“Faigauo i le Mu,” Uo, Me 2024, 14–15.
Faigauo i le Mu
E mafai faapefea ona latou taaalo pe afai latou te le malamalama i le tasi ma le isi?
O lenei tala na tupu i Siamani.
“Ua susulu mai nei o le la, i lo’u nei agaga!” Sa pese ai Matvii. Sa pepese faatasi lona tina ma lona uso, o Tymofii ma ia. Sa pogisa fafo o le faamalama o le taavale. Ae sa fesoasoani le pese i mea uma ia lagona teisi ai le malamalama.
O se taimi taufaafefe mo Matvii ma lona aiga. Sa latou siitia atu i Siamani ona sa le toe saogalemu lo latou fale. Sa latou malaga mo aso e lua, ma o lenei ua toeitiiti lava o latou i ai iina. Sa aveina atu i latou e se epikopo iinei i Siamani i se nofoaga e nonofo ai.
Sa fiafia Matvii sa fesoasoani le Tama Faalelagi ia i latou e o atu ma le saogalemu i Siamani. Ae sa ia misia Tama. Sa tatau ona nofo o ia i lo latou atunuu ona o se taua. Sa popole tele Matvii ia te ia.
Sa paka e le epikopo le taavale i fafo o se fale. “Susu maia i lo’u fale.”
Sa uu mai e Matvii lana ato ma mulimuli atu i lona aiga i totonu. Sa filemu. Masalo ua momoe le aiga o le epikopo.
“E mafai ona tou nonofo i potu a Mats ma Lore a o tou i ai iinei,” o le tala lea a le epikopo.
“Faatali,” o le tala lea a Tina. “E le tau o ese i laua mai o la potu ona o i matou.”
Sa ataata le epikopo. “La te fiafia e tuuina atu. Matou te manana’o ia tou lagona le mafanafana.”
Sa lue atu le ulu o Tinā. “Faafetai lava.”
I le taeao, sa o atu ai Matvii ma Tymofii i le umukuka mo le taumafataga o le taeao. Sa saofafai le epikopo i le laulau ma se tama ma se teine. Sa le’i foliga matutua atu i la’ua nai lo Matvii.
“O la’u fanau nei o Mats ma Lore,” o le tala lea a le epikopo.
“Manaia ua tatou feiloai,” o le tala lea a Tymofii.
Sa foliga le mautonu ia Mat ma Lore.
“La te le tautatala i lau gagana,” o le tala lea a le epikopo. “Ae ou te mautinoa o le a avea outou ma ni uo lelei.”
Na faauu Matvii. E mafai faapefea ona avea i latou ma uo pe afai e le mafai ona latou talanoa i le tasi ma le isi? Sa ia lagona le pei o le la susulu sa ia pese ai i le po anapo ua leai.
Ina ua uma ona latou aai, sa faaali atu e Mats ma Lore ia i la’ua se potu taalo. Sa taaalo ni tamaiti laiti se toalua i ni meataalo. Na mate e Matvii o i la’ua o ni tei laiti a Mats ma Lore.
Na fai mai e Mats se tala. Sa foliga mai o se fesili, ae sa le iloa e Matvii lana tala. Sa saofai i lalo Mats ma tatala se pusa o kata. Sa ia faavasegaina i latou i ni faaputuga. Ona la pikiina lea ma Lore a la kata. Sa manao Matvii e taalo. Ae sa le iloa e ia pe faapefea!
Sa tuu i lalo e Mats se kata ma tilotilo atu ia Matvii. Sa ia toe fai mai se tala.
Sa manao Matvii e tagi. Sa le’i manao o ia e nofo i Siamani pe afai e le mafai ona ia malamalama i se tasi.
Sa fai atu e Lore se tala ia Mats, ona tamoe lea i le kapoti. Sa toe foi mai o ia ma seti se taaloga fou i luga o le fola.
Sa iloa e Matvii lenei taaloga. O maa laupapa sa foliga mai e pei o ana maa i le latou fale. O le mu! Sa ia taalo mu ma Tama mo le tele o itula. Sa lue atu le ulu o Matvii ma le fiafia. Sa ia iloa le auala e taalo ai i lea taaloga.
Sa ataata tele Lore ma amata ona faatulaga maa.
Sa faame’i e Matvii lana maa vaivai i le lua sikuea ma tilotilo atu a o sii atu e Lore lana maa fitafita. Ona sii atu lea e Matvii lana maa epikopo i le maa fitafita a Lore. Sa la alalaga ma Tymofii. Sa faia e Lore se leo le fiafia, ae sa ataata o ia.
Sa latou taaalo mo se taimi umi lava. E le’i umi ae latou talie. Latou te le’i malamalama i upu a le tasi ma le isi, ae sa latou fiafia pea.
I le aluga o nai vaiaso na sosoo ai, sa latou maua ai isi taaloga sa latou iloaina uma. Sa latou taaalo soka i fafo ma isi tamaiti Siamani. Sa aoaoina foi e Matvii ni nai upu i le faaSiamani. O nisi taimi sa ia faia ai ni mea sese, ae sa ia taumafai pea.
Sa misia pea e Matvii lona tama ma lona fale. Ae sa ia faafetai na fesoasoani le Tama Faalelagi ia te ia e faia ni uo fou.
Ata na tusia e Hannah Li