“Feiloai ia Elder Patrick Kearon,” Uo, Me 2024, 7.
Aposetolo Fou ua Valaauina
Feiloai ia Elder Patrick Kearon
Sii mai ia Trent Toone, “O aafiaga ‘matagofie’ ma le ‘faalauteleina’ o le olaga lea na saunia ai Elder Kearon e avea ma se Aposetolo,” Church News, 23 Ian., 2024.
O Patrick Kearon o le sui aupito fou o le Korama a Aposetolo e Toasefululua! Sa fanau ma ola ae o ia i Egelani. Sa nonofo foi o ia ma lona aiga i Saudi Arabia a o i ai se galuega a lona tama iina. Sa valaauina o ia o se Aposetolo i le aso 7 o Tesema, 2023.
A o avea o se talavou matua, sa feiloai Elder Kearon i nisi o faifeautalai i Lonetona mai Le Ekalesia a Iesu Keriso o le Au Paia o Aso e Gata Ai ae sa le’i naunau i la latou savali. Mulimuli ane, na amata ona aoaoina o ia e faifeautalai e uiga i le talalelei ma sa ia lagonaina le Agaga Paia. A o ia aoao atili e uiga i le Ekalesia, sa maua e Elder Kearon se faamanuiaga faaleperisitua. Sa ia fai mai o se aafiaga matagofie na fesoasoani ia te ia e filifili ai e auai i le Ekalesia. Sa papatisoina o ia i le Po o le Kerisimasi ina ua 26 ona tausaga.
O Elder Kearon ma lona faletua, o Jennifer, e toafa le la fanau. Na maliu le la tama muamua a o pepe. O se taimi faanoanoa tele lenei mo Elder ma Sister Kearon. Ae na fesoasoani e faamalosia ai lo la’ua faatuatua i le toetu ma le talalelei a Iesu Keriso. Sa valaauina Elder Kearon o se Fitugafulu o le Pulega Aoao i le 2010. E fiafia o ia e vaai atu i tagata o le Ekalesia o fesoasoani i tagata o loo manaomia le fesoasoani i le lalolagi atoa.
E faafetai lava Elder Kearon mo le ata o le faaolataga. Na te silafia e oo lava i taimi faigata e mafai ona tatou lagonaina pea le alofa o le Tama Faalelagi ma le Faaola.