“Fana ʻOne mo e Ngaahi Lanu Fakaʻofoʻofa,” Kaumeʻá, Siulai 2024, 10–11.
Fana ʻOne mo e Ngaahi Lanu Fakaʻofoʻofa
“Ko e hā ʻoku ʻikai ʻai ai ʻe he Tamai Hēvaní ke mole atu ʻa e longoaʻá?” Ko e fehuʻi ange ia ʻa Sāloté.
Naʻe hoko ʻa e talanoa ko ʻení ʻi he ʻIunaiteti Siteiti ʻo ʻAmeliká.
Naʻe fehiʻa ʻa Sālote ʻi he longoaʻa leʻolahí! Naʻe ʻikai ke ne saiʻia ʻi he ongo naʻá ne maʻu ʻi hono telingá pe ko ʻene ongo ki hono fakakaukaú. Naʻa mo e taimi naʻá ne ʻiloʻi ai ʻokú ne malú, naʻá ne kei ongoʻi faingataʻaʻia pē ʻi he taimi naʻe longoaʻa ai ʻa e ʻū meʻalelé, fiefia longoaʻa ʻa e kakaí, pe paʻulu ʻa e ngaahi nafá.
Pea naʻe fehiʻa moʻoni ʻa Sālote ʻi he fana ʻoné!
Naʻe feinga hono fāmilí ha ngaahi meʻa lahi ke fakafiemālieʻi ia ʻi he ngaahi longoaʻa leʻolahí. Naʻe fakatau mai ʻe Teti ha meʻa-kofu telinga makehe ke taʻofi ʻaki ʻa e longoaʻá. ʻI he pā ʻa e maná, naʻá ne taʻotaʻo mo ʻene faʻeé ʻi he lalo kafú. Naʻe lotu foki ʻa Sālote ki ha tokoni ke ʻoua te ne ilifia.
Naʻe tokoni kotoa ʻa e ngaahi meʻá ni. Ka naʻá ne kei ongoʻi ilifia pē ʻi he longoaʻa leʻolahí.
Naʻe talaange ʻe Mami kia Sālote, “Te tau ʻalu ki ha fakaʻaliʻali fana ʻone makehe ʻi he paʻaké he pooni.” “ʻOkú ke fie haʻu?”
Naʻe fakafulofula ʻa Sālote. “Ka ʻoku fuʻu leʻo lahi ʻa e fana ʻoné.”
Naʻe pehē ange ʻe Mami, “ʻOkú ke fuʻu lahi he taimí ni, mahalo ʻe toe kiʻi fakalata ange ke sio he fana ʻoné. ʻE ʻi ai kotoa ho ngaahi kaungāmeʻá. ʻE lava foki ke tau ʻalu mo hoʻo meʻa-kofu telingá ke ʻoua te ke ongoʻi ʻa e longoaʻá. ʻOkú ke pehē te ke lava ʻo ʻahiʻahiʻi ia?”
Naʻe māpuhoi ʻa Sālote. “Sai. Mahalo te u ʻahiʻahi.”
Naʻe kamata lelei ʻa e fakaʻaliʻali fana ʻone ʻi he paʻaké. Naʻe lele takai ʻa Sālote mo hono ngaahi kaungāmeʻá ʻi he musié, ʻo vahevahe ha fanga kiʻi fakaneifua mo nau vaʻinga. Naʻe ʻikai fuoloa kuo kamata ke fakapoʻuli ʻa e langí. Naʻe tangutu hifo ʻa Sālote ʻo toʻo hake e meʻa-kofu telingá mo sio tailiili hake ki he langí.
PĀ! PĀ! PATŌ!
Naʻe tā vave ange e mafu ʻo Sāloté, pea ʻikai ke mei hoko ʻene mānavá. Naʻá ne puna ki ʻolunga ʻo feinga ke mavahe mei he longoaʻa naʻá ne ʻātakaiʻi iá.
Naʻe tulimui atu ʻa Mami ʻo fuaʻi hake ʻa Sālote. Naʻá na tangutu hifo, pea fāʻofua ʻa Mami kiate ia. Naʻe mokulukulu e loʻimata ʻo Sāloté.
