“Ko Hono Fili ʻo e Meʻa ke Fai ʻi he Sāpaté,” Kaumeʻá, Siulai 2024, 4–5.
Ko Hono Fili ʻo e Meʻa ke Fai ʻi he Sāpaté
“Ko e hā ʻa e sakalamēniti?” Ko e fehuʻi ange ia ʻa ʻĀnitá.
Naʻe hoko ʻa e talanoá ni ʻi ʻAisileni.
“Ai ke Mā‘olunga Ange!” Ko e talaange ia ʻe ʻEvaleti ki hono kaungāmeʻa ko ʻĀnitá. Naʻa nau sio pe ʻe māʻolunga fēfē haʻanau puna ʻi he tulemipoline ʻa ʻEvaletí.
ʻI he taimi pē ko iá, naʻe puna māʻolunga ʻaupito ʻa ʻĀnita. ʻI he pā hono vaʻé ki laló, naʻe puna hake ʻa ʻEvaleti! Naʻe tō fakatouʻosi ki lalo ʻa e ongo tamaiki fefiné ʻi he tulemipoliné. Naʻá na kakata.
Naʻe pehē ange ʻe ʻĀnita, “ʻOku fakalata ʻaupito. ʻE lava ke ta toe vaʻinga pē ʻapongipongi?”
Naʻe tokoto foʻohake atu ʻa ʻEvaleti. “ʻIo! Te u fiefia ʻaupito ai.”
“Te ta lava ʻo vaʻinga ʻi he ʻapi ʻo ʻeku kuifefiné.” Naʻe nofo ofi e kui ʻa ʻĀnitá kia ʻEvaleti.
Naʻe manatuʻi hake ʻe ʻEvaleti ko e ʻaho hono hokó ko e ʻaho Sāpate. Naʻá ne fie ʻalu ki he Palaimelí. ʻE fakalata ke vaʻinga mo ʻĀnita, ka naʻá ne fie fai ha fili ʻoku leleí.
Naʻe pehē ange ʻe ʻEvaleti, “Naʻá ku toki manatuʻi he ʻikai ke u lava. Kātaki. Te u ʻalu mo hoku fāmilí ki he lotú ʻapongipongi.”
Naʻe tuʻu hake ʻa ʻĀnita ʻo toe punopuna. “Ko e hā nai hono ʻuhingá?”
Naʻe kamata ke punopuna foki mo ʻEvaleti. “ʻOku ou fie muimui kia Sīsū Kalaisi. ʻOku ʻalu hoku fāmilí ki he lotú he Sāpate kotoa pē ke ako kau kiate Ia mo maʻu ʻa e sākalamēnití.”
“Ko e hā ʻa e sakalamēniti?” Ko e fehuʻi ange ia ʻa ʻĀnitá.
Naʻe pehē ange ʻe ʻEvaleti, “Ko e taimi ia ʻoku mau kai ai ha kiʻi konga mā mo inu ha kiʻi ipu vai ke fakamanatua ʻa Sīsū Kalaisi. Pea ʻoku talanoa leva ʻa e kakaí fekauʻaki mo e founga ʻoku tokoniʻi ai kinautolu ʻe Sīsuú. Pea hili iá, ʻoku ʻi ai ha kalasi makehe maʻá e fānaú!”
“Oku ngali fakalata ia!” Ko ʻĀnita ange ia. “ʻE lava nai ke tau ʻalu?”
“ʻIo!” Naʻe malimali ʻa ʻEvaleti.
Naʻe lele ʻa ʻĀnita ki ʻapi ʻo kole ki heʻene kuifefiné pe ʻe lava ke ne ʻalu ki he lotú mo ʻEvaleti. ʻI he pongipongi hono hokó, naʻe uta ʻe ʻEvaleti mo hono fāmilí ʻa ʻĀnita.
ʻI heʻenau aʻu ki he lotú, naʻe tataki holo ʻe ʻEvaleti ʻa ʻĀnita. Na‘á ne fakaʻaliʻali ange ʻa e loki Palaimelí, falevaʻingá, pea mo e falelotú.
Naʻe vave ke hokosia ʻa e taimi sākalamēnití. Naʻe tangutu fakataha ʻa ʻEvaleti mo ʻĀnita. Naʻe feinga ʻa ʻEvaleti ke fakakaukau kia Sīsū Kalaisi lolotonga ʻa e sākalamēnití. Naʻa nau fanongo leva ki he ngaahi leá.
Naʻe faifai pea hoko e taimi Palaimelí! Naʻe fakafeʻiloaki ʻe ʻEvaleti ʻa ʻĀnita ki ha niʻihi ʻo hono ngaahi kaungāmeʻá.
Naʻe pehē ange ʻe ʻEvaleti, “Ko hoku kaungāmeʻa ʻeni ko ʻĀnitá.”
“ʻOku mau fiefia ʻaupito ʻi hoʻo haʻu he ʻaho ní. Ko Sisitā Makusoni au,” ko e faiako Palaimelí ange ia.
ʻI he fanongo ʻa ʻEvaleti mo ʻĀnita ki he lēsoni fekauʻaki mo Sīsū Kalaisí, naʻe ongoʻi fiefia ʻa ʻEvaleti. Naʻá ne saiʻia ke ʻalu ki he lotú mo ʻĀnita. Naʻá ne tafoki ʻo sio atu kia ʻĀnita mo malimali. Naʻe malimali mai hono kaungāmeʻá.
Naʻe pehē ange ʻe ʻĀnita ʻi heʻenau foki ki ʻapí, “Mālō hoʻo fakaafeʻi aú.”
Naʻe fiefia ʻa ʻEvaleti naʻá ne lava ʻo muimui kia Sīsū Kalaisi. Pea naʻá ne fiefia ʻi he fie ako foki ʻa ʻĀnita fekauʻaki mo Iá.
Naʻe fakalata ke punopuna ʻi ha tulemipoline ʻo puna ʻi he ʻataá, ka naʻe toe fakalata ange ʻa e ongo māfana naʻe ongoʻi ʻe ʻEvaletí.
Ngaahi tā fakatātā ʻa Fiona Powers