o le tala lea a Tina. Sa ataata Dave ma le fiamoe. Sa tootutuli le aiga, ma sa faia e Tama se tatalo e amata ai lo latou aso.
“Ou te fia faasoa atu se mau maoae i lenei taeao,” o le tala lea a Tina. Sa tatala lana Tusi a Mamona. “O le Moronae 7:45 lenei. ‘O le alofa mama e loa ona tali-tiga, ma e agalelei.’”
Sa mafaufau Dave e uiga i le mau a o sauni o ia mo le aoga. A o le’i savali atu o ia i fafo o le faitotoa, sa ia faia se tatalo. “Faamolemole fesoasoani mai ia ou agalelei i le asō,” sa ia tatalo ai.
I le vasega, sa lagona e Dave le fiafia a o ia faia ana meaaoga. Sa ia faalogologo ma le toto’a a o tuuina atu e Faiaoga Frida ia i latou ni upu fou o le sipelaga e aoao.
E le’i umi ae ta le malologa. Sa faatau mai e Dave ni umala i le suka susunu ma se vai suamalie malulu. Sa ia nofo i lalo ma ana uo ma amata ona talanoa.
E le’i umi ae ia faalogoina ni tamaiti i le isi laulau. Sa taufaalili ni tamaiti se toalua i se tamaitiiti fou e igoa ia Jose. Sa tino laitiiti Jose mo ona tausaga, ae sa agalelei o ia i isi ma sa galue malosi i le vasega. O isi tamaiti sa iai a latou meaai, ae sa le’i iai se meaai a Jose.
“Aisea ua e tino laitiiti ai? E leai eani meaai i lou aiga?” o le fesili lea a Antonio.
Sa faliu atu Dave i tamaiti fetaui tonu lava ma le iloa atu ua ave e Joaquin ato a Jose ma togi atu ia Antonio. Sa tamoe atu Jose e tulituli Antonio e toe aumai ana mea.
“Faamolemole aumai la’u ato,” o le tala lea a Jose.
Ae sa le’i faalogo Antonio ma Joaquin. “Ua matua tuai ma auleaga lau ato!” o le tala lea a Joaquin.
Sa faalogo Dave i nei upu leaga uma, ae sa popole o ia e fesoasoani ia Jose. O le a se manatu o isi tamaiti? Mata e ula foi Joaquin ma Antonio ia te ia?
Ona ia mafaufau lea e uiga i le mau na faitauina e Tina i lena taeao. O Le Alofa Mama E Agalelei. E finagalo Iesu Keriso ia agalelei o ia. O le mea sa’o lea e fai.
Sa tu i luga Dave ma faasaga atu i isi tamaiti. “Taofi le taufaalili ia Jose. Faamolemole toe avatu ia te ia lana ato.”
“O le a lou faafitauli?” na fesili atu ai Joaquin.
“Aisea e te agaleaga tele ai ia Jose? Na te le’i faia se mea sese,” o le tala lea a Dave. Ona ia manava loloa lea. “E alofa Iesu ia i tatou uma, ma e finagalo o Ia ia tatou agalelei atu. Faamolemole taofi le taufaalili ia Jose. O le taufaalili e sese. Afai e te faia pea, o le a ou alu ia Faiaoga Frida.”
Sa tilotilo ifo Antonio i lalo i ona seevae. Sa ia toe avatu ia Jose lana ato. “Faamalie atu,” sa ia faimai ai. Sa la toe foi atu ma Joaquin i o la’ua nofoa.
“Faafetai,” na fai atu ai Jose.
Sa popo e Dave le tau’au o Jose. “Lea ua ta uo i le taimi nei.”
Na ataata Jose.
I le fale, sa ta’u atu e Dave i lona aiga le mea na tupu.
“Sa le’i faigofie lena mea, ae sa e faia le mea sa’o,” o le tala lea a Tama.
“Ou te mitamita ia te oe ona o lou agalelei,” o le tala lea a Tina.
O le aso na sosoo ai a o fesoasoani Tina e teu lana meaai o le aoauli, sa fesili atu Dave, “E mafai ona ta faia ni sanuisi se lua?”
“Aisea? “O e matuai fiaai lava?” O le fesili lea a Tinā.
Sa ata Dave. “Leai, ae o ananafi sa ou matauina ai e leai se meaai a Jose. Ou te fia faasoa atu ai sina vaega o la’u meaai.”
“O se manatu manaia tele lena!” Sa toe aumai e Tina nisi falaoa ma sa faia e Dave se isi sanuisi.
I le taimi o le malologa, sa nonofo faatasi ai Dave ma Jose ma aai faatasi a la sanuisi. Sa manaomia le lototele e taofi ai isi tamaiti mai le sauaina o Jose. Ae sa alofa Dave i lana uo fou, ma sa ia iloa sa fiafia le Tama Faalelagi sa ia filifili e agalelei.
Ata na tusia e Mark Robison