Naʻe pehē ange ʻe Mami, “ʻOku ou kole fakamolemole atu ʻi hoʻo ilifiá. Ko au eni ʻi heni pē. Ta tokanga taha pē ki he ʻū lanú ke ʻoua naʻá ke fuʻu fakatokangaʻi ʻa e meʻa ʻoku ongo maí. Ko e hā e ʻokú ke sio ki aí?”
Naʻe mihiʻi fakamanava lōloa ʻe Sālote ʻene mānavá. “ʻOku ou sio ki he lanu koulá, mo e kulokulá, mo e lanu matá.”
Naʻe pehē ange ʻe Mami, “Fakaʻaongaʻi leva he taimí ni ho ihú. Ko e hā e meʻa ʻokú ke nāmuʻí?”
Naʻe pehē ange ʻe Sālote, “ʻOku ou lava ʻo nāmuʻi ʻa e kohú mo e musié. Mo e popikoane!”
“Ko e hā mo ha toe ongoʻanga kehe te ke lava ʻo fakaʻaongaʻi he taimí ni?”
Naʻe kuikui ʻa Sālote. “ʻOku ou lava ʻo ongoʻi kinautolu. ʻI he pā ʻa e ʻoné, ʻoku ou ongoʻi ʻene ngalulú ʻi hoku fatafatá.”
“Te ke lava nai ʻo ʻahiʻahiʻi ha meʻa?” Ko e fehuʻi atu ia ʻa Mamí.
Naʻe fakateʻelelo ʻa Sālote. “ʻOku ʻikai ke u lava ʻo ʻahiʻahiʻi ʻa e fana ʻoné.” Naʻá ne kata.
Naʻe hoko kotoa ʻeni ke fifili ai ʻa Sālote. Naʻá ne fakakaukau, ʻoku ngaohi fēfē ʻe he kakaí ʻa e ngaahi lanu kehekehé? Ko e hā ʻoku pā ai ʻa e ʻoné? ʻOku nau ngaohi fēfē ha ngaahi fuo kehekehé? Naʻe ʻikai ke fuʻu fakailifia he taimí ni ʻa e fana ʻoné.
“Mami, ʻoku fakaofo e fana ʻoné!” Ko Sālote atu ia.
ʻI hono fakamohe ʻe Mami ʻa Sālote ʻi he pō ko iá, naʻe fehuʻi ange ʻe Sālote, “Ko e hā naʻe ʻikai tali ai ʻe he Tamai Hēvaní ʻeku ngaahi lotú ʻi he taimi naʻá ku kole ai ke Ne ʻai ke ʻoua te u fanongo ki he longoaʻá?”
Naʻe fakakaukau ʻa Mami ʻi ha kiʻi taimi siʻi. Naʻá ne pehē ange, “ʻOku ʻikai ke toʻo maʻu pē ʻe he Tamai Hēvaní ʻa e ngaahi meʻa fakailifiá. Ka ʻoku ʻi ai e taimi ʻe niʻihi ʻokú Ne tokoniʻi kitautolu ke tau sio ki he ngaahi meʻá ʻi ha founga makehe pe ʻomai ha kakai ke nau tokoni ke fakafiemālieʻi kitautolu.”
Naʻe pehē ange ʻe Sālote, “Hangē ko ʻEne tokoniʻi au he pōní!”
“Ko ia!” Naʻe malimali ʻa Mami. “Naʻá ke ʻalu ki he fakaʻaliʻali fana ʻoné neongo naʻá ke ilifia. Pea naʻe tokoniʻi koe ʻe he Tamai Hēvaní ke fakanonga hoʻo ilifiá. Naʻá Ne tokoniʻi foki koe ke ke sio ki he fakaʻofoʻofa ʻo e fana ʻoné ʻaki hono fakaʻaongaʻi hoʻo ngaahi ongoʻanga kehé.”
Naʻe fakakaukau ʻa Sālote ki he ngaahi lanu maama ʻi he langí peá ne malimali. Naʻá ne kei fehiʻa pē ʻi he longoaʻá. Naʻa nau kei fakailifia pē kiate ia. Ka naʻá ne ʻiloʻi ʻe lava ke tokoniʻi maʻu pē ia ʻe he Tamai Hēvaní ke ne loto-toʻa.
Tā Fakatātā ʻa Adam Howling